Read Plautdietsch (Low German) – De Bibel 2. Chronik 35 Bible Online

2. Chronik 35 - Plautdietsch (Low German) – De Bibel bible

2. Chronik 35

¹Josia fieed en Jerusalem däm HARN to ieren daut Passafast. Aum 14. Dach en de 1. Moonat worden de Passalama jeschlacht.

²Josia bestald de Priesta to äaren Deenst un muak an Moot äare Oppgowen em Tempel to verechten.

³Un to de Leviten, dee gaunz Israel em Jesaz to unjarechten hauden un to däm Deenst fa däm HARN jeweit wieren, säd Josia: Jie brucken de Bundeskjist nich mea opp june Schulren droagen, wiels dee haft äaren fausten Plauz em Tempel jefungen, dän Salomo, David sien Sän un Kjennich von Israel, jebut haft. Doawäajen sell jie däm HARN, junen Gott, un sien Volkj Israel hia em Tempel deenen.

⁴Moakt junt no june Volkjsgruppen en Deenstgruppen reed, soo aus de Kjennich David un sien Sän Salomo daut schreftlich faustjelajcht haben.

⁵Jieda Deenstgrupp von de Leviten saul fa eene jewesse Zol von Famieljes ut daut Volkj em Heilichtum reedstonen.

⁶Doot junt toom Deenst reinjen un schlacht fa june Breeda ut daut Volkj de Passalama un doot dee broden, om daut aules soo jedonen woat, aus de HAR daut derch Moses aunjeordnet haft!

⁷Josia jeef aus Opfagow fa daut Volkj toom Passafast 30.000 junge Schopsbakj un Kosenbakj un 3.000 Rinda. Aules von sien Hab un Goot.

⁸Siene hechste Rejierungs Beaumten jeewen uk friewelje Opfagowen fa daut Volkj un fa de Priesta un Leviten. Hilkija, Secharja un Jehiel, de väaschte Priesta em Tempel, jeewen de aundre Priesta toom Passafast 2.600 Schop un Kosen, un 300 Rinda.

⁹Un soo muaken de väaschte Leviten daut uk, Konanja un siene Breeda Schemaja un Netanel, un uk Haschabja, Jeiel un Josabad: See jeewen de aundre Leviten 5.000 Schop un Kosen un uk noch 500 Rinda toom Passaopfa.

¹⁰De Deenst wort soo jeordnet: De Priesta stalden sikj opp äare Plaza, un de Leviten stalden sikj en äare Deenstgruppen opp, soo aus de Kjennich daut aunjeordnet haud.

¹¹De Leviten schlachten de Passalama, un de Priesta neemen daut Bloot ut de Leviten äare Henj un besprezten däm Aultoa doamet. Un dan deeden de Leviten de Lama aufladren.

¹²De Deelen, waut toom Brauntopfa bestemt wieren, läden see fa de eenselne Famielje Gruppen oppoat, om daut de Priesta dee opp däm HARN sienen Aultoa vebrennen kunnen, soo aus daut em Jesaz Moses väajeschräwen steit. Un soo deeden see daut uk met de Rinda.

¹³De Leviten deeden de Passalama aum Fia broden, soo aus daut väajeschräwen es. Oba de Deelen von de Rinda, waut to de Opfa Moltieden bestemt wieren, koakten see en Gropes, Kjätels un Kommen un vedeelden dee soo bosich aus see kunnen aun aul daut Volkj.

¹⁴Un dan muaken see uk fa sikj selfst daut Passamol reed un fa de Priesta, Aaron siene Nokomen, wiels dee hauden bat enne Nacht nenn to schaufen, om aule Brauntopfa un de Fatstekja to vebrennen.

¹⁵De Grupp waut sinjen deed, Asaf siene Nokomen, stunden de gaunze Tiet opp äaren Plauz, soo aus David un siene profeetische Rotjäwasch Asaf, Heman un Jedutun daut bestemt hauden. Uk de Puatenwajchta bleewen bie jieda Puat. See brukten nich von äaren Deenst wajchgonen, wiels äare Breeda, de Leviten, uk fa an daut Passamol reedmuaken.

¹⁶Soo wort aun däm Dach de gaunza Gottesdeenst jeordnet, om daut Passafast to fieren un opp däm HARN sienen Aultoa Brauntopfa to brinjen, soo aus de Kjennich Josia daut aunjeordnet haud.

¹⁷De Israeliten, waut sikj vesaumeld hauden, fieeden en dee Tiet daut Passafast un uk säwen Doag lank daut Fast met daut onjesuade Broot.

¹⁸Soon Passafast aus dit haud daut en Israel aul von däm Profeet Samuel siene Tiet nich mea jejäft. Kjeen Kjennich en Israel haud en soone Form daut Passafast jefieet, aus Josia daut deed, met aulem toop, met de Priesta, de Leviten, met de gaunze Vesaumlunk ut Juda un Israel, un de Enwona von Jerusalem.

¹⁹Dit Passafast wort en Josia sien 18. Rejierungsjoa jefieet.

²⁰No däm aus Josia däm HARN sienen Tempel wada en Ordnunk jebrocht haud, kjeem Necho, de Kjennich von Ägipten met siene Truppen opp, om bie Karkemisch aum Eufrat eenen Kjrich derchtofieren. Un Josia jinkj am entjäajen.

²¹Necho oba schekjt Bootschofta no am un leet am sajen: Waut hab ekj met die to doonen, du Kjennich von Juda? Ekj kom nu nich jäajen die, ekj kom jäajen daut Kjennichrikj, wuamet ekj Kjrich hab. Gott haft jesajcht, daut ekj mie spooden saul. Stal die nich jäajen Gott, dee mie biesteit, daut hee die nich venichten deit!

²²Josia oba horcht nich no de Wieed, wuaderch Gott am woarnen wull, un trock sikj nich von Necho trigj. Hee deed sikj oba vekjleeden om jäajen am to kjamfen. Un opp daut jlikje Flekj von Megiddo kjeem daut dan toom Kaumf.

²³Un doabie wort de Kjennich Josia von de ägiptische Flizboagen Scheetasch aunjeschoten, un hee säd to siene Mana: Brinjt mie hia wajch; ekj sie schwoa vewunt!

²⁴Siene Mana neemen am dan von sienen Woagen rauf, un saden am opp eenen von siene aundre Woages un brochten am trigj no Jerusalem. Doa storf hee un wort bie siene Vodasch äare Jräwa begroft. Un gaunz Juda un Jerusalem truaden äwa Josia.

²⁵De Profeet Jeremia dicht een Kloagleet äwa Josia. Un von doa aun woat de Kjennich von aule Sinja, von Mana un Frues, en äare Kloagleeda besungen; un daut wort en Israel to eene fauste Mood. Dise Leeda stonen em Buak von de Kloagleeda jeschräwen.

²⁶Waut noch mea äwa Josia to berechten jeft, äwa siene goode Woakjen, wuamet hee daut bewees daut hee däm HARN sien Jesaz tru wia,

²⁷un siene Jeschicht von Aunfank bat Enj, daut steit em Buak von de Kjennichs von Israel un Juda jeschräwen.