Read Plautdietsch (Low German) – De Bibel 2. Chronik 22 Bible Online

2. Chronik 22 - Plautdietsch (Low German) – De Bibel bible

2. Chronik 22

¹De Enwona von Jerusalem muaken Ahasja, Joram sienen jinjsten Sän, en siene Städ toom Kjennich, wiels de Reiba Baunden, waut met de Araba toop daut Kjrichshäa en Juda äwafollen hauden, hauden siene elste Säns aula omjebrocht. Doawäajen wort Joram sien Sän Ahasja, Kjennich en Juda.

²Ahasja wia 22 Joa oolt, aus hee Kjennich wort; un hee rejieed een Joa en Jerusalem. Siene Mutta wia Atalja, Omri siene Dochta.

³Un uk hee waundeld no daut Väabilt von Ahab sien Kjennichshus, wiels siene Mutta, waut am Rot jeef, am toom gottloos sennen aunleid.

⁴Doawäajen deed hee, waut däm HARN schlajcht jefoll, soo aus de Nokomen von Ahab, wiels von dee leet hee sikj no däm Doot von sienen Voda beroden. Un daut fieed to sienen Unjagank.

⁵Hee jinkj uk opp äaren Rot en un jinkj met Joram, Ahab sienen Sän, däm Kjennich von Israel, en dän Kaumf no Ramot en Gilead jäajen Hasael, däm Kjennich von Aram. Oba de Aramäa vewunden Joram,

⁶soo daut hee omwenjen must, om sikj en Jesreel siene Wunden heelen to loten, dee see am en Ramot jeschloagen hauden, aus hee met Hasael, däm Kjennich von Aram, jekjamft haud. Un Ahasja, Joram sien Sän, de Kjennich von Juda, reisd doahan, om Joram, Ahab sienen Sän, en Jesreel to besieekjen, wiels dee krank wia.

⁷Oba von Gott wia daut äwa Ahasja to sien vedoawen beschloten, daut hee no Joram kjeem. Un aus hee doa aunjekomen wia, fua hee met Joram met jäajen Jehu, Nimschi sienen Sän, däm de HAR toom Kjennich jesaulft haud, om Ahab siene Nokomen uttoroden.

⁸Aus Jehu doa daut Strofjerecht aun Ahab sien Hus derchfieren deed, bejäajend hee uk de Truppenleida von Juda un Ahasja siene Breeda äare Säns, dee en sienen Deenst stunden, un muak dee aula doot.

⁹Ahasja selfst oba vestuak sikj en Samaria; oba Jehu leet am sieekjen, un hee wort faustjenomen un no Jehu jebrocht. Un dee leet am hanrechten, un see begrowden am, wiels see säden sikj: Hee es een Nokomen von Joschafat, dee iernstlich däm HARN socht. Un doa wia kjeena mea ut Ahasja siene Famielje, waut oolt jenuach wia, om de Kjennichs Harschoft to äwanämen.

¹⁰Aus Atalja, Ahasja siene Mutta, daut enwort daut äa Sän doot wia, muak see sikj opp un brocht aul dee om waut to daut Kjennichs Jeschlajcht von Juda jehieeden.

¹¹Oba Joscheba, eene Kjennichsdochta, hold Ahasja sienen kjlienen Sän Joasch jeheem ut de Medd von däm Kjennich siene Säns rut, waut dootjemoakt woaren sullen, un brocht am met siene Fläajasche toop en de Schlopstow nenn. Soo vestuak see am fa Atalja, daut hee nich met däm Kjennich siene aundre Säns toop dootjemoakt wort. Joscheba wia eene Dochta von däm Kjennich Joram, däm Priesta Jojada siene Fru, un Ahasja siene Sesta.

¹²Sas Joa wort Joasch bie an jeheem em Tempel jehoolen, soolang aus Atalja daut Launt rejieed.