Read Plautdietsch (Low German) – De Bibel 1. Chronik 18 Bible Online

1. Chronik 18 - Plautdietsch (Low German) – De Bibel bible

1. Chronik 18

¹No däm schluach David de Filista un bedwunk an am unjadon to sennen, un neem an de Staut Gat met de Siedlungen toop, waut doatoo jehieeden, wajch.

²Hee besiejd uk de Moabita, soo daut dee am unjadon worden, un räajelmässich Taks tolen musten.

³Dan schluach hee uk Hadad Eser, däm Kjennich von Zoba, waut een Launtstekj bat aun Hamat haud. Hadad Eser wia jrod loosjegonen, om daut Launt aum Eufrat unja siene Macht to brinjen.

⁴Un David jewonn von däm 1.000 Kaumf Woages, un neem 7.000 Rittasch un 20.000 Soldoten, dee tofoot wieren, faust. De Foapieed von de Kaumf Woages leet David de Footsänen derchschnieden, om dee lom to moaken; bloos 100 von dee veschoond hee.

⁵Un aus de Aramäa von Damaskus kjeemen, om Hadad Eser, däm Kjennich von Zoba, to halpen, besiejd David uk dee un schluach von de Aramäa 22.000 Mana doot

⁶un sad Vewaultasch en äare Städa nenn, daut see am unjadon sennen musten, un musten am Taks tolen. De HAR stunt David bie un holp am, met aules waut hee unjaneem.

⁷David neem uk de goldne Schilten, waut Hadad Eser siene huage Offizieren jedroacht hauden, un brocht dee no Jerusalem.

⁸Un David neem uk ut Hadad Eser siene Städa, Tibhat un Kun, sea väl Brons. Doavon leet Salomo daut soojenande bronsne Mäa, de bronsne Past un de aundre bronsne Sachen fa dän Tempel moaken.

⁹Oba aus Toi, de Kjennich von Hamat, daut hieed, daut David de gaunze Kjrichsmacht von Hadad Eser, däm Kjennich von Zoba, jeschloagen haud,

¹⁰schekjt hee sienen Sän Hadoram no däm Kjennich David un leet am jreessen un Säajen wenschen, wiels hee met Hadad Eser jekjamft un däm besiecht haud. Wiels Toi un Hadad Eser hauden sikj jäajensiedich bekjriecht. Un Hadoram brocht David Jereetschoft, waut von Golt, Selwa un Brons jemoakt wia.

¹¹Un de Kjennich David weid däm HARN uk dit Jereetschoft, krakjt soo aus hee uk daut Selwa un Golt, waut hee von de aundre Velkja jenomen haud, von de Edomita, Moabita, Amonita, Filista un Amalekita.

¹²Abischai, Zeruja äa Sän, besiejd de Edomita en daut Solttol, un doabie follen 18.000 von de Edomita,

¹³un David sad en Edom Vewaultasch en, soo daut aule Edomita am unjadon wieren. De HAR stunt David bie, un leet am daut jlekjen, waut hee unjaneem.

¹⁴Soo rejieed David äwa gaunz Israel un sorjd fa Rajcht un Jerajchtichkjeit fa sien gaunzet Volkj.

¹⁵Joab, Zeruja äa Sän, wia de hechste Befälshaba äwa daut Häa. Joschafat, Ahilud sien Sän, deed de Bieekja met de Jeschichten von daut Kjennichrikj oppbewoaren.

¹⁶Zadok, Ahitub sien Sän, un Abimelech, Abjatar sien Sän, wieren Priesta. Schawscha wia Schriewa,

¹⁷un Benaja, Jojada sien Sän, wia Befälshaba äwa David siene Wajchta. Un David siene Säns wieren de ieeschte Mana aum Kjennich.