Read Plautdietsch (Low German) – De Bibel Ester 3 Bible Online

Ester 3 - Plautdietsch (Low German) – De Bibel bible

Ester 3

¹Eene jewesse Tiet lota, stald de Kjennich Ahasveros eenen nieen bowaschten Rejierungs Maun aun. Dit wia Haman, Hamedata sien Sän, von de Nokomen von Agag. Dit Aumt jeef een Ierenplauz, aus kjeen aundra em Launt haud.

²De aundre Beaumte musten, nom Kjennich siene Väaschreft, ver Haman kjneeen un bekjen. Dit deeden see dan aula, buta Mordechai nich.

³Dee, dee met am toop schauften, fruagen am: Wuarom jehorchst du däm Kjennich nich?

⁴See räden fa miere Doag met am doawäajen, oba see kunnen am nich doatoo beräden. Ekj sie een Jud un kaun mie nich ver Haman kjneeen, säd Mordechai. Dise Norecht wort dan no Haman jebrocht, om to seenen, waut dee doamet doonen wudd.

⁵Haman wort sea wuttich aus hee hieed daut Mordechai am nich met kjneeen ieren deed.

⁶Wiels Haman jieren de Strof wull jrata moaken aus bloos opp eenen Maun, un wiels hee nu wist, daut Mordechai een Jud wia, plond hee aule Juden en däm Kjennich Ahasveros sien Rikj opp eemol omtobrinjen.

⁷En de 1. Moonat, de Moonat Nissan, en daut 12. Joa daut Ahasveros Kjennich wia, worden unja Haman siene Oppsecht Kjlaz, ooda Puriem, jeschmäten om de baste Tiet fausttostalen dän Plon uttofieren. Daut Loss bestemd daut see daut enne twalfte Moonat doonen wudden.

⁸Aus sien Plon gaunz foadich wia, jinkj Haman nom Kjennich Ahasveros un säd: Doa es een jewesset Volkj, daut äwa aule Prowinsen en dien Rikj vespreet es. Dee hoolen sikj aun jewesse Lieren, dee an oppoat saten vonne gaunze Bevelkjarunk, un hoolen nich de Jesazen en ons Launt. Dee sust du nich en dien Rikj dulden.

⁹Wan du doamet envestonen best, dan lot een Jesaz derchjefieet woaren, daut Volkj auftoschaufen. Ekj woa 375 Tonn Selwa aufwäajen un en de Kaus vom Rikj lajen om dise Oabeit to doonen.

¹⁰De Kjennich neem sien Rinkj, dee een Tieekjen von siene Autorität wia, un jeef däm no disen Haman, dän Judenfient, dän Agagita, Hamedata sien Sän.

¹¹Doo waut die goot schient, säd de Kjennich to Haman. Daut Jelt un de Mana kaust doatoo haben.

¹²Aum 13. Dach en de 1. Moonat, roopt Haman däm Kjennich siene Schriewa toop un jeef an de niee Ordnunk. Dee wort dan fa jieda Volkj em Rikj en äare Sproak un Schreft jeschräwen, un aun däm Kjennich siene Rejierungs Mana, aun de Volkjsleida äwa aule Prowinsen, un aun de Leida von de veschiedne Velkja veschekjt. Dee wieren en däm Kjennich Ahasveros sienen Nomen jeschräwen un met sienen Rinkj jestampelt.

¹³De Ordnunk wort no aule Prowinsen em Rikj von Dräaja utjedroacht. Un de Norecht säd: Aule Juden, junge un oole, Frues un Kjinja, sellen aun däm 13. Dach en de 12. Moonat, de Moonat Adar, dootjemoakt un utjerot woaren. Äa Hab un Goot doaf sikj irjent wäa nämen.

¹⁴Dise Ordnunk saul en jieda Prowins em Jesaz jeschräwen woaren un bekaunt jejäft woaren, soo daut aule Velkja kjennen fa dän Dach reed sennen.

¹⁵Opp däm Kjennich sien Befäl spooden de Dräaja sikj de Norecht uttodroagen, un en Susa wort daut fuaz bekaunt jejäft. En de Staut räajden de Menschen sikj sea opp, oba de Kjennich un Haman saden sikj dol un leeten sikj waut toom drinkjen oppsaten.