Read Plautdietsch (Low German) – De Bibel Esra 3 Bible Online

Esra 3 - Plautdietsch (Low German) – De Bibel bible

Esra 3

¹Aus de Israeliten wada en äare Städa wonden un de säwende Moonat kjeem, vesaumeld sikj daut gaunze Volkj en Jerusalem.

²Un dan muaken sikj opp Jeschua, Jozadak sien Sän, un siene Breeda, de Priesta, un Serubabel, Schealtiel sien Sän, un siene Breeda, un buden Israel äaren Gott sienen Aultoa wada opp, om doabowen Brauntopfa to opfren, soo aus daut em Jesaz Moses, däm Gottesmaun, jeschräwen steit.

³Un see rechten dän Aultoa opp de selwje Städ wada opp, wua dee verhäa jewast wia, uk wan de Velkja em Launt an doavon trigjschrakjen wullen, un opfaden däm HARN Brauntopfa doabowen aum Morjen uk aum Owent.

⁴Un see fieeden uk daut Loofboodenfast, soo aus daut väajeschräwen steit, un brochten aul dee säwen Doag sooväl Tieren aus Brauntopfa, aus fa jieda Dach väajeschräwen wieren.

⁵Un von don aun worden uk de däachliche Brauntopfa wada jieda Morjen un jieda Owent jebrocht, uk de Opfa aum Niemon un däm HARN siene aundre Heljedoag, un uk waut däm HARN friewellich jebrocht wort.

⁶Aum 1. Dach en de 7. Moonat fungen see aun, däm HARN Brauntopfa to brinjen. Oba daut Fundament fa dän HARN sien Tempel wia noch nich jelajcht.

⁷Un see jeewen Jelt fa de Steenhakasch un Buoabeida, un Äten, Jedrenkjen un Eelj fa de Lied von Sidon un Tierus, om daut dee Zeedaholt vom Libanon nom See un dan bat Jafo brochten, soo aus Kierus, de Kjennich von Persien, daut friejejäft haud.

⁸En de 2. Moonat em 2. Joa no äa trigjkomen nom Gotteshus en Jerusalem, wort de Oabeit aun däm HARN sien Hus aunjefongen. Serubabel, Schealtiel sien Sän, un Jeschua, Jozadak sien Sän, un de äwaje von äare Breeda, de Priesta un Leviten, un aul dee, dee ut de Jefangenschoft no Jerusalem jekomen wieren, stalden de Leviten von 20 Joa un doaräwa aun daut see de Oppsecht äwa de Oabeit hauden.

⁹Un Jeschua met siene Säns un siene Breeda Kadmiel, Binnui un Hodawja, jinjen jemeensom loos, om de Oabeida aum Gotteshus auntoleiden, un doatoo noch de Leviten, de Nokomen von Henadad, met äare Säns un Breeda.

¹⁰Un aus de Buoabeida daut Fundament fa däm HARN sienen Tempel läden, stalden de Priesta sikj en äare Priestakjleeda opp met Trompeeten un de Leviten, Asaf siene Nokomen, met Zimbeln, om dän HARN to lowen no de Ordnunk von David, dän Kjennich en Israel.

¹¹Un see deeden en een Wakjseljesank Gott lowen un danken: De HAR es ons toojedonen; un sien erboarmen blift fa emma äwa Israel! Un daut gaunze Volkj lowd däm HARN met ludet juchen, wiels daut Fundament fa daut Gotteshus jelajcht wia.

¹²Un väle von de elre Priesta, Leviten un Leida von de Volkjsgruppen, dee dän ieeschten Tempel noch jeseenen hauden, hielden lud, aus see daut sagen, daut daut Fundament fa dän nieen Tempel jelajcht wort. Väle oba freiden sikj un juchten, soo daut daut Jeschrech lud schauld.

¹³Un daut frooe Jeschrech un daut lude Jehiel mank daut Volkj jinkj nich to unjascheeden, wiels daut Volkj lud jucht, soo daut eena dän Schaul von wiet auf hieed.