Read Plautdietsch (Low German) – De Bibel Ester 8 Bible Online

Ester 8 - Plautdietsch (Low German) – De Bibel bible

Ester 8

¹Dän Dach noch jeef de Kjennich Ahasveros daut gaunze Vemieejen, waut Haman de Judenfient jehaut haud no de Kjennijin Ester. Ester vetald däm Kjennich, woo see met Mordechai Frintschoft wia, un doaderch kjeem hee verem Kjennich.

²Un de Kjennich jeef Mordechai dän Rinkj, dän hee von Haman trigjenomen haud. Ester stald Mordechai uk äwa daut Vemieejen von Haman.

³Ester jinkj dan noch een mol nenn no däm Kjennich, kjneed sikj ver am un hield un prachad, daut hee sull een Enj moaken von däm Plon, dän Haman de Agagita jäajen de Juden jemoakt haud.

⁴De Kjennich hilt ar noch wada dän goldnen Stock han un see stunt opp

⁵un säd: Wan die daut sest aunsteit, un wan ekj en diene goode Gonsten sto, un du daut fa rajcht aunsitst, dan lot doch een Schriewen moaken. Dit wudd de Ordnunk wajchnämen, woone Haman, Hamedata sien Sän, de Agagita, oppjestalt haft, wuaderch aule Juden en aul diene Prowinsen sellen omjebrocht woaren.

⁶Ooda woo saul ekj tookjikjen, wan mien Volkj omjebrocht woat? Woo saul ekj daut uthoolen, wan mien ieejnet Frintschoft utjerot woat?

⁷De Kjennich Ahasveros säd to de Kjennijin Ester un to Mordechai däm Jud: Nu seet doch, ekj hab Ester däm Haman sien Hab un Goot jejäft, un Haman selfst hab ekj loten opp eenen Gauljen henjen, wiels hee jäajen de Juden utfua.

⁸Oba een Jesaz, daut em Kjennich sien Nomen jeschräwen un met mien Rinkj jestampelt es, kaun nich trigjenomen woaren. Waut ekj doonen woa, es junt loten eene niee Ordnunk schriewen, soo aus junt fa de Juden rajcht es. Schrieft daut en mienen Nomen un stampelt daut met mienen Rinkj.

⁹Aum 23. Dach en de 3. Moonat, de Moonat Siwan, roopt Mordechai däm Kjennich siene Schriewa toop un leet eene Ordnunk oppschriewen. Dee sull no de Juden, no däm Kjennich siene Rejierungs Mana un de Vewaulta un de aunjestalde en de 127 Prowinsen von Indien bat däm Niel Riefa jeschekjt woaren. De Ordnunk wort en de Schreft un Sproak von jieda Volkj jeschräwen, un uk en de Schreft un Sproak von de Juden.

¹⁰Dee wia em Kjennich sien Nomen jeschräwen un met däm Kjennich sien Rinkj jestampelt. Dan worden dee utjeschekjt met Mana opp besonda bosje Pieed vom Kjennich siene Stalinj.

¹¹De Ordnunk säd, daut de Juden durwen en aule Städa em Rikj toopkomen om sikj to wäaren. Soone waut jäajen an oppstunden, eendoont von woone Prowins ooda woon Volkj, durwen see met Frues un Kjinja toop ombrinjen un utroden, un dee äa Hab un Goot bestälen.

¹²Dise Ordnunk sull aum 13. Dach en de 12. Moonat, de Moonat Adar, en aule Prowinsen en Kjennich Ahasveros sien Rikj jeltich sennen.

¹³Dit sull en jieda Prowins een Jesaz woaren un mank aule Velkja bekauntjejäft woaren, soo daut de Juden dän Dach kunnen reed sennen sikj aun äare Fiend to rajchen.

¹⁴Opp däm Kjennich sien Wuat wort daut bosich von Ritta opp däm Kjennich siene Pieed utjefieet. En de Staut Susa wort daut uk bekaunt jejäft.

¹⁵Mordechai jinkj dän Dach ut däm Paulaust en een kjennichlichet Kjleet, un een Mauntel von Lienzeich un bleiwe Woll. Oppem Kopp haud hee eene groosoatje goldne Kroon. De Lied un Susa freiden sikj un schrieejen am aun.

¹⁶De Juden enne Staut feelden sikj leicht un loosjeloten. See feelden sikj goot äwa de Iea, dee an bewäsen wort.

¹⁷Uk en aule Prowinsen un en jieda Staut freiden de Juden sikj jiedatsmol wan dise Ordnunk bekauntjejäft wort. See muaken eenen Heljedach un kjeemen toop un leeten sikj daut met een Gaustmol scheengonen. Een deel Menschen von de aundre Velkja schlooten sikj daut Judentum aun, wiels see sikj fa de Juden enjsten.