Read Plautdietsch (Low German) – De Bibel 2. Chronik 17 Bible Online

2. Chronik 17 - Plautdietsch (Low German) – De Bibel bible

2. Chronik 17

¹Un Asa sien Sän Joschafat wort Kjennich en siene Städ. Un hee wort Israel jäajenäwa stoakj.

²Hee sad en aule fauste Städa von Juda Soldoten nenn un stald Aumtslied aun en daut Launt Juda, un uk en de Städa en Efraim, waut sien Voda enjenomen haud.

³Un de HAR stunt am bie, wiels hee läwd soo aus sien Staumvoda David jeläft haud un socht nich de Baal Jetta.

⁴Hee socht siene Vodasch äaren Gott un befoljd siene Jebooten un deed daut nich soo, aus Israel daut deed.

⁵Doawäajen stoakjt de HAR siene Kjennichs Macht. Un gaunz Juda brocht Joschafat Jeschenkja, un hee wort sea rikj un kjrieech een grootet aunseenen.

⁶Wiels hee däm HARN jehorchen deed, wort hee emma mootja, un leet de huage Opfastäden von de framde Jetta un de jeweide Pols, en Juda vestieren.

⁷En sien dreddet Rejierungsjoa schekjt Joschafat siene hechste Beaumte Ben Hajil, Obadja, Secharja, Netanel un Michaja, daut see en de Städa von Juda lieren sullen.

⁸Un de Leviten Schemaja, Netanja, Sebadja, Asael, Schemiramot, Jonatan, Adonija, Tobija un Tob Adonija jinjen met an met, un uk de Priestasch Elischama un Joram.

⁹See worden aula vom Kjennich jeschekjt un jinjen derch aule Städa von Juda. See hauden däm HARN sien Jesazbuak bie sikj un lieeden daut Volkj, soo aus de Kjennich daut aunjeordnet haud.

¹⁰De HAR leet eenen Schrakj komen äwa aule Kjennichrikjs von de Lenda, waut runtom Juda wieren, soo daut sikj kjeena woagd am auntojriepen.

¹¹Soogoa eenje von de Filista brochten Joschafat Jeschenkja un Selwa aus Aufgowen; un uk de Araba brochten am 7.700 Schopsbakj un uk 7.700 Kosenbakj.

¹²Soo wort Joschafat siene Macht emma jrata. Hee bud en Juda vesechade Städen un Städa met Korn Spikjasch

¹³un haud väl Väarot un Soldoten en de Städa von Juda, un sea stoakje un mootje Soldoten, en Jerusalem.

¹⁴Un dit wia äare Deenstordnunk no äare Volkjsgruppen no: En Juda wieren de väaschte äwa 1.000: Adna, de väaschta, un unja am 300.000 stoakje Soldoten.

¹⁵Johanan, de väaschta, un unja am 280.000.

¹⁶Amasja, Sichri sien Sän, dee sikj friewellich em Deenst fa däm HARN stald, un met am wieren 200.000 stoakje Soldoten.

¹⁷De väaschta äwa Benjamin wia: Eljada, een Kjrieja met eenen Helden Moot, un unja am 200.000, waut met Schilt un Flizboagen bewaufnet wieren;

¹⁸Josabad, wia de väaschta äwa 180.000 Mana, waut goot bewaufnet wieren toom kjamfen.

¹⁹Dise stunden däm Kjennich em Kjrich aula to Vefiejunk, buta dee, dee de Kjennich noch en de vesechade Städen en de Städa von gaunz Juda enjesat haud.