Read Plautdietsch (Low German) – De Bibel Esra 6 Bible Online

Esra 6 - Plautdietsch (Low German) – De Bibel bible

Esra 6

¹Dan säd de Kjennich Darius, daut en de Schauz Hiesa en Babel, wua de Bieekja oppbewoat worden, sull doano jesocht woaren.

²Un doa wort en de stoakj vesechade Städ Achmeta, waut en Medien licht, eene Schreftroll jefungen, wua dis Berecht jeschräwen stunt:

³En daut ieeschte Joa von Kjennich Kierus jeef de Kjennich Kierus Aunordnunk, daut Gotteshus en Jerusalem wada opptobuen to eene Städ, wua see Opfa brinjen kjennen. Un daut Fundament saul wada jelajcht woaren. De Hecht saul 30 Meeta sennen, un de Breed saul uk 30 Meeta sennen.

⁴Un opp dree Schicht behakte Steena saul eene Schicht Baulkjes komen. Un de kosten sellen von de Rejierungskaus jejäft woaren.

⁵Un daut goldne un selwane Jereetschoft, waut Nebukadnezar ut däm Tempel en Jerusalem jenomen un no Babel jebrocht haud, saul trigjejäft woaren, om daut dee wada no äaren Plauz em Gotteshus en Jerusalem komen.

⁶Nu hoolt junt von dise Sach wajch, du, Tatenai, aus Vewaulta äwa de Prowins aun jantsied Eufrat, un Schetar Bosnai met june Metoabeida, jie Aumtslied, waut aun jantsied Eufrat sent!

⁷Lot dee aun daut Gotteshus oabeiden, om daut de Juden äa Vewaulta un äare Leida daut Gotteshus opp de oole Städ wada oppbuen.

⁸Un buta däm lot ekj junt sajen, waut jie de Juden äare Leida jäwen sellen, om daut Gotteshus to buen. Doa saul von däm Kjennich sien Enkomen, waut von de Jäajent aun jantsied Eufrat enkjemt, pinkjlich jenomen un de Lied jejäft woaren, waut see toom buen brucken.

⁹Uk aules waut see aun Brauntopfa brucken fa dän Gott em Himmel, Bolles, Schopsbakj un Lama, uk Weit, Solt, Wien un Eelj, saul de Priesta en Jerusalem pinkjlich jieda Dach jejäft woaren. Un daut saul uk nich veschloft woaren, daut to leewren,

¹⁰om daut see däm Gott em Himmel Opfa brinjen, wua hee jefaulen aun finjt. Un see sellen doabie fa dän Kjennich un siene Säns äa Läwen bäden.

¹¹Wieda woat von mie aunjeordnet: Wan irjent wäa dise Aunordnunk äwaträden deit, dan saul een Baulkjen ut sien Hus rutjeräten un hee selfst aun dän oppjerechten Baulkjen aunjenoagelt woaren. Un sien Hus saul to een Auschklompen jemoakt woaren wäajen waut hee deed.

¹²Dee Gott oba, dee sienen Nomen dort wonen lat, venicht jieda Kjennich un jieda Volkj, dee vesieekjen woaren, dise Aunordnunk to äwaträden un daut Gotteshus en Jerusalem to vestieren. Ekj, Darius, hab dise Aunordnunk jejäft, om daut dee jeneiw utjefieet woat.

¹³Dan haundelden Tatenai, de persischa Vewaulta von de wastne Sied Eufrat, un Schetar Bosnai un äare Metoabeida jeneiw no daut, waut de Kjennich Darius an jesajcht haud.

¹⁴Un de Juden äare Leida buden, un daut jinkj bosich väarewajch wiels de Profeeten Hagai un Sacharja, Ido sien Sän, an em Nomen Gottes Moot muaken met äa profezeien. Un see buden un muaken daut foadich no daut Wuat von Israel äaren Gott un no de Aunordnungen von de persische Kjennichs Kierus, Darius un Artahsasta.

¹⁵Un de Tempelbu wort foadich aum 3. Dach en de Moonat Adar em 6. Rejierungsjoa von Kjennich Darius.

¹⁶Un aule Israeliten, de Priesta, de Leviten un de aundre, waut ut de Jefangenschoft trigjekomen wieren, weiden met freiden dän Tempel en.

¹⁷Bie de Tempel Enweiunk opfaden see 100 Bolles, 200 Schopsbakj un 400 Lama, un aus Sindopfa fa gaunz Israel twalf Kosenbakj, fa jieda Staum eenen.

¹⁸See stalden uk de Priesta no äare Deenstgruppen opp un de Leviten no äare Aufdeelungen toom Deenst aum Gotteshus en Jerusalem, soo aus daut em Jesaz Moses jeschräwen steit.

¹⁹Un aum 14. Dach en de 1. Moonat fieeden dee, dee ut de Jefangenschoft trigjekomen wieren, daut Passafast.

²⁰Von de Priesta un Leviten hauden sikj aule Mana jereinicht, soo daut see aula rein wieren, un de Leviten schlachten de Passalama fa aul dee, dee ut de Jefangenschoft trigjekomen wieren, un uk fa äare Breeda, de Priesta, un fa sikj selfst.

²¹Un nich bloos de trigjekomne Israeliten eeten daut Passamol, uk aul dee, dee sikj von de Enwona, waut em Launt wonden, äare Onreinheit wajchjedreit hauden, om Israel äaren Gott to sieekjen.

²²Un see fieeden daut met onjesuadet Broot säwen Doag lank un freiden sikj doabie. De HAR haud an froo jemoakt un däm Kjennich von Assur sien Hoat opp äare Sied jedreit. Soo haud de Gott en Israel an jestoakjt to de Oabeit aum Gotteshus.