Read Plautdietsch (Low German) – De Bibel Esra 7 Bible Online

Esra 7 - Plautdietsch (Low German) – De Bibel bible

Esra 7

¹En de Rejierungstiet von Artahsasta, däm Kjennich en Persien, neem sikj daut soo rom, daut Esra trigj no Jerusalem trock. Esra wia Seraja sien Sän, Seraja wia Asarja sien Sän, Asarja wia Hilkija sien Sän,

²Hilkija wia Schalum sien Sän, Schalum wia Zadok sien Sän, Zadok wia Ahitub sien Sän,

³Ahitub wia Amarja sien Sän, Amarja wia Asarja sien Sän, Asarja wia Merajot sien Sän,

⁴Merajot wia Serachja sien Sän, Serachja wia Usi sien Sän, Usi wia Bukki sien Sän,

⁵Bukki wia Abischua sien Sän, Abischua wia Pinhas sien Sän, Pinhas wia Eleasar sien Sän, un Eleasar wia däm Huagenpriesta Aaron sien Sän.

⁶Dis Esra trock von Babel trigj häa. Hee wia een Schreftjelieeda, dee daut Jesaz Moses kjand, waut de HAR, Israel äa Gott, jejäft haud. Un wiels däm HARN, sienen Gott siene Haunt äwa am wia, jeef de Kjennich am aules, wua hee no froagen deed.

⁷Un met am trock noch eene Grupp von de Israeliten un von de Priesta un Leviten, von de Sinja, Puatenwajchta un Tempeldeena met no Jerusalem. Un dit wia en däm Kjennich Artahsasta sien säwendet Rejierungsjoa.

⁸Un hee kjeem en de 5. Moonat en däm Kjennich sien 7. Rejierungsjoa no Jerusalem.

⁹Aum 1. Dach en de 1. Moonat haud hee beschloten, von Babel wajchtotrakjen, un aum 1. Dach en de 5. Moonat kjeem hee en Jerusalem aun, wiels Gott am met siene jnädje Haunt beschizt haud.

¹⁰Esra deed en sien Hoat doano trachten, däm HARN sien Jesaz vestonen to lieren un doano to läwen un de Israeliten de Jebooten un Rajchten to lieren.

¹¹Un dit es de Aufschreft von däm Breef, dän de Kjennich Artahsasta, Esra däm Priesta un Schreftjelieeden jeef, dee doa bekaunt wia met de Wieed von däm HARN siene Jebooten un Väaschreften fa Israel:

¹²Artahsasta, de Kjennich äwa aule Kjennichs, aun Esra, dän Priesta un aunjestalden fa daut Jesaz von däm Gott em Himmel: Fräd toieescht!

¹³Un von mie es aunjeordnet worden, daut aul dee, dee von daut Volkj Israel un de Priesta un Leviten ut mien Rikj wellens sent, no Jerusalem to trakjen, met die toop trakjen kjennen.

¹⁴Wiels du best vom Kjennich un siene säwen Rotjäwasch jeschekjt, om to unjasieekjen woo daut en Juda un Jerusalem steit, auf daut doa uk no dienen Gott sien Jesaz jeit, waut du en diene Haunt hast.

¹⁵Buta däm saust du daut Selwa un Golt doahan brinjen, waut de Kjennich un siene Rotjäwasch aus friewelje Gowen däm Gott en Israel jäwen, dee siene Woninj en Jerusalem haft.

¹⁶Nemm uk aul daut Selwa un Golt, waut du en de Jäajent von Babel jeschonken kjrichst met de Gowen toop, waut daut Volkj un de Priesta friewellich fa daut Gotteshus en Jerusalem jäwen.

¹⁷Nemm daut aula un kjeep fa daut Selwa un Golt jewessenhauft Bolles, Schopsbakj un Lama un de doatoo jehierende Ätesopfa un Drinkjopfa, om daut see dee opfren opp däm Aultoa ver junen Gott sienen Tempel en Jerusalem.

¹⁸Un waut die un diene Breeda met daut äwaje Jelt jefelt to doonen, daut doot no junen Gott sienen Wellen.

¹⁹Un daut Jereetschoft, waut die jejäft es fa dän Deenst em Hus von dienen Gott, daut leewa ver daut Gotteshus en Jerusalem auf.

²⁰Uk waut du sest noch fa dienen Gott sien Hus utjäwen motst, daut kjrichst du ut däm Kjennich siene Schauz Hiesa.

²¹Ekj, Kjennich Artahsasta, hab aule Schauz Vewaultasch aun jantsied Eufrat weeten loten: Aules, waut Esra, de Priesta un Schreftjelieeda fa daut Jesaz von däm Gott em Himmel, von junt foddat, jewessenhauft to leewren:

²²Bat 100 Zentna Selwa, bat 100 Sakj Weit, bat 100 Ama Wien un 100 Ama Olieweneelj, un Solt, sooväl aus hee brukt.

²³Daut, waut Gott em Himmel die beoppdroacht haft to daut Hus von däm Gott em Himmel to jäwen, daut jeff met eene hanjäwende Enstalunk, om daut sien Oaja nich äwa daut Kjennichrikj, däm Kjennich un siene Säns kjemt.

²⁴Un junt es daut weetenjeloten, daut jie nich daut rajcht haben, Taks, Aufgowen ooda Zoll to fodren von irjent eenen Priesta, Levit, Sinja, Puatenwajchta ooda Tempeldeena, von aul dee, dee en disen Gott sien Hus Deensten doonen.

²⁵Du oba, Esra, doo no dienen Gott siene Weisheit, waut en diene Haunt es, Rechta un Rajchts Liera aunstalen, waut jun gaunzet Volkj rechtalich bedeenen, waut aun jantsied Eufrat wont, dee waut dienen Gott sien Jesaz kjanen. Un dee waut daut nich kjanen, dee sell jie daut lieren.

²⁶Oba jieda eena, dee nich jewessenhauft daut Jesaz von dienen Gott un daut Jesaz vom Kjennich helt, dee saul ver daut Jerecht jestalt un veuadeelt woaren, entwäda met de Doodesstrof, met eenen Utschluss ut de Jesalschoft, met eene Jeltstrof, ooda Jefenkjnisstrof.

²⁷Jeloft best du HAR, onse Vodasch äa Gott, dee däm Kjennich soont enjejäft haft, daut hee däm HARN sienen Tempel en Jerusalem soon grootet aunseenen veschauft,

²⁸un dee mie de Gonst von däm Kjennich un siene Rotjäwasch un aule aunjeseene Aumtslied haft tookomen loten! Un ekj kjrieech Moot, wiels de HAR, mien Gott, hilt siene Haunt äwa mie, un ekj saumeld de Leida von de Volkjsgruppen, daut see met mie toop trigjtrocken.