Read Plautdietsch (Low German) – De Bibel 1. Chronik 14 Bible Online

1. Chronik 14 - Plautdietsch (Low German) – De Bibel bible

1. Chronik 14

¹Hiram, de Kjennich von Tierus, schekjt Bootschofta no David, un Zeedaholt un uk Mana, dee doa vestunden Steena to beoabeiden, un uk soone, dee Holt un Buoabeit vestunden to doonen, waut am eenen Paulaust buen sullen.

²Un David wort daut doaraun en, daut de HAR am toom Kjennich äwa Israel bestädicht haud, wiels sien Kjennichrikj sea stoakj jeworden wia om daut Volkj Israel äat haulwen.

³Un David neem sikj noch mea Frues en Jerusalem un haud von an noch mea Säns un Dajchta.

⁴De Säns, dee am en Jerusalem jebuaren worden, heeten: Schamua, Schobab, Natan, Salomo,

⁵Jibhar, Elischua, Elpelet,

⁶Nogah, Nefeg, Jafia,

⁷Elischama, Beeljada un Elifelet.

⁸Aus de Filista daut hieeden, daut David toom Kjennich äwa gaunz Israel jesaulft wia, kjeemen see aula opp, om am en äare Jewault to brinjen. Aus David daut hieed, jinkj hee an entjäajen.

⁹Un de Filista kjeemen un besaden daut jlikje Flekj von Refaim.

¹⁰David oba fruach Gott un säd: Saul ekj jäajen de Filista kjamfen gonen, un west du dee en miene Macht jäwen? De HAR säd to am: Jriep dee aun! Ekj woa dee en diene Macht jäwen.

¹¹Un David jinkj loos un besiejd de Filista bie Baal Perazim un säd: Soo aus Wota eenen Daum derchbrakjt, soo haft de HAR derch miene Haunt de Rieejen von miene Fiend derchjebroaken. Doawäajen nanden see de Städ “Baal Perazim”.

¹²Un de Filista, dee bosich flichten musten leeten soogoa äare Jetta dort ligjen; un David leet dee vebrennen.

¹³Oba de Filista kjeemen boolt wada un besaden daut jlikje Flekj von Refaim.

¹⁴Un David fruach Gott wada, un Gott säd to am: Jriep dee nich aun, go bie an rom, soo daut du von de Bakabeem aun an naun kjemst.

¹⁵Wan du dan hieren woascht, daut doa bowen en de Bakabeem een Jeruschel es, aus wan doa wäa derchgonen deit, dan go loos toom Kaumf; dan es Gott ver die loosjegonen, de Filista äa Häa to schlonen.

¹⁶Un David deed, soo aus Gott am väajesajcht haud, un see schluagen de Filista äa Häa von Gibeon bat Gesser trigj.

¹⁷David sien aunseenen vebreed sikj en aule Lenda, un de HAR sorjd doafäa, daut am aule Velkja ferchten.