Read Plautdietsch (Low German) – De Bibel Nehemia 9 Bible Online

Nehemia 9 - Plautdietsch (Low German) – De Bibel bible

Nehemia 9

¹Aum 24. Dach en dise Moonat kjeemen de Israeliten toop toom fausten. See hauden sikj Sakj romjenomen to Kjleeda un sikj Ieed opp äare Kjap jeschett.

²Un daut Volkj Israel sondad sikj von aul daut framde Volkj auf un kjeemen un bekjanden äare Sinden un schlajchte Doten von äare Vodasch.

³See stunden von äare Plaza opp, un an wort ut däm HARN, äaren Gott, sien Jesazbuak dree Stund lank väajeläst.

⁴Un opp dän hechren Plauz fa de Leviten stunden Jeschua, Bani, Kadmiel, Schebanja, Bunni, Scherebja, Bani un Kenani un schrieejen lud to däm HARN, äaren Gott.

⁵Un de Leviten Jeschua, Kadmiel, Bani, Haschabneja, Scherebja, Hodija, Schebanja un Petachja säden toom Volkj: Stot opp! Loft dän HARN, junen Gott, von Eewichkjeit bat Eewichkjeit! Doot sienen harlichen Nomen preisen, uk wan dee äwa aulet preisen un lowen erhowen es!

⁶HAR, du best de Eensja. Du hast dän Himmel jemoakt, un aule Kjraften aum Himmel met äa gaunzet Häa, de Ieed un aules, waut doabowen es, daut Mäa un aules, waut doa bennen es, du moakst aules läwendich, un daut himlische Häa bät die aun.

⁷Du best de HAR, dee Gott, dee Abram jewält haft un am ut Ur en Chaldäa rutjefieet haft; du jeefst am dän Nomen Abraham.

⁸Du hast sien Hoat tru jefungen ver die un eenen Bunt met am jeschloten: Siene Nokomen daut Launt to jäwen, wua de Kanaanita bennen wonen, de Hetita un de Amorita, de Perisita, Jebusita un Girgasita. Un du hast dien Vespräakjen jehoolen, wiels du jerajcht best.

⁹Du hast onse Vodasch äare Unjadrekjunk en Ägipten jeseenen un äa Jeschrech aum Schelpmäa jehieet.

¹⁰Un du deetst Tieekjens un Wunda aun dän ägiptischen Kjennich un aun aul siene Deena un aun daut gaunze Volkj en sien Launt, wiels du sachst, daut see onäwalajcht jäajen onse Vodasch haundelden. Un du hast die eenen Nomen jemoakt, soo aus dee vondoag dän Dach noch es.

¹¹Un du hast daut Mäa ver an jedeelt, soo daut see medden derch daut Mäa drieech derchjinjen. Un hast äare Vefolja en daut deepe nenjeschmäten soo aus Steena en een deepet Wota.

¹²Du leidsd an äwa Dach met eenen Wolkjenstenda, un de Nacht muakst du äaren Wajch dach met dän dachen Schien von däm Fiastenda.

¹³Du kjeemst rauf opp dän Boajch Sinai, un rädsd vom Himmel rauf met an. Rajchte Ordnungen jeefst du an, Jesazen, waut daut Läwen räajlen, met goode Väaschreften un Jebooten.

¹⁴Du muakst an met dienen Sabat bekaunt aus eenen heiljen Dach, waut die jehieet; du jeefst an Väaschreften un Jebooten un een Jesaz derch dienen Deena Moses.

¹⁵Aus see hungrich worden, jeefst du an Broot vom Himmel; un leetst Wota ut däm Steen schälen, om äaren Darscht to stellen. Un du deetst an aunordnen, daut Launt entonämen, wuaräwa du diene Haunt jehowen hautst toom schwieren, om an daut to jäwen.

¹⁶Oba onse Vodasch worden stolt un ieejensennich, soo daut see diene Jebooten nich jehorchten.

¹⁷See wäaden sikj, die to jehorchen, un dochten uk nich aun diene Wunda, wuaderch du an jeholpen hautst. See worden ieejensennich un neemen sikj faust väa, trigj no Ägipten, en de Sklowarie to gonen. Oba du, mien Gott, wieescht jnädich un vejeefst an, du wieescht langsom met doll woaren, un hautst Metleet un truhoatje Leew. Un du leetst an nich em Stäakj.

¹⁸See muaken sikj soogoa een goldnet Kaulf un säden: “Daut es dien Gott, waut die ut Ägipten jefieet haft.” Un see räden groote Lastawieed,

¹⁹du oba hast an wäajen dien grootet Metlieden, dort enne Wiltnis nich veloten. Du neemst dän Wolkjenstenda nich wajch, wua du an äwa Dach met leiden deetst; uk nich dän Fiastenda de Nacht, waut an dän Wajch bedachen deed, wua see jinjen.

²⁰Du jeefst an dienen gooden Jeist, om an to Ensecht to brinjen. Dien Mauna neemst du an nich wajch un jeefst an Wota, aus an darscht.

²¹Du vesorjsd an 40 Joa enne Wiltnis, soo daut an daut aun nuscht fäld. Äare Kjleeda worden nich vebrukt, un äare Feet schwollen nich aun vom gonen.

²²Du jeefst Kjennichrikjs un Velkja unja äare Macht. Du jeefst an daut Launt Sihon von Heschbon un daut Launt Baschan, wua Kjennich Og rejieed.

²³Du schonkst an sooväl Kjinja, aus Stierns aum Himmel stonen. Un du brochst an en daut Launt, waut du äare Vodasch toojesajcht hautst, daut see doa nentrakjen un daut ennämen sullen.

²⁴Un de Kjinja trocken doa nenn un neemen daut Launt en. De Enwona em Launt deetst du ver an deemootjen, un jeefst de Kanaanita en äare Henj. Met de Kjennichs un äare Velkja em Launt, kunnen see doonen waut see wullen.

²⁵Fauste Städa neemen see en, un daut fruchtboare Akalaunt un Hiesa met wieetvolle Sachen. Un ut Steena utjehakte Zistren, Wiengoades un Oliewengoades, un sea väl Oftbeem ieejenden see sikj too. See eeten un worden saut un fat, un leeten sikj daut scheengonen bie diene groote Gowen.

²⁶Dan oba worden see onjehuarsom un wadaspanstich jäajen die; un dreiden dien Jesaz dän Rigjen. See brochten diene Profeeten om, waut an opp äare Schult oppmoakjsom muaken un an oppfoddaden trigj no die to komen. Oba see veachten die emma wada.

²⁷Doawäajen jeefst du an enne Henj von äare Fiend, un see worden von dee hoat bedrenjt. Oba en dee Tiet wua see unjadrekjt worden schrieejen see no die om Help, un du horchst no an vom Himmel, un wäajen dien grootet Metlieden jeefst du an stoakje Helpasch, waut an frie muaken von äare Fiend.

²⁸Wan see oba ieescht Ru hauden, deeden see wada schlajchtet ver die. Dan jeefst du an wada enne Henj von äare Fiend, daut dee äwa an rejieeden. Dan schrieejen see wada no die om Help, un du horchst no an vom Himmel un radsd an välmol wäajen dien grootet Metleet.

²⁹Un du vemonsd an, trigjtokomen un no dien Jesaz to horchen. See oba wieren stolt un jehorchten diene Jebooten nich. See deeden jäajen diene Jesazen sindjen, waut daut Läwen schitzen, wan dee jehoolen woaren. See dreiden die dän Rigjen han un worden ieejensennich un jehorchten nich.

³⁰Un du hautst väle Joaren Jedult met an un deetst an derch dienen Jeist woarnen, dee diene Profeeten de Wieed enjeef; oba see horchten doa nich no. Doawäajen jeefst du an enne Henj von de Velkja en framde Lenda.

³¹Oba wiels dien Metleet soo groot es, hast du met an nich een Enj jemoakt un an noch nich veloten, wiels du een jnädja metliedenda Gott best!

³²Un nu ons Gott, du groota Gott, dee du sea stoakj un to ferchten best, du helst dienen Bunt met ons un best truhoatich leeftolich. Lot die daut nich weinich väakomen, aul daut lieden waut ons jetroffen haft! Onse Kjennichs un Leida haben jeläden, onse Priesta un Profeeten, un daut gaunze Volkj. Onse Vodasch un daut Volkj haben aul jeläden, von de assierische Kjennichs aun bat disen Dach.

³³Du best jerajcht en aulem, waut du äwa ons hast komen loten; du hast rajcht jehaundelt, wie oba sent gottloos jeworden.

³⁴Onse Kjennichs, Leida un Priesta, onse Vodasch un daut gaunze Volkj, haben diene Jesazen nich jehoolen, un no diene Jebooten nich jehorcht un diene Woarnungen fa nuscht jehoolen.

³⁵Du hautst an een Kjennichrikj jejäft un en diene Leew väl goodet bewäsen, du hautst an een Launt jejäft, waut groot un fruchtboa wia. See oba wäaden sikj die to deenen un leeten nich von äare beese Doten.

³⁶Doawäajen sent wie vondoag Sklowen, hia en ons Launt, waut du onse Vodasch jejäft hast, om de Frucht un de Sachen to brucken, waut daut enbrinjt, kjikj, hia bennen sent wie Sklowen!

³⁷Aul daut Enkomen brinjt de Kjennichs Jewenst, waut du äwa ons jesat hast om onse Sinden to bestrofen. See rejieren äwa onsen Kjarpa un ons Vee un doonen met ons, waut an jefelt. Un wie sent en groote Noot!