Read Plautdietsch (Low German) – De Bibel 1. Chronik 11 Bible Online

1. Chronik 11 - Plautdietsch (Low German) – De Bibel bible

1. Chronik 11

¹Gaunz Israel vesaumeld sikj bie David en Hebron un säd to am: Du best doch ons ieejnet Fleesch un Bloot!

²Aul don, aus Saul noch Kjennich wia, deetst du daut israelitische Häa em Kjrich veropp gonen. Un de HAR, dien Gott, haft die toojesajcht: Du saust mien Volkj Israel weiden, un du saust de väaschta äwa mien Volkj Israel sennen.

³Soo säden aule Leida von Israel, waut no däm Kjennich David no Hebron jekomen wieren. Un David muak dort en Hebron ver däm HARN eenen Bunt met an. Un see saulwden David toom Kjennich äwa gaunz Israel, soo aus de HAR daut derch Samuel jesajcht haud.

⁴Un David trock met aule Mana von Israel toop no Jerusalem, waut don Jebus heet. Wiels doa wonden to dee Tiet de Jebusita.

⁵Un de Birja von Jebus säden to David: Hia en dise vesechade Staut woascht du nich nenkomen. David neem de vesechade Staut Zion oba doch en, un dee wort to Davidstaut.

⁶David säd to siene Mana: Wäa de Jebusita daut ieeschte schleit, dee saul mien väaschta Kjrichsfiera woaren. Dan stieech Joab, de Zeruja äa Sän, daut ieeschte nopp no de Staut, un wort David sien Kjrichsfiera.

⁷Dan jinkj David un wond en de vesechade Städ, un doahäa wort dee “Davidstaut” jenant.

⁸David bud de Staut runtom ut, vom Millo aun gaunz runtom. Joab oba bud daut äwaje en de Staut wada trajcht.

⁹David neem emma mea to aun Macht, un de HAR, dee aules rejieet, wia met am.

¹⁰Dit sent de väaschte von David siene Helden, waut sikj tru aun am hilden en sien Kjennichrikj met gaunz Israel. Met daut gaunze Volkj toop muaken see am no däm HARN sien Wuat toom Kjennich äwa Israel.

¹¹Un dit sent de Nomes von David siene Helden: Joschobam, een Nokomen von Hachmoni, wia de väaschta von dree Helden; hee kjamft met däm Spies un spekjt 300 Fiend en eenen Kaumf doot.

¹²Hinja am wia Eleasar, Dodo sien Sän von Ahoach. Hee wia eena von dree Helden.

¹³Hee wia doabie, aus de Filista sikj bie Pas Damim jäajen David toom Kaumf vesaumelt hauden. Dort wia een Joascht Flekj. Aus de Israeliten oba fa de Filista nojäwen un ranen musten,

¹⁴stald hee sikj medden opp daut Flekj han, un veteidijd daut un see schluagen de Filista trigj. Un de HAR jeef Israel eenen grooten Siech.

¹⁵Eemol aus de Filista äa Loaga opp daut jlikje Launt Refaim oppjestalt hauden, jinjen dree von de 30 Helden no däm Steen rauf, wua David wia, en de Heel Adullam.

¹⁶Dort haud David eene Städ wua hee sechren Schutz haud, un wua hee sikj uk jrod opphilt; oba de Filista hauden en de selwje Tiet uk eene Aufdeelunk en Betlehem un bewoakten daut strenj.

¹⁷Un David leet sikj daut jelesten un säd: Mie darscht! Wäa holt mie Wota ut däm Borm waut bie daut Stautspuat en Betlehem es?

¹⁸Dan jinjen dree Helden un bruaken en daut Loaga von de Filista nenn, un schapten Wota ut däm Borm, waut biem Puat en Betlehem wia, un brochten daut no David. Hee oba wäad sikj daut to drinkjen, un goot daut ver däm HARN ut aus een Drinkjopfa

¹⁹un säd: Doa mucht Gott mie von wajchhoolen, daut ekj soont doo, wiels daut wudd je jrod soo sennen aus wan ekj daut Bloot von dise Mana drunk, waut äa Läwen opp Spell saden om dit Wota to holen. Doawäajen wull hee daut nich drinkjen. Dit deeden de dree stoakje Helden.

²⁰Abischai, Joab sien Brooda, wia de väaschta von de 30 Helden. Hee schluach met sienen Spies 300 Fiend dol.

²¹Un hee haud daut jratste aunseenen von dise 30 Mana; oba met de aundre Dree kjeem hee nich met.

²²Benaja, von Kabzeel, Jojada sien Sän, wia een Helden Kjamfa, dee groote Doten volbrocht. Hee schluach de twee groote Helden von de Moabita, waut aus Leiws von Moab bekaunt wieren. Un aus aun eenen Dach, aus daut jeschniet haud, een Leiw em Borm jefollen wia, dan kroop hee doa auleen nenn un schluach däm doot.

²³Hee schluach uk eenen ägiptischen Maun doot, waut fief Ellen huach wia, un eenen Spies enne Haunt haud, waut soo dikj wia aus een Wäwaboom. Oba hee jinkj bloos met eenen Stock opp däm loos, un reet am sienen Spies ut de Haunt un spekjt am doamet doot.

²⁴Derch soone Doten wort Benaja aus eena von de 30 Helden aunerkjant.

²⁵Un hee wort huach jeieet mank de 30 Helden, oba met de väaschte dree Helden kjeem hee nich met. David stald am oba aun äwa siene Wajchta.

²⁶De aundre stoakje Helden wieren dise: Asael, Joab sien Brooda; Elhanan, Dodo sien Sän, von Betlehem;

²⁷Schamot von Harod, Helez von Pelon,

²⁸Ira, Ikkesch sien Sän, von Tekoa; Abieser von Anatot,

²⁹Sibbechai von Huscha, Ilai von Ahoach,

³⁰Mahrai von Netofa, Heled, Baana sien Sän, von Netofa,

³¹Ittai, Ribai sien Sän, von Gibea en Benjamin; Benaja von Piraton,

³²Hiddai von Nahale Gaasch, Abiel von Bet Araba,

³³Asmawet von Bahurim, Eljachba von Schaalbim,

³⁴Jaschen, de Gunita; Jonatan, Schage sien Sän, von Harar,

³⁵Ahiam, Sachar sien Sän, von Harar, Elifal, Ur sien Sän,

³⁶Hefer von Mechera, Ahija von Pelon,

³⁷Hezro von Karmel, Naarai, Esbai sien Sän,

³⁸Joel, Natan sien Brooda; Mibhar, Hagri sien Sän,

³⁹Zelek, de Amonita; Nachrai von Beerot, Joab sien Schiltdroaga.

⁴⁰Ira von Jatir, Gareb von Jatir,

⁴¹Uria, de Hetita, Sabad, Achlai sien Sän,

⁴²Adina, Schisa sien Sän, een Befälshaba ut däm Staum Ruben waut äwa 30 Mana to jebeeden haud.

⁴³Hanan, Maacha sien Sän, Joschafat von Meten,

⁴⁴Usija von Aschtarot, Schama un Jehiel, Hotam siene Säns, von Aroer.

⁴⁵Jediael, Schimri sien Sän, un sien Brooda Joha, von Tiz.

⁴⁶Eliel von Mahawiem, Jeribai un Joschawja, Elnaam siene Säns, Jitma, de Moabita;

⁴⁷un Eliel, Obed un Jaasiel von Zoba.