Read Plautdietsch (Low German) – De Bibel Ester 4 Bible Online

Ester 4 - Plautdietsch (Low German) – De Bibel bible

Ester 4

¹Aus Mordechai enwort, waut doa jeworden wia, vereet hee sienen Rock, trock sikj eenen Sak äwa, streid sikj Ausch opp sienen Kopp un jinkj soo aus daut enne Staut rom. Hee hield betre Tronen un schrieech lud.

²Hee jinkj gaunz bat aum Engank vom Kjennichshoff, oba hee jinkj doa nich nenn, wiels daut veboden wia doa en een Truakjleet nenn to gonen.

³Un enne Prowinsen jeef daut väl truaren mank de Juden aus de Ordnunk bekaunt jejäft wort. See fungen aun to fausten, see hielden un schrieejen, un väle lagen en Sakkjleeda un Ausch.

⁴Ester äare Deena un Oppsechta vetalden ar waut Mordechai deed, un ar baudad daut sea. See schekjt am soogoa Kjleeda, daut hee opphieren sull de Sakkjleeda to droagen. Mordechai leet sikj oba nich beräden.

⁵Dan schekjt Ester Hatach, eenen von de jeschnädne Deena, dee soo aus de Kjennich daut bestalt haud, Ester äa Deena wia. See wull haben hee sull von Mordechai utfinjen, waut hee väa haud, un wuarom.

⁶Dee jinkj dan bat buta däm Kjennichshoff, wua hee Mordechai troff.

⁷Mordechai vetald am waut doa jeworden wia, soogoa wooväl Jelt Haman vesproaken haud enne Rejierungskaus to jäwen om de Juden omtobrinjen.

⁸Hee schekjt ar uk eene Kopie von de Ordnunk an auftoschaufen, soo aus dee en Susa bekauntjejäft wia. Hee säd Hatach, daut hee Ester aules kloa moaken sull un ar onbedinjt sajen sull, daut see däm Kjennich om Jnod prachren sull, om äa Volkj to veschoonen.

⁹Hatach jinkj un säd Ester aules, waut Mordechai am jesajcht haud.

¹⁰Ester schekjt Hatach nochmol trigj no Mordechai un säd:

¹¹Daut weeten je nich bloos aul de Rejierungs Beaumte, oba uk aule Menschen en de Prowinsen, daut eena nich jrod soo nom Kjennich jeit. Daut es je daut Jesaz, daut wan wäa verem Kjennich sien Troon jeit, onen daut de Kjennich däm jeroopt haft, dan woat deejanja dootjemoakt, buta de Kjennich strakjt sienen goldnen Stock no däm opptoo, un soo däm sien Läwen spoat. Un weetst, de Kjennich haft aul fa 30 Doag nich no mie jefroacht.

¹²Hatach jinkj un vetald Mordechai waut Ester jesajcht haud, un aus Mordechai daut hieed,

¹³schekjt hee dise Norecht trigj: Jleew nich daut du doa em Paulaust met dien Läwen woascht doavon komen, wan aule aundre Juden stoawen motten.

¹⁴Wan du nu nuscht doonen woascht, woaren de Juden opp eenen aundren Wajch jerat woaren, oba du un dien Voda siene Famielje woaren omkomen. Denkj doaraun, du best veleicht krakjt wäajen soone Loag nom Paulaust jekomen.

¹⁵Dan leet Ester dise Norecht no Mordechai schekjen:

¹⁶Go du, un roop aule Juden en Susa toop, un doot dree Doag fa mie fausten. Jie sellen nuscht äten un nuscht drinkjen, nich äwadach un uk nich de Nacht. Ekj un miene Deena woaren uk krakjt soo fausten. Wan wie dit jedonen haben, dan woa ekj nengonen nom Kjennich, wan daut uk strenj veboden es. Wan ekj doa stoaw, dan lot daut sennen.

¹⁷Mordechai jinkj un deed waut Ester von am velangd.