Read Plautdietsch (Low German) – De Bibel Ester 9 Bible Online

Ester 9 - Plautdietsch (Low German) – De Bibel bible

Ester 9

¹Aum 13. Dach en de 12. Moonat, aus dise Ordnunk vom Kjennich en Krauft kjeem, hauden de Jäajna von de Juden jedocht, daut see wudden Macht äwa de Juden haben. Oba daut kjeem jrod dän aundren Wajch ut, un de Juden hauden de Macht äwa äare Fiend.

²En jieda Staut en aule Prowinsen wua doa Juden wieren, vesaumelden see sikj om trigjtoschlonen, wan an wäa wudd aunjriepen. Kjeene kjrieejen de Macht äwa de Juden, un aule Velkja ferchten sikj ver de Juden.

³De Prinsen, de Rejierungs Mana, de Vewaulta un aunjestalde vom Kjennich holpen de Juden, wiels see sikj ver Mordechai enjsten.

⁴En de veschiedne Prowinsen worden see goot en, daut Mordechai em Paulaust huach aunjeseenen wia. Siene Macht wort emma jrata.

⁵De Juden brukten daut Schwieet jäajen äare Fiend un brochten dee aula om. See deeden krakjt waut an biefoll met dee waut jäajen an wieren.

⁶En de Hauptstaut, Susa, schluagen see 500 Mana doot.

⁷De tieen Säns von Haman, Hamedata sien Sän, dee een Judenfient wia, schluagen see uk doot. Daut wieren Parschandata, Dalfon, Aspata, Porata, Adalja, Aridata, Parmaschta, Arisai, Aridai, un Wajesata. Oba see bestoolen un plindaden kjeenem.

¹¹Aus de Kjennich dän Dach hieed, woo väl Doodes doa en Susa wieren,

¹²säd hee to Ester, de Kjennijin: Hia en Susa haben de Juden 500 Mana un aule tieen von Haman siene Säns omjebrocht. Waut meest haben see dan en de Prowinsen jedonen? Wan doa noch waut es waut du wenschst, waut jedonen sull woaren, dan froag mie, un daut saul soo woaren.

¹³Un Ester säd: Wan du, Oo Kjennich doamet envestonen best, dan lot de Juden en Susa morjen uk noch wieda de selwje Frieheit haben, dee see vondoag hauden. Un lot Haman siene tieen Säns opp Gauljen hengen.

¹⁴De Kjennich jeef sien Wuat doatoo. Dan worden opp siene Ordnunk Haman siene tieen Säns opp Gauljen jehongen.

¹⁵De Juden en Susa stunden sikj toop, soo daut doa aum 14. Dach von de Moonat en Susa noch 300 Menschen dootjemoakt worden. Oba wada wort nuscht bestolen ooda jeplindat.

¹⁶En de Prowinsen vesaumelden sikj uk de Juden, om sikj jäajen de Fiend to wäaren, un von dee loos to komen. Doa wieren 75.000 Doodes, oba noanich wort jestolen ooda jeplindat.

¹⁷En de Prowinsen passieed dit aum 13. Dach en de 12. Moonat, un aum 14. reiwden see un see fieeden dän Dach aus een Heljedach, un freiden sikj woo aules utjefollen wia.

¹⁸En Susa oba rand de Schlacht aum 13. un 14., un doa wort de 15. aus een Heljedach met een Gaustmol jefieet.

¹⁹Dit es wuarom de Juden enne Darpa un oppem Launt dän 14. Dach en de 12. Moonat met freid aus een Heljedach fieren un sikj unjarenaunda Jeschenkja jäwen.

²⁰Mordechai leet aul dit dolschriewen. Hee schekjt Breew no de Juden en jieda Prowins en Kjennich Ahasveros sien Rikj, auf dicht bie ooda wiet auf,

²¹daut see emma jieda Joa sullen dän 14. un 15. Dach en de 12. Moonat een Heljedach fieren,

²²toom aundenkjen daut see sikj hauden jäajen äare Fiend veteidjen kunt, un daut see Fräd jekjräajen hauden. Dit wia de Moonat wua äa jaumren to Freid, un äa truaren to een Freidenfast wort. Aun dise beid Doag sullen see Heljedoag hoolen, un sikj eenaunda met Äten beschenkjen, un uk de oame Jeschenkja jäwen.

²³De Juden wieren doamet envestonen, wieda to doonen waut Mordechai an jeschräwen haud, un muaken daut to een Fast, waut see jieda Joa fieeden.

²⁴Haman de Judenfient haud jeplont de Juden omtobrinjen, un haud Kjlaz jeschmäten om dän Dach to bestemmen, wanea see daut doonen wudden. To dee Tiet nanden see de Kjlaz, Puriem.

²⁵Oba aus de Kjennich enwort waut fa eenen beesen Plon Haman jemoakt haud, leet hee eene Ordnunk rutjäwen, daut de gaunza Plon trigj opp Haman sien Kopp toopklaupen sull, un daut hee un siene Säns sullen jehongen woaren.

²⁶Doaderch wort de Heljedach Puriem jenant, daut Wuat fa de Kjlaz. Wäajen daut waut daut en dän Breef säd, un wäajen daut waut see jeseenen un derchjemoakt hauden,

²⁷veflichten aule Juden sikj un neemen daut opp sikj, daut see jieda Joa aun däm bestemden Dach dise twee Doag soo fieren wudden, aus Mordechai an daut väajeschräwen haud. Dise Fliet wia uk opp äare Nokomen un opp dee waut sikj an aunschluten wudden.

²⁸Dise twee Doag wudd jieda Famielje en jieda Staut un Prowins derch aule Jennerazionen em Denkj hoolen un biebehoolen. De Puriemdoag sullen nienich tosied faulen mank de Juden, un nienich opphieren mank äare Nokomen.

²⁹De Kjennijin Ester, Abihajil siene Dochta, un Mordechai schreewen noch eenen Breef äwa daut Puriemfast, daut et sull jehoolen woaren.

³⁰Äa Breef wia no aule Juden jeschräwen, un jinkj no aule 127 Prowinsen en Ahasveros sien Rikj. See wenschten an Fräd un eenen sechren Toostaunt,

³¹un bestalden, daut see un äare Nokomen daut Puriemfast emma to rajchte Tiet hoolen sullen, krakjt soo aus see de Räajlen toom fausten un truaren aunjenomen hauden. Beid Mordechai, de Jud, un de Kjennijin Ester velangden dit von an.

³²Ester äa Breef deed de Puriem Väaschreften goot heeten. Äa Breef wort en een besondret Buak nenjefieet.