Read Plautdietsch (Low German) – De Bibel Ester 7 Bible Online

Ester 7 - Plautdietsch (Low German) – De Bibel bible

Ester 7

¹De Kjennich un Haman jinjen no daut mol, waut de Kjennijin Ester fa an reedjemoakt haud.

²Aun disen tweeden Dach, aus see bat däm Wien drinkjen wieren, fruach de Kjennich wada: Waut west du froagen Ester? Du woascht daut kjrieen. Waut licht die aum Hoat? Du saust daut haben, un wan uk bat opp daut haulwe Kjennichrikj.

³Un Ester säd: Wan de Kjennich mie soo goot toojedonen es, un wan de Kjennich doamet envestonen es, dan froag ekj auf ekj läwen doaf un auf mien Volkj läwen doaf. Daut es waut ekj von die haben well.

⁴Ons haben see vekoft toom schlachten. Wan wie vekoft wieren aus Sklowen, dan wia daut nich wieet jewast nom Kjennich to komen, oba nu sell wie omjebrocht un utjerot woaren.

⁵Dan säd de Kjennich Ahasveros to de Kjennijin Ester: Wäa woacht sikj soont, un wua es dee?

⁶Un Ester säd: Ons Jäajna un Fient es dis beesa Haman. Haman enjst sikj jreslich ver däm Kjennich un de Kjennijin.

⁷De Kjennich fua ut Wutt vom Desch un jinkj em Goaden bie däm Paulaust. Haman kunn daut seenen, daut de Kjennich sikj aul oppjemoakt haud, waut met sien Läwen woaren sull. Doawäajen kjneed hee sikj nu ver de Kjennijin Ester un prachad fa sien Läwen.

⁸Aus de Kjennich trigj nenn kjeem, no däm Plauz wua see Wien drunken, sach hee daut Haman sikj opp Ester äare Benkj jeschmäten haud. De Kjennich säd: Woat disa hia en mien Hus un ver mie met de Kjennijin Schaund driewen? Soo schwind aus de Kjennich daut jesajcht haud, bedakjten de Deena Haman sien Jesecht.

⁹Harbona, eena von de Deena säd: Doa steit een Gauljen reed, opp Haman sien Hoff. Dee es 20 Meeta huach, un dee haud hee loten fa Mordechai buen, de Maun, dee doa enstunt däm Kjennich to halpen. Un de Kjennich säd: Henjt Haman doabowen.

¹⁰Un soo wort Haman aum Gauljen jehongen, dän hee fa Mordechai haud buen loten. Dan jinkj däm Kjennich sien Oaja äwa.