Read Plautdietsch (Low German) – De Bibel Nehemia 11 Bible Online

Nehemia 11 - Plautdietsch (Low German) – De Bibel bible

Nehemia 11

¹De väaschte Lied vom Volkj wonden aul en Jerusalem. Oba daut äwaje Volkj deed lossen, wäa von jieda tieende Famielje, no de heilje Staut Jerusalem trakjen sull, om doa to wonen. De aundre näajen Famieljes kunnen en äare Städa un Darpa bliewen.

²Un daut Volkj säajend aule Mana, dee friewellich no Jerusalem trocken.

³Dit sent de väaschte Mana von de Launtschoft Juda, waut en Jerusalem wonen; oba en de Städa von Juda wonden see, een jiedra opp sien Oafgoot: De Israeliten, Priesta, Leviten, Tempeldeena un de Nokomen von Salomo siene Deena.

⁴En Jerusalem wonden eenje vom Staum Juda un eenje vom Staum Benjamin. Von Juda siene Nokomen: Ataja, Usija sien Sän, Usija wia Secharja sien Sän, Secharja wia Amarja sien Sän, Amarja wia Schefatja sien Sän, Schefatja wia Mahalalel sien Sän, un Mahalalel wia eena von Perez siene Nokomen.

⁵Un Maaseja, Baruch sien Sän, un Baruch wia Kolhose sien Sän, Kolhose wia Hasaja sien Sän, Hasaja, wia Adaja sien Sän, Adaja wia Jojarib sien Sän, Jojarib wia Secharja sien Sän, un Secharja staumd von Juda sienen Sän Schela auf.

⁶De Nokomen von Perez, waut en Jerusalem wonden, wieren aules toop 468 kjrichsfäje Mana.

⁷Vom Staum Benjamin wia: Salu, Meschullam sien Sän, un Meschullam wia Joed sien Sän, Joed wia Pedaja sien Sän, Pedaja wia Kolaja sien Sän, Kolaja wia Maaseja sien Sän, Maaseja wia Itiel sien Sän, un Itiel wia Jeschaja sien Sän.

⁸Un dan noch siene Breeda Gabai un Salai. Aules toop wieren see 928.

⁹Un Joel, Sichri sien Sän, wia äa Leida, un Juda, Senua sien Sän, wia aus tweeda äwa de Staut aunjestalt.

¹⁰Von de Priesta wieren: Jedaja, Jojarib, Jachin,

¹¹Seraja, Hilkija sien Sän, Meschullam sien Grootsän. Meschullam wia Zadok sien Sän, Zadok wia Merajot sien Sän, un Merajot wia Ahitub sien Sän, de väaschta em Gotteshus,

¹²un siene Breeda, waut em Tempel deenden wieren 822; Adaja, Jeroham sien Sän, dee Pelalja sien Sän wia, Pelalja wia Amzi sien Sän, Amzi wia Secharja sien Sän, Secharja wia Paschhur sien Sän, un Paschhur wia Malkija sien Sän.

¹³Un met siene Staumbreeda toop, wieren see 242 Gruppenleida. Un Amaschsai, Asarel sien Sän, un Asarel wia Achsai sien Sän, Achsai wia Meschillemot sien Sän, un Meschillemot wia Immer sien Sän.

¹⁴Un met äare Breeda toop, wieren see 128 stoakje Kjrieja; un äa väaschta wia Sabdiel, Hagedolim sien Sän.

¹⁵Von de Leviten wia: Schemaja, Haschub sien Sän, un Haschub wia Asrikam sien Sän, Asrikam wia Haschabja sien Sän, un Haschabja wia Bunni sien Sän.

¹⁶Un Schabetai un Josabad, de Gruppenleida von de Leviten, wieren veauntwuatlich fa dän butaschten Deenst aum Tempel.

¹⁷Un Matanja, Micha sien Sän, dee Sabdi sien Sän wia, un Sabdi wia Asaf sien Sän, dee haud biem Jebäd un biem Dankleeda sinjen auntostemmen. Un de tweeda von siene Breeda en disen Deenst wia Bakbukja, un Abda, Schamua sien Sän un Galal sien Grootsän, een Nokomen von Jedutun.

¹⁸Aules toop wonden doa 284 Leviten en de heilje Staut.

¹⁹De Puatenwajchta: Akub un Talmon un äare Breeda, waut de Puaten bewoaken deeden, wieren aules toop 172.

²⁰Oba de äwaje Israeliten, de Priesta un Leviten, bleewen en aule Städa von Juda wonen, een jiedra opp sien Oafgoot.

²¹Un de Tempeldeena wonden aum Ofel en Jerusalem. See oabeiden unja de Oppsecht von Ziha un Gischpa.

²²Oba de väaschta von de Leviten en Jerusalem wia Usi, Bani sien Sän, dee Haschabja sien Sän wia, Haschabja wia Matanja sien Sän, un Matanja wia Micha sien Sän, dee een Nokomen von Asaf wia, dee met Musikj un Jesank em Gotteshus jedeent haud.

²³Wiels daut jeef eene Aunordnunk vom Kjennich fa an un eene fauste Räajel, aun woonen Dach een jiedra to sinjen haud.

²⁴Petachja, Meschesabel sien Sän, von Serach siene Nokomen, ut däm Staum Juda, stunt däm Kjennich en aulem met Rot bie, wua daut om daut Volkj jinkj.

²⁵Eenje vom Staum Juda wonden buten en de Wonstäden opp äare Weidstapen en Kirjat Arba un de Darpa waut doatoo jehieeden, en Dimona un de Darpa waut doatoo jehieeden, en Kabzeel met de Wonstäden doatoo,

²⁶un en Jeschua, Molada, Bet Pelet,

²⁷Hazar Schual, un Beerscheba met de Darpa toop,

²⁸en Ziklag un Mechona un äare Darpa,

²⁹en Enrimmon, Zora, Jarmut,

³⁰Sanoach, Adullam un äare Wonstäden, en Lachisch un äare Stapen, un en Aseka un de Darpa waut doatoo jehieeden. Soo besiedelden see äa Launt von Beerscheba em Sieden bat daut Hinnom Tol em Nuaden.

³¹De Nokomen von Benjamin oba wonden en Geba, Michmas, Aja, Betel un de Darpa waut doatoo jehieeden,

³²un en Anatot, Nob, Ananja,

³³Hazor, Rama, Gittajim,

³⁴Hadid, Zeboim, Nebalat,

³⁵Lod un Ono un em Tol von de Hauntoabeida.

³⁶Un von de Leviten jeef daut Aufdeelungen en Juda uk en Benjamin.