Read Plautdietsch (Low German) – De Bibel 2. Chronik 29 Bible Online

2. Chronik 29 - Plautdietsch (Low German) – De Bibel bible

2. Chronik 29

¹Hiskia wia 25 Joa oolt aus hee Kjennich wort; un hee rejieed 29 Joa en Jerusalem. Siene Mutta heet Abi, un wia Secharja siene Dochta.

²Hiskia deed, waut däm HARN jefoll, soo aus sien Staumvoda David.

³Hee muak en de 1. Moonat em 1. Joa en siene Rejierungstiet de Däaren aum Tempel wada op un leet dee en Ordnunk brinjen.

⁴Un hee roopt de Priesta un Leviten toop, un see vesaumelden sikj opp däm Plauz em Oosten,

⁵un hee säd to an: Horcht waut ekj saj, jie Mana vom Staum Levi! Moakt junt rein fa junen Deenst! Un doot däm HARN, june Vodasch äaren Gott sienen Tempel reinjen un enweien! Riemt doa aules rut, waut däm orrein jemoakt haft!

⁶Onse Vodasch sent däm HARN ontru jeworden un haben soont jedonen, waut am schlajcht jefoll. See haben däm HARN veloten un äa Jesecht von am un siene Woninj wajchjedreit un dän Rigjen hanjedreit.

⁷See haben soogoa de Däaren aun däm Väarum toojeschloten, de Laumpen utjemoakt un Israel äaren Gott en sienen Tempel kjeen Ruakopfa uk kjeen Brauntopfa mea jebrocht.

⁸Doawäajen es däm HARN sien Oaja äwa Juda un Jerusalem jekomen, un hee haft an doahan komen loten, daut see een aufschrakjendet Biespel jeworden sent. Daut es eene oppscheiselje Städ jeworden, wua äwa jespott woat, soo aus jie daut met june Uagen seenen kjennen.

⁹Un doawäajen sent onse Vodasch uk em Kjrich omjekomen, un onse Frues un Kjinja en de Jefangenschoft jeroden.

¹⁰Ekj hab nu em Senn, met däm HARN, Israel äaren Gott, eenen Bunt to schluten, en de Hopninj, daut hee sienen Oaja von ons trigjtrakjen woat.

¹¹Doot nu kjeene Tiet mea vesiemen, un got no june Oppgowen! Junt haft de HAR doch jewält, aus siene Deena ver am to stonen un am Opfa to brinjen!

¹²Dan muaken dise Leviten sikj opp: Von Kehat sien Nokomen: Mahat, Amasai sien Sän, un Joel, Asarja sien Sän; von Merari siene Nokomen: Kisch, Abdi sien Sän, un Asarja, Jehalelel sien Sän; von Gerschon siene Nokomen: Joach, Simma sien Sän, un Eden, Joach sien Sän;

¹³von Elizafan siene Nokomen: Schimri un Jeiel; von Asaf siene Nokomen: Secharja un Matanja;

¹⁴von Heman siene Nokomen: Jehiel un Schimi; von Jedutun siene Nokomen: Schemaja un Usiel.

¹⁵See vesaumelden äare Breeda un muaken sikj rein fa äaren Deenst, om dän HARN sienen Tempel to reinjen, soo aus de Kjennich daut no däm HARN sien Wuat aunjeordnet haud.

¹⁶De Priesta jinjen en daut Tempelhus nenn un brochten aul daut orreine, waut en däm HARN sienen Tempel jefungen wort, rut opp dän Väahoff, un de Leviten neemen un druagen daut ut de Staut rut nom Kidron Tol.

¹⁷Aum 1. Dach en de 1. Moonat fungen see met de Reinjunk aun, un aum 8. Dach en de selwje Moonat jinjen see en de väaschte Stow un deeden en acht Doag de väaschte Stow en däm HARN sien Hus rein moaken, un aum 16. Dach en de 1. Moonat hauden see daut foadich.

¹⁸Dan jinjen see no däm Kjennich Hiskia un säden: Wie haben dän gaunzen Tempel wada jereinicht, uk dän Brauntopfa Aultoa un aul daut Jereetschoft doatoo, dän Desch fa daut jeweide Broot un daut Jereetschoft waut doabie jehieet.

¹⁹Un aul daut Jereetschoft, waut de Kjennich Ahas en siene Rejierungstiet haud wajchschmieten loten, aus hee däm HARN ontru wort, daut hab wie wada oppjestalt un jereinicht. Daut es wada ver däm HARN sienen Aultoa.

²⁰Aum näakjsten Morjen roopt Hiskia de väaschte Mana ut de Staut no sikj un jinkj met an toop no däm HARN sien Hus.

²¹Un see brochten säwen junge Bolles, säwen Schopsbakj, säwen Lama un säwen Kosenbakj doahan toom Sindopfa fa daut Kjennichshus, fa daut Heilichtum un fa daut Volkj von Juda. Un de Kjennich säd to de Priesta, Aaron siene Nokomen, daut see opp däm HARN sienen Aultoa opfren sullen.

²²See deeden de Rinda doa schlachten, un de Priesta neemen daut Bloot un besprezten dän Aultoa; uk de Schopsbakj un de Lama deeden see schlachten un daut Bloot aun däm Aultoa spretzen.

²³Tolatst brochten see de Kosenbakj toom Sindopfa ver däm Kjennich un de gaunze Vesaumlunk un läden äare Henj opp dee äare Kjap.

²⁴Un de Priesta schlachten dee un sprezten dee äa Bloot aun dän Aultoa, om Israel to veseenen. Wiels de Kjennich haud aunjeordnet, fa gaunz Israel Brauntopfa un Sindopfa to brinjen.

²⁵Hee stald uk de Leviten met Zimbeln, Zitta un Hoapen biem Tempel opp, soo aus David daut väajesajcht haud, no däm Rot von däm Rotjäwa Gad un dän Profeet Natan, wiels daut wia een Wuat vom HARN derch de Profeeten.

²⁶Soo stalden de Leviten sikj opp met de Instrumenten, waut David haud moaken loten, un soo uk de Priesta met de Trompeeten.

²⁷Hiskia jeef de Aunordnunk, daut Brauntopfa opp dän Aultoa to brinjen. Un en dee Tiet, aus daut Brauntopfa aunfunk, fungen see uk aun to spälen met de Instrumenten von David, däm Kjennich von Israel. Un doabie lowden de Leviten däm HARN met äa Jesank, un de Priesta blosden met de Trompeeten.

²⁸Un de gaunze Vesaumlunk bäd däm HARN aun. De Leviten sungen un de Trompeeten blosden, soolang aus de Opfahaundlunk aunhilt.

²⁹Aus daut Opfa ieescht verecht wia, kjneeden de Kjennich un aul de aundre, dee bie am wieren, sikj noch eemol un bäden am aun.

³⁰Dan foddaden de Kjennich Hiskia un de väaschte Mana de Leviten opp, däm HARN to lowen met de Leeda waut David un de profeetische Sinja Asaf jedicht hauden. Un see lowden däm HARN met Freiden un bekjten sikj un bäden am aun.

³¹Dan dreid Hiskia sikj no daut vesaumelde Volkj un säd: Jie sent hia nich met ladje Henj ver däm HARN jekomen. Komt häa un brinjt june Schlachtopfa un Dankopfa nom Tempel! Un de Vesaumlunk brocht äare Opfa doahan, un wäa besondasch rikjlich jäwen wull, jeef uk noch Brauntopfa.

³²Un de Aunzol von de Brauntopfa, waut de Vesaumlunk brocht, wieren 70 Rinda, 100 Schopsbakj un 200 Lama; dit wieren aules Brauntopfa fa dän HARN.

³³Un de Aunzol von de aundre jeweide Opfatieren wieren: 600 Rinda un 3.000 Schop.

³⁴Aum Aunfank wieren doa goanich jenuach Priesta, om aule Tieren toom Brauntopfa auftoladren. Doawäajen holpen an äare Staumbreeda, de Leviten, bat de Oabeit verecht wia un sikj noch mea Priesta fa dän Deenst jereinicht hauden. Wiels de Leviten wieren welja jewast sikj to reinjen, aus de Priesta.

³⁵Buta däm wia de Somm von de Brauntopfa aun disen Dach besondasch groot, un de Priesta kjrieejen doatoo noch mea Oabeit met de Fatstekja von de Dankopfa un met de Drinkjopfa, waut to de Brauntopfa jehieeden. Met dit wort de räajelmäsja Gottesdeenst en däm HARN sien Tempel wada enjefieet.

³⁶Un Hiskia freid sikj met aul daut Volkj toop äwa daut, waut Gott daut Volkj jeschonken haud, wiels dit omwenjen haud väl bosja jegonen aus see jedocht hauden.