Read Plautdietsch (Low German) – De Bibel 2. Chronik 25 Bible Online

2. Chronik 25 - Plautdietsch (Low German) – De Bibel bible

2. Chronik 25

¹Amazja wia 25 Joa oolt, aus hee Kjennich wort; un rejieed 29 Joa en Jerusalem. Siene Mutta heet Joadan, un staumd ut Jerusalem.

²Un hee deed, waut däm HARN jefoll, oba nich met een onjedeeldet Hoat.

³Aus hee de Kjennichsmacht ieescht faust en siene Haunt haud, leet hee de Hoffdeena doot moaken, waut sienen Voda Joasch dootjeschloagen hauden.

⁴Oba dee äare Säns veschoond hee, wiels em Jesazbuak von Moses däm HARN sien jeboot jeschräwen steit: De Vodasch sellen nich wäajen äare Säns stoawen, un de Säns sellen nich wäajen äare Vodasch stoawen. Jieda eena saul bloos wäajen siene ieejne Schult stoawen.

⁵Amazja roopt de Mana von de Stam Juda un Benjamin ut daut gaunze Launt toop, un deed dee no äare Volkjsgruppen no ordnen, un unjastald an de Oppsecht von Befälshaba, dee äwa 1.000 wieren, un von Befälshaba, dee äwa 100 wieren. Un aus aule Mana von 20 Joa un doaräwa jetalt wieren, kjeem daut rut, daut hee eene Armee haud von 300.000 utjeläsde Lied, dee toom Kjrich gonen un Spies un Schilt brucken kunnen.

⁶Buta däm leet hee fa 100 Zentna Selwa 100.000 Soldoten ut Israel aunwoawen.

⁷Dan kjeem oba een Gottesmaun no am un säd: Mien Kjennich, lot nich daut Häa von Israel met die gonen, wiels de HAR es nich met Israel, un met de Mana von Efraim.

⁸Wan du denkjst, doaderch stoakj to sennen toom Kaumf, dan woat Gott die ver diene Fiend tofaul komen loten. Gott kaun beides, die halpen uk die toom Faul brinjen!

⁹Amazja säd to däm Gottesmaun: Un waut saul met de 100 Zentna Selwa jedonen, waut ekj de Soldoten ut Israel jejäft hab? De Gottesmaun säd: Daut steit biem HARN, dee die väl mea aus daut jäwen kaun.

¹⁰Doa leet Amazja de Soldoten gonen, dee von Efraim jekomen wieren, un leet an trigj no Hus gonen. Un see worden wäajen daut sea wuttich äwa Juda, un jinjen met Wutt un Groll trigj no Hus.

¹¹Amazja oba foot nieen Moot un fieed sien Volkj toom Kaumf. Hee jinkj en daut Solt Tol un besiejd dort de Nokomen von Seir, wuavon 10.000 em Kaumf follen.

¹²Un de Mana von Juda neemen noch 10.000 von dee läwendich faust; un dee brochten see opp eene huage Steenspetz nopp un schupsten dee von doa rauf, daut dee aula veschmataden.

¹³Oba de Soldoten, dee Amazja trigjeschekjt haud, daut see nich met sien Volkj toop en dän Kaumf jinjen, äwafollen de Städa von Juda tweschen Samaria un Bet Horon, un schluagen 3.000 Mana doot un jewonnen väl Kaptol.

¹⁴Aus Amazja von däm Siech äwa de Edomita trigjkjeem, brocht hee sikj dee äare Jettabilda met, un stald dee fa sikj aus Jetta opp un bäd dee aun un brocht dee Ruakopfa.

¹⁵Dan flaumd dän HARN sien Oaja opp äwa Amazja, un hee schekjt eenen Profeet no am un leet am sajen: Wuarom sieekjst du Help bie dee Jetta, waut äa Volkj nich emol ut diene Haunt raden kunnen?

¹⁶Oba aus de Profeet soo met am räd, säd de Kjennich to am: Haft die wäa to däm Kjennich sien Rotjäwa jemoakt? Hia opp! Wuarom west du dootjeschloagen woaren? Doa hieed de Profeet opp un recht siene Norecht nich wieda ut. Hee säd bloos noch: Ekj weet, daut de HAR dienen Unjagank beschloten haft, wiels du soont jedonen un opp mienen Rot nich jehorcht hast.

¹⁷Amazja, de Kjennich von Juda, schekjt wäm no Joasch, Joahas sien Sän un Jehu sien Grootsän, däm Kjennich von Israel un leet am sajen: Komm, well wie ons emol eena met däm aundren mäten!

¹⁸Oba Joasch, de Kjennich von Israel, schekjt no Amazja, däm Kjennich von Juda, un leet am sajen: Daut Spekjastruck vom Libanon schekjt no däm Zeedaboom vom Libanon un leet am sajen: Jeff mienen Sän diene Dochta to Fru! Oba de wille Tieren vom Libanon randen äwa daut Spekjastruck un veklunjden daut.

¹⁹Du denkjst: kjikj mau, ekj hab de Edomita besiecht! Doawäajen deit sikj dien Hoat erhäwen, un du sieekjst noch mea Aunerkjanunk. Bliew doch Tus! Wuarom sieekjst du dien Ojjlekj, daut du toom Faul kjemst, un Juda met die toop?

²⁰Oba Amazja horcht nich no am, wiels Gott daut soo lenkjt, om an en Joasch, däm Kjennich von Israel, siene Jewault to jäwen, wiels see bie de Edomita äare Jetta Rot un Help jesocht hauden.

²¹Dan kjeem Joasch, de Kjennich von Israel toom Kaumf, un see mauten sikj met eenaunda, hee un Amazja, de Kjennich von Juda, bie Bet Schemesch, waut to Juda jehieet.

²²Oba Juda wort von Israel jeschloagen, un see randen utenaunda, jieda eena no sien Hus.

²³Joasch, Joahas sien Sän, de Kjennich von Israel, neem Amazja, däm Kjennich von Juda, dee een Sän von Joasch, däm Kjennich von Juda wia, bie Bet Schemesch faust un brocht am no Jerusalem. Hee reet de Mia von Jerusalem een Enj von 200 Meeta von daut Efraim Puat bat daut Akjpuat dol.

²⁴Un neem aul daut Golt un Selwa un aul daut wieetvolle Jereetschoft met, waut em Tempel unja Obed Edom siene Oppsecht wia, un soo uk daut Kaptol ut däm Kjennich sien Hus; un buta däm neem hee uk Menschen aus Jefangne met no Samaria.

²⁵Amazja, de Kjennich von Juda, äwaläwd Joasch, däm Kjennich von Israel, oba 15 Joa.

²⁶Waut noch mea von Amazja to berechten es, de ieeschte uk lotre Jeschichten, daut es em Buak von de Kjennichs von Juda un Israel jeschräwen.

²⁷Un von dee Tiet aun, aus Amazja sikj vom HARN wajchdreien deed, muaken see en Jerusalem eene Veschwierunk jäajen am. Hee flicht oba no Lachisch, oba see schekjten am uk Mana hinjaraun no Lachisch un leeten am doa ombrinjen.

²⁸Un see brochten am opp Pieed trigj un begrowden am bie siene Vodasch en de Davidstaut.