Read Plautdietsch (Low German) – De Bibel 1. Chronik 26 Bible Online

1. Chronik 26 - Plautdietsch (Low German) – De Bibel bible

1. Chronik 26

¹Uk de Puatenwajchta biem Tempel wieren en Aufdeelungen enjedeelt. Ut Korach siene Grupp kjeem Meschelemja, Kore sien Sän un Abiasaf sien Grootsän.

²Meschelemja siene Säns wieren dise: De ieeschtjebuarna Sän Secharja, de tweeda Jediael, de dredda Sebadja, de vieeda Jatniel,

³de fefta Elam, de sasta Johanan un de säwenda Eljoenai.

⁴Uk Obed Edom jehieed doatoo; un siene Säns wieren: De ieeschtjebuarna Sän Schemaja, de tweeda Josabad, de dredda Joach, de vieeda Sachar, de fefta Netanel,

⁵de sasta Amiel, de säwenda Isachar un de achta Peuletai. Met soo väl Säns haud Gott am jesäajent.

⁶Un sienen Sän Schemaja worden uk Säns jebuaren, un daut worden leidende Mana en äare Volkjsgruppen, wiels see wieren aunjeseene Mana.

⁷Schemaja siene Säns wieren: Otni, Refael, Obed un Elsabad un siene Breeda, Elihu un Semachja, beides aunjeseene Mana.

⁸Aul dise Puatenwajchta wieren Nokomen von Obed Edom. See met äare Säns un Breeda toop, waut to däm Deenst goot jeieejent wieren, wieren aules toop 62 Mana.

⁹Von Meschelemja siene Säns un Breeda wieren 18 aunjeseene Mana.

¹⁰Hosa siene Säns, dee to Merari siene Nokomen jehieeden, wieren: De ieeschta Sän Schimri, wiels de ieeschtjebuarna Sän wia nich mea doa, doawäajen moak sien Voda am toom ieeschten Sän,

¹¹un de tweeda wia Hilkija, de dredda Tebalja un de vieeda Secharja. De Säns un Breeda von Hosa wieren aules toop 13 Mana.

¹²Dise Aufdeelungen von de Puatenwajchta, foll no de Zol von de Mana de Oppgow too, soo aus äare Breeda, en däm HARN sien Hus to deenen.

¹³See losten ut, woone Famieljes de eenselne Puaten bewoaken sullen, un doabie wort de jinjsta krakjt soo behaundelt aus de elsta.

¹⁴Daut Loss fa de oostne Sied foll opp Meschelemja. Uk fa sienen Sän Secharja, dee een kluaka Rotjäwa wia, trocken see een Loss, un am foll daut em Nuaden too.

¹⁵Opp Obed Edom foll daut Loss em Sieden, un opp siene Säns daut vom Väarotshus.

¹⁶Daut Wastpuat un daut Schellechet Puat, wua de Gaus nopp jeit, follen Schuppim un Hosa too. De Wajchta worden soo oppjedeelt:

¹⁷Aun de oostne Sied sullen aule Dach sas Mana stonen, aun de nuadne Sied vea, em Sieden uk vea, biem Väarotshus emma twee,

¹⁸aun de wastne Sied, wua de Aunbu es, aun de Gaus vea, un bie däm Aunbu twee.

¹⁹Daut wieren de eenselne Aufdeelungen von de Puatenwajchta, dee aula to de Nokomen von Korach un Merari jehieeden.

²⁰Eenje aundre Leviten hauden de Oppsecht äwa daut Tempelkaptol un äwa de Gott jeweide Gowen, waut fa däm Tempel väajeseenen wieren.

²¹Ladan siene Säns, de Nokomen von däm Gerschonita Ladan, wieren Leida en de Jehielita äare Grupp.

²²De Säns von de Jehielita, Setam un sien Brooda Joel, wieren äwa daut Kaptol en däm HARN sien Hus aunjestalt.

²³Buta an worden uk noch Nokomen von Amram, Jizhar, Hebron un Usiel to dise Oppgow aunjestalt.

²⁴Emol ea wia Schubael, Gerschom sien Sän, dee een Sän von Moses wia, de väaschta äwa daut Kaptol em Heilichtum jewast.

²⁵Von sienen Brooda Elieser, Moses sienen aundren Sän, staumd Rehabja; un däm sien Sän wia Jeschaja, Jeschaja sien Sän wia Joram, Joram sien Sän wia Sichri, un däm sien Sän wia Schelomit.

²⁶Dis Schelomit un siene Breeda wieren enjesat äwa aul daut Kaptol, de jeweide Gowen to woaken, waut de Kjennich David un de Gruppenleida, dee äwa 1.000 un äwa 100 wieren, un de Befälshaba em Kjrichshäa däm HARN jeweit hauden.

²⁷Waut see von äa Kjrichskaptol aufjedeelt hauden, om doamet däm HARN sien Hus to buen.

²⁸Uk aules, waut de Profeet Samuel, Saul, Kisch sien Sän, Abner, Ner sien Sän, un Joab, Zeruja äa Sän, jeweit hauden, fa aul dee äare jeweide Gowen, wieren Schelomit un siene Breeda veauntwuatlich.

²⁹Von Jizhar siene Nokomen wieren Kenanja un siene Säns buten oppem Launt en Israel aus Aumtslied un Rechta aunjestalt.

³⁰Von Hebron siene Nokomen wieren Haschabja un siene Aunjehieeje, 1.700 aunjeseene Mana, dee aus Vewaultasch von Israel aun de wastne Sied Jordan aule Oabeiten fa däm HARN, un uk fa däm Kjennich to vewaulten hauden.

³¹De väaschta von Hebron siene Nokomen met aul äare Volkjsgruppen un Famieljes wia Jerija. Em 40. Rejierungsjoa von David wort de gaunze Nokomenschoft von Hebron derchjesocht un see fungen doabie en Jaser em Launt Gilead väl stoakje aunjeseene Mana.

³²Un David sad dee met Jerija aus väaschta en daut Oostjordan Launt en, wua de Stam Ruben, Gad un de haulwa Staum Manasse wonden. See wieren dort Oppsechta äwa Gott siene Sachen un uk äwa däm Kjennich siene. Aules toop wieren see 2.700 Mana, waut aules Gruppenleida wieren.