Read Plautdietsch (Low German) – De Bibel 1. Chronik 20 Bible Online

1. Chronik 20 - Plautdietsch (Low German) – De Bibel bible

1. Chronik 20

¹Un daut näakjste Farjoa, en dee Tiet, waut de Kjennichs toom kjriejen nuzten, jinkj Joab met daut Kjrichshäa wada loos toom Kaumf jäajen de Amonita. See deeden daut Launt vestieren, un kjeemen bat de Staut Raba un beloagaden dee. David selfst bleef oba en Jerusalem. Un Joab neem de Staut Raba en un vestieed dee.

²Dan kjeem uk David un neem däm amonitischen Kjennich de goldne Kroon vom Kopp. Dee wuach een Zentna un haud eenen sea dieren Steen. Un dee wort David oppjesat. Buta däm neem hee noch väle wieetvolle Sachen ut de Staut met.

³Hee stald de Enwona aun de Oabeit; see musten met Steensoagen, iesane Hoakes un Akjsen oabeiden. Soo deed David daut met aule Städa von de Amonita. Un dan jinkj David met daut Kjrichsvolkj toop wada trigj no Jerusalem.

⁴No däm kjeem daut bie Gesser toom Kaumf met de Filista. Dan schluach Sibbechai von Huscha dän Saf doot, waut von daut Riesenjeschlajcht staumd, un de Filista musten an unjadon sennen.

⁵Un daut jeef noch eenen Kaumf met de Filista. Doa schluach Elhanan, Jair sien Sän, dän Lachmi von Gat doot, waut Goliat sien Brooda wia, un dee soon dikjen Stock aum Spies haud aus een Wäwaboom.

⁶Aus daut no däm dan bie Gat toom Kaumf kjeem, kjeem doa een besondasch groota Ries äwadäl. Dee haud aun jieda Haunt sas Finjasch un aun jieda Foot sas Teeen, daut muak aules toop 24. Un hee wia eena von daut Riesenjeschlajcht.

⁷Dee spott äwa de Israeliten, oba Jonatan, dee David sien Brooda Schama sien Sän wia, schluach däm Ries doot.

⁸Dise Riesen staumden ut Gat un wieren Nokomen von Rafa. Un dee worden von David un siene Mana dootjeschloagen.