Read Plautdietsch (Low German) – De Bibel Nehemia 10 Bible Online

Nehemia 10 - Plautdietsch (Low German) – De Bibel bible

Nehemia 10

¹Doawäajen well wie een faustet Äwareenkomen moaken, un daut oppschriewen, un onse Leida, Leviten un Priesta sellen daut stamplen un unjaschriewen.

²Un daut wieren: De Vewaulta Nehemia, Hachalja sien Sän, un Zidkija,

³Seraja, Asarja Jirmeja,

⁴Paschhur, Amarja, Malkija,

⁵Hatusch, Schebanja, Maluch

⁶Harim, Meremot, Obadja,

⁷Daniel, Ginneton, Baruch,

⁸Meschullam, Abija, Mijamin,

⁹Maasja, Bilga un Schemaja; daut sent de Priesta.

¹⁰De Leviten oba sent: Jeschua, Asanja sien Sän, Binnui von Henadad siene Grupp, un uk Kadmiel,

¹¹un von äare Breeda: Schechanja, Hodija, Kelita, Pelaja, Hanan,

¹²Micha, Rehob, Haschabja,

¹³Sakur, Scherebja, Schebanja,

¹⁴Hodija, Bani un Beninu.

¹⁵De väaschte Mana vom Volkj sent: Parosch, Pahat Moab, Elam, Satu, Bani,

¹⁶Bunni, Asgad, Bebai,

¹⁷Adonija, Bigwai, Adin,

¹⁸Ater, Hiskija, Assur,

¹⁹Hodija, Haschum, Bezai,

²⁰Harif, Anatot, Nebai,

²¹Magpiasch, Meschullam, Hesir,

²²Meschesabel, Zadok, Jadua,

²³Pelatja, Hanan, Anaja,

²⁴Hoschea, Hananja, Haschub,

²⁵Lohesch, Pilha, Schobek,

²⁶Rehum, Haschabna, Maaseja,

²⁷Ahija, Hanan, Anan,

²⁸Maluch, Harim un Baana.

²⁹Un daut äwaje Volkj, de Priesta, Leviten, Puatenwajchta, Sinja, Tempeldeena, un aul dee, dee sikj von de Velkja en de Lenda aufjesondat haben un sikj aun daut Jesaz Gottes hoolen, met äare Frues, Säns un Dajchta toop, un aul dee, dee daut vestonen kunnen,

³⁰dee sullen sikj äare Breeda, de väaschte Mana mank an, aunschluten un en daut Äwareenkomen nenträden un sikj met eenen Eit veflichten, no daut Jesaz Gottes to läwen, waut derch Moses, Gott sienen Deena, jejäft es. Un aule Jebooten, Rajchten un Väaschreften vom HARN, onsen Kjennich, to hoolen un doano to haundlen.

³¹Wie wellen onse Dajchta nich de Velkja em Launt jäwen un äare Dajchta nich fa onse Säns nämen.

³²Wie wellen von de Velkja em Launt aum Sabat un aun de Heljedoag kjeene Woa ooda aulahaunt Jeträajd kjeepen, wan see dit aum Sabat toom vekjeepen brinjen; wie wellen de Aufgowen von de Arnt en jieda säwendet Joa un daut Schulden betolen nich fodren.

³³Wie wellen ons daut Jeboot opplajen, aule Joa daut dredde Deel von een Selwastekj toom Deenst en onsen Gott sienen Tempel to jäwen:

³⁴Fa daut jeweide Broot, fa daut däachelje Ätesopfa, fa daut däachelje Brauntopfa, fa de Opfa aum Sabat un aum Niemon, fa de Fastdoag, fa de heilje Gowen un fa daut Sindopfa, wuamet Israel veseent woat, un fa aule Oabeit en onsen Gott sienen Tempel.

³⁵Met de Priesta un Leviten toop well wie jieda Joa lossen, woone Gruppen no de Rieej daut Brenholt fa dän Tempel leewren sellen. Doa saul jieda Tiet em Joa Holt sennen toom de Opfa opp däm HARN, onsen Gott, sienen Aultoa to vebrennen, soo aus daut em Jesaz jeschräwen steit.

³⁶De ieeschte Frucht von onse Goades un de ieeschte Frucht von aul onse Beem well wie no däm HARN sienen Tempel brinjen.

³⁷De Ieeschtjeburten von onse Säns un ons Vee, soo aus daut em Jesaz jeschräwen steit, un de Ieeschtjeburten von onse Rinda un onse Schop well wie no onsen Gott sienen Tempel no de Priesta brinjen, dee en onsen Gott sienen Tempel deenen.

³⁸Wie wellen dän Brootdieech, waut wie von daut ieeschte Jeträajd moaken, un daut ieeschte von de Frucht von aule Beem, dän ieeschten Wien un de ieeschte Eelj fa de Priesta en de Stowen aun onsen Gott sienen Tempel brinjen. Un dän tieenden Deel von de Ennom vom Launt well wie de Leviten jäwen; dee sellen opp aule Städen dän tieenden Deel von daut Akalaunt ensaumlen.

³⁹Un een Priesta, eena von Aaron siene Säns, saul bie de Leviten sennen, wan dee dän Tieenden ensaumlen, un de Leviten sellen von däm Tieenden daut tieende Poat en de Stowen von daut Väarotshus aun Gott sienen Tempel nenbrinjen.

⁴⁰De Israeliten un de Leviten sellen de Aufgowen von Jeträajd, Wien un Eelj en de Stowen nenbrinjen. Doa es daut heilje Jereetschoft un doa sent de Priesta, waut em Deenst sent, un de Puatenwajchta un Sinja. Wie wellen daut en onsen HARN sienen Tempel aun nuscht fälen loten.