Read Plautdietsch (Low German) – De Bibel 2. Chronik 4 Bible Online

2. Chronik 4 - Plautdietsch (Low German) – De Bibel bible

2. Chronik 4

¹Salomo leet uk eenen bronsnen Aultoa moaken, waut tieen Meeta lank, uk tieen Meeta breet, un fief Meeta huach wia.

²Hee leet uk eenen runden bronsnen Wotatank jeeten, woonen see daut Mäa nanden, waut eenen Derchmäta von fief Meeta haud, un 2,50 Meeta huach wia, un runtom maut dee 15 Meeta.

³Un unja däm wieren Jestaulten von Rinda, dee runtom rieekjten, emma tieen Rinda opp een Meeta, dee en twee Rieejen met däm Tank toop jegoten wieren.

⁴Dit bronsne Mäa stunt opp twalf Rinda, von dee dree nom Nuaden jedreit wieren, dree nom Wasten, dree nom Sieden un dree nom Oosten, un äare Hinjadeelen wieren aula no bennen jedreit; un daut Mäa stunt doa bowen.

⁵De Waunt von däm Tank wia soo dikj aus eene Haunt breet, un de Raunt wia soo no buten jeboagen aus bie een Kuffel ooda bie eene opne Bloom, un doa kunnen 3.000 Ama Wota nenn.

⁶Buta däm leet Salomo tieen bronsne Kjätels moaken, wuavon hee fief aun de rajchte Sied un fief aun de linkje Sied von daut Mäa oppstald. Doabennen wort aules aufjespeelt, waut von de Opfa Tieren opp däm Aultoa vebrent woaren sull. Daut Wota en daut Mäa oba wia bloos fa de Priesta toom wauschen bestemt.

⁷Salomo leet uk tieen goldne Laumpenhoolasch jeneiw no de Väaschreft moaken un stald dee en de meddelste Stow vom Tempel nenn. Doavon worden fief aun de rajchte Sied un fief aun de linkje Sied oppjestalt.

⁸Hee leet uk tieen Deschen moaken un dort oppstalen, uk fief aun de rajchte Sied un fief aun de linkje Sied. Buta däm leet hee tieen goldne Opfa Kommen moaken.

⁹Hee muak uk eenen Väahoff, waut fa de Priesta bestemt wia, un dän grooten butaschten Väahoff. Un en däm Väahoff leet hee Puaten moaken un dee met Brons betrakjen.

¹⁰Un aun de rajchte Sied vom Engank biem Tempel, aun de siedoostne Akj von daut Jebied, wort daut Mäa oppjestalt.

¹¹Un Hiram muak de Tap, de Scheflen un Opfa Kommen. Un hee muak de Oabeit foadich, waut hee fa däm Kjennich Salomo aun daut Gotteshus deed.

¹²Hee muak de twee Past met de runde Bauls bowen opp beid Past un de jeflochtne Nats, om de runde Bauls bowen oppe Past to bedakjen,

¹³un de 400 Granatapel muak hee aun beid Nats, aun jieda Nat 2 Rieejen von Granatapel, om de runde Bauls to bedakjen, waut bowen opp de Past wieren.

¹⁴Hee muak uk de foaboare Jestalen un de Kjätels toom doa nopp,

¹⁵un daut Mäa un de twalf Rinda doa unja;

¹⁶de Tap, de Scheflen un Gauflen un aul daut Jereetschoft, waut doatoo jehieed fa däm HARN sien Hus, muak Hiram däm Kjennich Salomo von glautjemoaktet Brons.

¹⁷Em Jordantol en de Jeetarie von Adama, tweschen Sukkot un Zereda, leet de Kjennich daut jeeten.

¹⁸Un Salomo leet von aul dit Jereetschoft sea väl moaken, soo daut daut Brons Jewicht nich fausttostalen wia.

¹⁹Salomo leet aul daut heilje Jereetschoft fa dän HARN sienen Tempel moaken, dän goldnen Aultoa un de Deschen fa daut jeweide Broot,

²⁰de Laumpenhoolasch met äare Laumpen von reinet Golt, daut see no de Väaschreften no ver däm hinjaschten Rum aunjestekjt worden.

²¹Un de Bloomen, de Laumpen un de Scheeren, toom de Dochten beschnieden, wieren aula von Golt.

²²Uk de Massasch, Kommen, Läpels un Paunen wieren von reinet Golt. Un de Däaren to daut Aulaheilichste un de Däaren bie de Enjenj vom Tempel wieren von Golt.