Read Plautdietsch (Low German) – De Bibel Nehemia 8 Bible Online

Nehemia 8 - Plautdietsch (Low German) – De Bibel bible

Nehemia 8

¹vesaumeld sikj daut gaunze Volkj opp däm Plauz ver daut Wotapuat. Un see säden to Esra, däm Schreftjelieeden: Hol doch daut Buak met daut Jesaz, waut de HAR de Israeliten derch Moses jejäft haft!

²Aum 1. Dach en de 7. Moonat brocht Esra, de Priesta, daut Jesazbuak ver de Vesaumlunk von Mana un Frues un aul dee, dee daut vestonen kunnen.

³Un hee laus an doarut väa opp däm Plauz ver daut Wotapuat von tiedich zemorjes aun bat opp Meddach, ver Mana, Frues un wäa daut vestonen kunn. Un daut Volkj horcht oppmoakjsom opp de Wieed ut daut Jesazbuak.

⁴Un Esra, de Schreftjelieeda, stunt opp eene heltane Kaunzel, waut see fa am jemoakt hauden, un biesied am aun siene rajchte Sied stunden Matitja, Schema, Anaja, Uria, Hilkija un Maaseja. Un aun siene linkje Sied stunden Pedaja, Mischael, Malkija, Haschum, Haschbadana, Secharja un Meschullam.

⁵Un Esra muak daut Buak ver äare Uagen op, wiels hee stunt hecha aus daut Volkj, soo daut see daut aula seenen kunnen; un aus hee daut opmuak stunt daut Volkj aula opp.

⁶Un Esra lowd dän HARN, dän grooten Gott. Un daut gaunze Volkj auntwuad: “Amen! Amen”! Un see hoowen äare Henj opp un bekjten sikj met äa Jesecht bat oppe Ieed un bäden däm HARN aun.

⁷Un de Leviten Jeschua, Bani, Scherebja, Jamin, Akub, Schabetai, Hodija, Maaseja, Kelita, Asarja, Josabad, Hanan un Pelaja läden daut Jesaz ut fa daut Volkj, un daut Volkj stunt opp äaren Plauz.

⁸Un see läden daut Buak met Gott sien Jesaz kloa un vestentlich ut, soo daut jieda eena vestunt, waut doa wia jeläst worden.

⁹Un Nehemia, de Vewaulta, un Esra, de Priesta un Schreftjelieeda, un de Leviten, waut daut Volkj lieeden, säden to aul daut Volkj: Dis Dach es däm HARN, junen Gott, heilich; doawäajen siet nich truarich un doot nich hielen! Wiels daut Volkj hield aula, aus see de Wieed ut daut Jesaz hieeden.

¹⁰Doawäajen säd hee to an: Got un ät scheenet Äten un drinkjt seete Jedrenkjen! Un jäft uk dee doavon, waut fa sikj nuscht reedjemoakt haben, wiels dis Dach es fa onsen HARN heilich. Siet nich bedrekjt, wiels de Freid aum HARN es waut junt stoakj moakt.

¹¹Un de Leviten treesten aul daut Volkj un säden: Siet stell, wiels dis Dach es heilich. Siet nich bedrekjt!

¹²Un daut Volkj jinkj aula no Hus, om to äten, to drinkjen un doavon to vedeelen om een grootet Freidenfast to moaken, wiels see de Wieed vestonen hauden, waut an wieren väajeläst worden.

¹³Aum tweeden Dach vesaumelden sikj de Leida von de Volkjsgruppen ut daut gaunze Volkj un de Priesta un Leviten bie Esra, däm Schreftjelieeden, om de Wieed ut däm Jesaz noch jeneiwa kjanen to lieren.

¹⁴Un see fungen em Jesaz jeschräwen, daut de HAR derch Moses aunjeordnet haud, daut de Israeliten opp daut Fast en de säwende Moonat en Loofbooden wonen sullen.

¹⁵Dan leeten see daut bekauntmoaken un en aule Städa un en Jerusalem sajen: Got rut oppe Boaj un holt junt Loof von tome un wille Oliewenbeem, von Mirten, Paulmen un loofje Asta von aundre Beem, om Loofbooden to buen, soo aus jeschräwen steit.

¹⁶Un daut Volkj jinkj rut un hold sikj jreenet Loof un bud sikj Loofbooden, een jiedra opp sien Dak ooda opp sienen Hoff un opp de Väahäw biem Tempel un opp de Städen biem Wotapuat un biem Efraimpuat.

¹⁷Un de gaunze Vesaumlunk von dee, dee ut de Jefangenschoft trigjekomen wieren, muaken sikj Loofbooden un wonden doabennen. Soont hauden de Israeliten aul von Josua, Nun sienen Sän, siene Tiet, bat disen Dach nich mea jedonen. Un dit muak an sea froo.

¹⁸Un doa wort jieda Dach ut Gott sien Jesazbuak väajeläst, vom ieeschten Dach aun bat däm latsten Dach. See fieeden daut Fast säwen Doag un aum achten Dach hilden see eene Vesaumlunk auf, soo aus sikj daut jehieed.