Read Plautdietsch (Low German) – De Bibel Ester 1 Bible Online

Ester 1 - Plautdietsch (Low German) – De Bibel bible

Ester 1

¹De Kjennich Ahasveros haud een Rikj, von 127 Prowinsen, dee von Indien bat däm Niel Riefa vestreit wieren.

²Hee rejieed von sien Paulaust en Susa, de Hauptstaut.

³Aus hee daut dredde Joa en sien Aumt wia, muak hee een grootet Fast, wuatoo aul de huach aunjeseene Menschen un aule Rejierungs Beaumte enjelot wieren. Aule Offizieren von de Armee fa Medien un Persien un aule Prinsen un Rejierungs Beaumte von de Prowinsen kjeemen doatoo.

⁴Fa 180 Doag wees hee an doa woo rikj hee wia, un woo prachtvoll un groosoatich siene Macht wia.

⁵Toom daut groote Fast aufschluten, loot hee aule Enwona en Susa en, de rikje uk de oame. Dit wia een säwendoagschet Gaustmol, en däm Goaden aun sienen Paulaust.

⁶Em Goaden hauden see witte Gardienen von Lienzeich un bleiwe Henjsels met witte un bleiwroode Benja un selwane Rinj aun huage Marmorsteenpast oppjehongen. Doa wieren utjepolstade Setten von Golt un von Selwa jemoakt en däm Goaden. De Flua wia utjelajcht met veschiedne Ploten von kostboare Steena.

⁷Wien von em Kjennich sien Wienkjala wort en goldne Wienkuffels jeboden; kjeene twee Kuffels wieren äwareen. Doa sagen see woo jenstich de Kjennich wia.

⁸Een jiedra kjrieech krakjt soo väl ooda weinich aus am jankad. Soo haud de Kjennich daut bestalt.

⁹De Kjennijin, Waschti, jeef een Gaustmol fa de Frues en Ahasveros sien Paulaust.

¹⁰Aun däm säwenden Dach, aus de Kjennich gaunz schaftich von aul däm Wien wia, roopt hee siene säwen jeschnädne Deena, Mehuman, Biseta, Harbona, Bigta, Abagta, Setar, un Karkas.

¹¹Hee säd an, see sullen de Kjennijin Waschti met äare kjennijins Kroon väabrinjen, om daut de Menschen un de Prinsen seenen kunnen, woo schmock see leet. Ar leet et sea schmock.

¹²Aus de Deena de Kjennijin säden, waut de Kjennich haben wull, leet de Kjennijin sikj nich beräden. Aus de Kjennich daut hieed, oajad hee sikj un hee wort flaument doll.

¹³Hee roopt siene Rotjäwa, dee sikj goot wisten met woo daut em Launt rand, Mana opp dee hee sikj veleet wan eene Entscheidunk äwa daut Laundesjesaz oppkjeem.

¹⁴Dise Rotjäwa wieren Karschena, Schetar, Admata, Tarsis, Meres, Marsena, un Memuchan. Dise säwen Prinsen kjeemen foaken ver däm Kjennich un wieren de hechste aunjestalde Mana en Persien un Medien.

¹⁵Waut sajcht daut Jesaz? fruach hee an. Waut saul ekj met de Kjennijin Waschti doonen, nu daut see däm Kjennich sien Wuat, waut siene Deena ar jebrocht hauden, nich jehorcht haft?

¹⁶Un Memuchan säd to däm Kjennich un de Rotjäwa: De Kjennijin haft orrajcht jedonen, un nich bloos jäajen die perseenlich. See haft orrajcht jedonen, jäajen aule huach aunjeseene Menschen un werkjlich jäajen aule Menschen en dien gaunzet Rikj.

¹⁷Waut see jedonen haft woat aule Frues aunleiden, daut see opp äare Mana rauf kjikjen. Dee brucken bloos sajen: De Kjennich fruach no de Kjennijin Waschti, un dee deed daut nich.

¹⁸Dan woaren de Frues von däm Kjennich siene aunjestalde en Medien un Persien, dee daut jehieet haben, äare Mana daut noch vondoag vetalen, un aulawäajen woaren Mana sikj met äare Frues doll sennen.

¹⁹Wan du daut aus goot aunsitst, dan jeff een kjennichlichet Wuat, daut Waschti niemols wada doaf ver däm Kjennich Ahasveros komen. Lot dit en de Persa un Meeda äare Jesazen jeschräwen woaren, woone nienich to endren sent. Un dan stalst eene aundre bätre Fru aun aus Kjennijin.

²⁰Wan dise Ordnunk en dien grootet Rikj bekauntjejäft woat woaren, dan woat jieda Fru äaren Maun dän rajchten Respakjt jäwen, eendoont auf hee rikj ooda oam es.

²¹Däm Kjennich un siene Rotjäwa jefoll daut waut Memuchan jesajcht haud un hee deed daut soo.

²²Hee schekjt Breew no jieda Prowins en sien Launt, emma en äare ieejne Sproak un Schreft, soo aus dee doa jebrukt wort. De Breef säd, daut en jieda Famielje sull de Maun Har em Hus sennen. Dit wort fa jieda Volkj en äare Sproak gaunz kloa jesajcht.