Read Plautdietsch (Low German) – De Bibel Nehemia 6 Bible Online

Nehemia 6 - Plautdietsch (Low German) – De Bibel bible

Nehemia 6

¹Aus Sanbalat, Tobija un Geschem, de Araba, un onse aundre Fiend daut enworden, daut ekj de Mia jebut haud un doa kjeen Loch mea bennen wia, wan wie de Däaren to dee Tiet uk noch nich väajemoakt hauden,

²schekjten Sanbalat un Geschem eenen Bootschofta no mie un leeten mie sajen: Komm, wie wellen en Kefirim em Tol Ono toopkomen! See plonden mie oba beeset auntodoonen.

³Ekj oba schekjt eene Norecht no an un leet an sajen: Ekj hab een grootet Woakj derchtofieren, ekj kaun ommäajlich komen. Miene Oabeit wudd ligjenbliewen, wan ekj dee veleet, om no junt to komen.

⁴See schekjten oba vea mol soone Enlodunk no mie, un ekj schekjt an jiedatsmol de selwje Auntwuat.

⁵Dan schekjt Sanbalat toom feften mol sienen Deena no mie met eenen opnen Breef en siene Haunt.

⁶Doabennen stunt jeschräwen: Mank de Velkja jeit daut Jeräd runt, un Geschem haft daut jesajcht, daut du un de Juden auffaulen wellen, un du doawäajen uk de Mia buen deist, un äa Kjennich woaren west.

⁷Un daut du Profeeten bestalt hast, waut dän Oppdrach haben, äwaraul en Jerusalem bekaunt to moaken: Hee es de Kjennich en Juda! Un daut woat de Kjennich to hieren kjrieen. Komm nu no mie un lot ons toop doaräwa beroden!

⁸Oba ekj schekjt no am un leet am sajen: Doa es nuscht von daut passieet, waut du doa sajchst; daut hast du die bloos utjedocht.

⁹See wullen ons enenjsten un dochten: See sellen met daut Woakj opphieren, om daut daut nich foadich woat. Dan neem ekj fresch mienen Moot toop.

¹⁰Un ekj jinkj en däm Schemaja sien Hus, dee Delaja sien Sän, un Mehetabel sien Grootsän wia, dee vehindat wia no mie to komen. Un hee säd: Well wie toop nom Tempel gonen un ons bennen em Gotteshus beschluten, wiels see woaren komen om die doottomoaken. Dise Nacht woaren see komen, om die omtobrinjen!

¹¹Ekj oba säd: Saul soon Maun aus ekj utstäakjen? Saul soon Maun aus ekj en dän Tempel gonen, om aum Läwen to bliewen? Ekj well doa nich nengonen!

¹²Ekj wort daut en, daut nich Gott am jeschekjt haud. Hee räd aus een Profeet to mie, wiels Tobija un Sanbalat am Jelt jejäft hauden.

¹³See wullen am doatoo brucken, mie entoschrakjen, daut ekj eenen Fäla moaken sull, om eenen schlajchten Nomen to kjrieen, daut see äwa mie spotten kunnen.

¹⁴Mien Gott, denkj aun Tobija un Sanbalat äare Woakjen, uk aun de Profeetin Noadja un de aundre Profeeten, dee mie trigjschrakjen wellen.

¹⁵De Mia wort aum 25. Dach en de Moonat Elul en 52 Doag foadich.

¹⁶Un aus aul onse Fiend daut hieeden, ferchten de Velkja sikj aula, waut rom ons wonden, un veluaren dän Moot, wiels see daut ensagen, daut dit Woakj von Gott wia.

¹⁷Uk väle von de aunjeseene Mana en Juda schekjten en dee Tiet Breew no Tobija, un von Tobija kjeemen Breew no an.

¹⁸Daut jeef doa väle en Juda, waut sikj am veschwuaren hauden, wiels hee wia Arach sien Sän Schechanja sien Schwieesän, un sien Sän Johanan haud Berechja sienen Sän Meschullam siene Dochta to Fru.

¹⁹Un see säden to mie goodet von am un vetalden am aules waut ekj jesajcht haud. Dan schekjt Tobija Breew, om mie trigjtoschrakjen.