Read Plautdietsch (Low German) – De Bibel 2. Kjennichs 9 Bible Online

2. Kjennichs 9 - Plautdietsch (Low German) – De Bibel bible

2. Kjennichs 9

¹Dan säd Elisa to eenem von de Profeeten äare Jinja: Moak die reed un nemm dit Kauntje met Eelj met die un go no Ramot en Gilead.

²Wan du doahan kjemst, woascht du doa Jehu trafen. Daut es Joschafat sien Sän, un een Grootsän aun Nimschi. Go no am un kroag am, daut hee oppsteit von siene Jesalschoft, un go met am en eene benna Stow.

³Doa nemm de Eelj Kaun un jeet daut opp sien Kopp un saj: De HAR sajcht: Ekj hab die enjesaulft daut du Kjennich äwa Israel sennen saust. Oba dan moak de Däa op un ran un vesiem kjeene Tiet.

⁴Un de Jinja von de Profeeten jinkj no Ramot en Gilead.

⁵Aus de Jinja doahan kjeem, sauten de Kommandaunten von de Armee toop. Un hee säd to am: Kommandaunt, ekj well die waut sajen. Un Jehu säd: Wäm von ons? Un hee säd: Die, Kommandaunt.

⁶Dan stunt Jehu opp un jinkj en eene benna Stow. Doa goot de Jinja von de Profeeten waut Eelj opp Jehu sien Kopp un säd: De HAR, Israel äa Gott sajcht: Ekj hab die enjesaulft aus Kjennich äwa däm HARN sien Volkj, Israel.

⁷Du saust de Nokomen von Ahab, dienen Harn, ombrinjen, soo daut ekj mie aun daut Bloot rajchen kaun von dee, dee derch Isebel äa Väahaben jestorwen sent. Ekj woa mie rajchen fa miene Profeeten dee mie deenden, un aul dee aundre waut mie deenden.

⁸Ahab siene Nokomen woaren bat opp daut latste omjebrocht woaren, un ekj woa een Enj moaken von Ahab un von aule Mana, dee en Israel von am aufstaumen.

⁹Ekj woa soo met Ahab siene Nokomen doonen aus ekj met Jerobeam, Nebat sien Sän, un siene Nokomen deed, un soo aus ekj met Bascha, Ahija sien Sän, un siene Nokomen deed.

¹⁰De Hunj sellen Isebel vefräten en de Jäajent von Jesreel, un kjeena woat ar begrowen. Aus hee daut jesajcht haud, muak de Jinja de Däa op un rand wajch.

¹¹Aus Jehu rut kjeem no de Mana, dee sienen Harn deenden, säden dee to am: Es aules goot? Wuarom kjeem dis errsennja Mensch no die? Un hee säd: Na, jie kjanen soone Mana un woo dee räden.

¹²Un see säden: Daut es nich soo. Saj ons waut hee säd. Un hee säd: Soo un soo säd hee to mie, un hee säd: De HAR sajcht: Ekj hab die jesaulft aus Kjennich äwa Israel.

¹³Dan neem een jiedra schwind sienen Rock un läd dän opp de huage Stoop unja Jehu, un see blosden met de Trompeet un roopten, Jehu es Kjennich.

¹⁴Un Jehu, Joschafat sien Sän un Nimschi sien Grootsän, muak eenen Plon jäajen Joram. Joram wia don en Ramot en Gilead jewast, wua hee de israelitische Kjrieja jäajen Hasael, däm Kjennich von Aram, leiden deed.

¹⁵Oba hee wia trigj no Jesreel jegonen sikj von siene Wunden to veheelen dee hee von de Aramäa jekjräajen haud en dän Kaumf met Hasael, dän Kjennich von Aram. Un Jehu säd: Wan jie envestonen sent, dan lot kjeenem ut de Staut gonen daut hee Norecht no Jesreel brinjt, daut see daut doa hieren.

¹⁶Un Jehu stieech opp sienen Woagen nopp un fua no Jesreel, wua Joram lach. Ahasja, de Kjennich von Juda wia don jrod doahan jegonen om Joram to besieekjen.

¹⁷De Wajchta opp däm Torm en Jesreel sach, daut doa eene Grupp Woages aunkjeemen aus Jehu aunkjeem. Un hee säd to Joram: Doa komen waut Woages aunjefoaren. Un Joram säd: Schekj eenen von onse Ritta, daut hee an entjäajen ritt, un froacht auf see opp Fräd komen?

¹⁸Un de Ritta reet doahan un säd: De Kjennich frajcht auf jie opp Fräd komen? Un Jehu säd: Waut hast du met Fräd to doonen? Wenj om un komm met mie. Dan säd de Wajchta toom Kjennich: De Ritta es bat doa jekomen, oba dee kjemt nich trigj.

¹⁹Un Joram schekjt eenen tweeden Ritta. Aus dee bat Jehu kjeem säd hee: De Kjennich frajcht auf jie opp Fräd komen? Un Jehu säd am: Waut hast du met Fräd to doonen? Wenj om un komm met mie met.

²⁰Un de Wajchta leet däm Kjennich dit uk weeten un säd: Dee es doa aunjekomen, un dee kjemt nich trigj. Dee joagen soo aus Jehu, Nimschi sien Grootsän jajcht. Dee jajcht aus wan hee nich gaunz kluak es.

²¹Dan säd Joram: Spaunt aun. Un see spaunden sienen Woagen aun. Un Joram, de Kjennich en Israel, un Ahasja, de Kjennich äwa Juda, fuaren jieda opp sien Woagen, Jehu entjäajen. Un see troffen am bie Nabot sien Launt bie Jesreel.

²²Un aus Joram Jehu troff, säd hee: Jehu, kjemst du opp Fräd? Oba Jehu säd: Woo kaun doa Fräd sennen soo lang doa aul de Aufjettarie un Zaubarie von diene Mutta Isebel hia es?

²³Dan wonk Joram om un proowd wajch to komen. Un hee säd to Ahasja: Wie sent veroden, Ahasja.

²⁴Oba Jehu neem sienen Boagen un schoot Joram tweschen de Schulren un en sien Hoat nenn. Un Joram bruak doa toop.

²⁵Un Jehu säd to Bidkar, dee bie am wia: Nemm am un schmiet am opp daut Flekj, daut Nabot däm Jesreelit jehieed. Ekj weet noch woo ekj un du opp däm Woagen hinja sienen Voda Ahab fuaren, un de HAR äwa am säd:

²⁶Ekj hab kloa jeseenen woo Nabot un siene Kjinja omjebrocht worden, un ekj woa die daut opp dit Flekj trigjtolen. Nemm nu dän Kjarpa un schmiet dän opp daut Flekj, soo aus de HAR daut säd.

²⁷Aus Ahasja, de Kjennich von Juda, sach waut doa wort, muak hee sikj opp däm Wajch no Bet Gan opptoo. Un Jehu juach am hinjaraun un säd to siene Mana: Scheet am uk. Un see schooten am bie Gur, wua daut doa soo enne Hecht jeit, nich wiet von Jibleam. Un Ahasja fua bat Megiddo, oba doa storf hee.

²⁸Siene Mana brochten am no Jerusalem un begrowden am, wua siene Vodasch en de Davidstaut begroft sent.

²⁹Ahasja wort Kjennich äwa Juda en daut alfte Joa aus Joram, Ahab sien Sän, en Israel Kjennich wia.

³⁰Aus Jehu dan no Jesreel kjeem un Isebel hieed, waut doa jeworden wia, forf see sikj de Uagen un muak sikj äare Hoa schmock. Un see kjikjt utem Fensta rut

³¹aus Jehu oppem Hoff kjeem. Un see säd: Kjemst du en Fräd, du, dee du dienen Harn ombrinjst, soo aus Simri deed?

³²Un Jehu kjikjt nopp no daut Fensta un säd: Wäa es aun miene Sied? Un twee ooda dree von de Kjennichsche äare Deena kjikjten toom Fensta rut.

³³Un hee säd: Schmiet ar rauf. Un see schmeeten Isebel rauf, un äa Bloot sprezt aun de Waunt naun un uk opp de Pieed nopp, aus Jehu met sienen Woagen äwa ar äwa fua.

³⁴Un hee jinkj nenn, un aus hee ieescht jejäten un jedrunken haud, säd hee: Seet doano daut de Vefluchte begroft woat. See es doch een Kjennich siene Dochta.

³⁵Aus see dan jinjen om ar to begrowen, fungen see nuscht buta dän Kopp un de Feet un Henj.

³⁶Aus see trigj no Jehu kjeemen un am säden, waut doa jeworden wia, säd hee: Dan es daut krakjt soo aus de HAR derch sienen Deena Elia, von Tischbe, säd. Dee säd: De Hunj woaren Isebel äa Fleesch opp daut Flekj bie Jesreel oppfräten,

³⁷un äa Kjarpa woat Mest opp daut Flekj bie Jesreel sennen. Un kjeena woat sajen kjennen, wua Isebel es.