Read Plautdietsch (Low German) – De Bibel Ester 5 Bible Online

Ester 5 - Plautdietsch (Low German) – De Bibel bible

Ester 5

¹Aum dredden Dach trock Ester sikj äare Kjleeda aus Kjennijin aun un jinkj un stunt ver de Däa von de Stow, wua de Troon wia. De Kjennich saut jrod opp sienen Troon jäajenäwa von de Däa.

²Aus hee Ester de Kjennijin sach, wia hee goot to ar, un hee strakjt sienen goldnen Stock no ar opptoo. Dan jinkj Ester no am un schieed de Spetz von sienen Stock aun.

³De Kjennich fruach ar: No waut kjemst, Kjennijin Ester? Froag no waut du west. Ekj jäw die bat opp daut haulwe Kjennichrikj.

⁴Ester säd: Wan die daut paust, dan well ekj die un Haman enloden to een Gaustmol, daut ekj vondoag fa die reed moak.

⁵Doaropp schekjt de Kjennich eene Norecht no Haman un säd am, hee sull fuaz to daut Gaustmol komen, waut Ester reed jemoakt haud.

⁶De Kjennich un Haman jinjen no Ester äa Gaustmol. Aus see don biem Wien sauten, säd de Kjennich: No waut west du froagen? Ekj jäw die daut. Un wan du uk no de halft vom Rikj frajchst, saust du daut haben.

⁷Un Ester säd: Ekj wensch mie, ekj froag,

⁸daut wan du soo goot to mie best, oo Kjennich, un mie west jäwen no waut ekj froag, dan bedd ekj, daut du un Haman morjen wada to een Gaustmol komen, daut ekj dan fa junt woa reed moaken. Dan woa ekj die sajen, waut ekj haben mucht.

⁹Aus Haman dän Dach vom Gaustmol no Hus jinkj, wia hee schaftich un goot aunjelajcht. Oba aus hee derch daut groote Puat jinkj, sach hee Mordechai doa, un dee stunt nich opp un wees am uk sest kjeenen Respakjt. Dan wort hee sea doll,

¹⁰oba hee meen sikj wada toop un jinkj no Hus. Doa kroagd hee siene Frind toop, un siene Fru Seresch wia doa uk.

¹¹Hee pucht an väa woo rikj hee wia, woo väl Säns hee haud, un woo de Kjennich am haud hecha aunjestalt aus irjent eenen aundren en daut gaunze Rikj.

¹²Dan säd Haman: Un ekj wia de eensja waut met däm Kjennich toop no de Kjennijin Ester äa Gaustmol enjeloden wia. Un morjen sie ekj wada met däm Kjennich toop enjeloden to äa Gaustmol to komen.

¹³Doch aul dit jeft mie nich Fräd, soo lang aus ekj Mordechai, däm Jud, verem Kjennich sien Paulaust setten see.

¹⁴Siene Fru un siene Frind säden: Lot eenen Gauljen jebut woaren, dee 20 Meeta huach es, un zemorjes sajchst däm Kjennich, daut hee saul Mordechai doa henjen. Dan woascht zeowes met Freid kjennen to daut Gaustmol gonen. Dis Rot jefoll Haman, un hee leet dän Gauljen buen.