Read Plautdietsch (Low German) – De Bibel 1. Chronik 15 Bible Online

1. Chronik 15 - Plautdietsch (Low German) – De Bibel bible

1. Chronik 15

¹David leet en de Davidstaut fa sikj Hiesa buen un bestemd uk eenen Plauz fa de Bundeskjist un leet uk fa dee een Zelt oppstalen.

²Dan säd David: Gott siene Kjist saul kjeen aundra droagen aus de Leviten, wiels dee haft de HAR doatoo jewält, daut see däm HARN siene Bundeskjist droagen un am aulen Tiet deenen sellen.

³Dan leet David gaunz Israel no Jerusalem tooproopen, om dän HARN siene Kjist no däm Plauz to brinjen, waut hee fa dee reedjemoakt haud.

⁴Besondasch enjelot wieren de Priesta, de Nokomen von Aaron, un de Leviten.

⁵Von Kehat siene Nokomen wieren: Uriel, de väaschta, met siene Breeda toop 120 Mana.

⁶Von Merari siene Nokomen wieren: Asaja, de väaschta, met siene Breeda toop 220 Mana.

⁷Von Gerschon siene Nokomen wieren: Joel, de väaschta, met siene Breeda toop 130 Mana.

⁸Von Elizafan siene Nokomen wieren: Schemaja, de väaschta, met siene Breeda toop 200 Mana.

⁹Von Hebron siene Nokomen wieren: Eliel, de väaschta, met siene Breeda toop 80 Mana.

¹⁰Un von Usiel siene Nokomen wieren: Aminadab, de väaschta, met siene Breeda toop 112 Mana.

¹¹Un David roopt de Priesta Zadok un Abjatar un de Leviten, Uriel, Asaja, Joel, Schemaja, Eliel un Aminadab,

¹²un säd to an: Jie sent de Leida von de levitische Volkjsgruppen; doot junt un june Breeda reinjen un Gott weien, wiels jie sellen däm HARN, Israel äaren Gott, siene Bundeskjist no däm Plauz brinjen, waut ekj fa dee väajeseenen hab.

¹³Wiels daut ieeschtemol, aus jie nich doa wieren, muak de HAR, ons Gott, eenen schwoaren Schlach unja ons, wiels wie am nich jefroacht hauden, woo sikj daut jehieed.

¹⁴Dan weiden de Priesta un Leviten sikj, om dän HARN, Israel äaren Gott, siene Bundeskjist to droagen.

¹⁵Un de Leviten druagen Gott siene Kjist met Stangen opp äare Schulren, soo aus Moses an daut no däm HARN sien Wuat väajesajcht haud.

¹⁶David säd to de väaschte Mana von de Leviten, daut see äare Staumbreeda, waut sinjen un spälen deeden, aunstalen sullen, daut see däm HARN to ieren met freiden Leeda sungen. See sullen daut lud met Seidenspell, met Zitta un Hoapen, un met Zimbeln bejleiten.

¹⁷Dan stalden de Leviten Heman, Joel sienen Sän aun, un von siene Breeda Asaf, Berechja sienen Sän, un von äare Staumbreeda, von Merari siene Nokomen, Etan, Kuschaja sienen Sän.

¹⁸Un von äare Staumbreeda von de tweede Ordnunk kjeemen doatoo Secharja, Jaasiel, Schemiramot, Jehiel, Unni, Eliab, Benaja, Maaseja, Matitja, Elifelehu, Mikneja, Obed Edom un Jeiel, de Puatenwajchta.

¹⁹Heman, Asaf un Etan wieren Sinja, un see schluagen met Schlach Instrumenten, de hal kjlinjende bronsne Zimbeln.

²⁰Secharja, Jaasiel, Schemiramot, Jehiel, Unni, Eliab, Maaseja un Benaja spälden de Hoapen met huage Teen.

²¹Matitja, Elifelehu, Mikneja, Obed Edom, Jeiel un Asaja spälden Zitta met acht Seiden.

²²Kenanja, de väaschta von de Meistasch em sinjen mank de Leviten, jeef an em sinjen Aunleidunk, wiels hee vestunt daut goot.

²³Berechja un Elkana wieren de Wajchta ver de Bundeskjist.

²⁴Un de Priesta Schebanja, Joschafat, Netanel, Amasai, Secharja, Benaja un Elieser, blosden met de Trompeeten ver Gott siene Kjist; un hinja an foljden Obed Edom un Jehija aus Wajchta.

²⁵Soo jinjen David un de Leida von Israel un de väaschte Mana von siene Truppen han, om dän HARN siene Bundeskjist met freiden ut daut Hus von Obed Edom to holen.

²⁶Un wiels Gott de Leviten holp, waut de Kjist met däm HARN sienen Bunt druagen, opfaden see ut Dank säwen junge Bolles un säwen Schopsbakj.

²⁷David druach eenen Äwarock von feinet wittet Lienzeich. Un soo wieren uk de Leviten jekjleet, waut de Bundeskjist druagen, un de Sinja un Kenanja, de väaschta em Jesank. Un David selfst druach uk daut Priesta Schalduak von Lienzeich.

²⁸Gaunz Israel stemd met freiden en, en däm Klank von de Posaunen, Trompeeten un hale Zimbeln, Zitta un Hoapen. Soo bejleiten see däm HARN siene Bundeskjist, aus dee no äaren nieen Plauz jebrocht wort.

²⁹Aus de Bundeskjist en de Davidstaut nenn jedroacht wort, stunt David siene Fru Michal, Saul siene Dochta, aum Fensta. Un aus see däm Kjennich David daunzen un ut Freid sprinjen sach, veacht see am en äa Hoat.