Read Plautdietsch (Low German) – De Bibel 2. Mose 12 Bible Online

2. Mose 12 - Plautdietsch (Low German) – De Bibel bible

2. Mose 12

¹De HAR räd to Moses un Aaron en Ägipten un säd:

²Dise Moonat saul fa junt de Aunfank vom Joa sennen. Dit es de ieeschte Moonat em Joa.

³Saj de gaunze Jemeenschoft von Israeliten, daut aun däm tieenden Dach von dise Moonat saul een jieda Voda fa siene Famielje een Laum nämen. Een Laum fa eene Famielje.

⁴Un wan dee, dee en sien Hus sent, too weinich sent fa een gaunzet Laum, dan sellen see daut met dän notsten Noba endeelen. Doano wooväl Menschen doa äten woaren, sell jie daut toomäten.

⁵Daut saul een eenjoaschet sennen, daut kjeen Fäla haft, een Schopsbock ooda een Kosenbock.

⁶Jie sellen dän bat däm 14. von de Moonat besorjen, un dan sellen de Vodasch von de Jemeenschoft en Israel, dän bie Owentroot schlachten.

⁷Jie sellen von daut Bloot nämen, un daut aun beid Sieden aun de Däarenrämes schmäaren, un uk aum Koppstekj aun bowakaunt Däa, aun daut Hus wua daut Laum jejäten woat.

⁸Jie sellen en dee Nacht daut Fleesch opp een Fia baken, un daut oppäten. Jie sellen daut met onjesuadet Broot un betre Kjriedarie äten.

⁹Jie sellen daut Laum nich reiw äten, ooda en Wota koaken. Daut saul äwa een Fia jebakt woaren, met Kopp un Been un daut bennaschte.

¹⁰Jie sellen nuscht äwaloten bat aum Morjen, un wan doa doch waut bat aum Morjen blift, sell jie daut met Fia vebrennen.

¹¹Un wan jie daut äten, sell jie soo aunjetrocken sennen, daut jie gaunz reed toom reisen sent, daut Footich aun de Feet, un dän Stock enne Haunt. Jie sellen daut bosich äten. Dit es daut Passamol fa däm HARN.

¹²Ekj woa en dee Nacht derch Ägipten gonen, un woa daut ieeschtjebuarne mank Menschen un Tieren doot moaken. Un opp aule ägiptische Jetta woa ekj mien Uadeel komen loten. Ekj sie de HAR.

¹³Daut Bloot aun june Hiesa woat een Tieekjen sennen, wua jie wonen. Wan ekj daut Bloot see, woa ekj bie junt vebie gonen. Kjeen vedoawen woat mank junt komen, wan ekj met miene Strof opp Ägipten kom.

¹⁴Dis Dach es fa junt een Dach toom aundenkjen. Jie sellen dän soo hoolen aus een Fast fa däm HARN. Opp aule Tieden sell jie dän hoolen, emma wajch.

¹⁵Säwen Doag sell jie onjesuadet Broot äten. Dän ieeschten Dach fuaz, sell jie aulet Suastoff von june Hiesa wajch doonen, un wan irjent wäa en de säwen Doag sull jesuadet Broot äten, dämjanjen sell jie ut de Jemeenschoft rutsaten.

¹⁶De ieeschta Dach saul een heiljet Toopkomen sennen, un de säwenda Dach saul een heiljet Toopkomen sennen. En dee Doag sell jie nich oabeiden; jie sellen dan bloos soo väl oabeiden, daut jie äten oppem Desch kjrieen.

¹⁷Jie sellen daut Fast met daut onjesuade Broot jieda Joa hoolen, wäajen aun disen Dach brocht ekj aul june Stam ut Ägipten rut. Doawäajen sell jie disen Dach emma wada fieren, eena dee emma eenen Wieet haft.

¹⁸En de ieeschte Moonat sell jie vom 14. bat däm 21. Dach aule Owent onjesuadet Broot äten.

¹⁹Fa säwen Doag, saul kjeen Suastoff en june Hiesa to finjen sennen. Wan irjent wäa waut enjesuadet at, krakjt eendoont auf daut een framda ooda een Enwona em Launt es, däm sell jie ut de Jemeenschoft von Israel rut saten.

²⁰Kjeena en aul june Hiesa doaf jesuadet Broot äten. Jie sellen onjesuadet Broot äten.

²¹Dan roopt Moses aule Leida von Israel toop un säd: Läst junt een junget Schop ooda eene junge Kos ut fa june Famielje, un schlacht daut fa daut Passamol.

²²Nämt een Wesch von Iessoppstruck, un dukt daut en de Bloot Komm, un schmäat daut aum Koppstekj un aun beid Rämes aun de Däa. Kjeena doaf derch dee Däa rutgonen, bat aum Morjen.

²³Un wan de HAR vebie kjemt, de ieeschtjebuarne Ägipta to strofen, dan woat hee daut Bloot aun de Däarenrämes seenen, un dan woat hee bie dee Däa vebie gonen. Hee woat dän Vedoawa nich loten en daut Hus nengonen, un doa wäm schlonen.

²⁴Dit Fast sell jie sea krakjt hoolen, jie un june Nokomen, opp aule Tieden.

²⁵Un wan jie ieescht en daut Launt nenn komen, woont de HAR junt jäwen woat, soo aus hee jesajcht haft, dan hoolt dise Heljedoag.

²⁶Un wan daut soo romkjemt, daut june Kjinja junt froagen: Waut bedieden junt dise Heljedoag?

²⁷dan sajcht an: Dit Opfalaum es een Passafast fa däm HARN, toom aundenkjen aus de HAR bie de Hiesa von de Israeliten en Ägipten vebie jinkj. Hee jinkj derch daut Launt un schluach de ieeschtjebuarne Ägipta doot, un bie onse Hiesa jinkj hee vebie. Un daut Volkj kjneed em Jebäd.

²⁸De Israeliten jinjen, un muaken daut krakjt soo aus de HAR Moses un Aaron daut jesajcht haud.

²⁹Medden en dee Nacht, kjeem de HAR un schluach jieda Ieeschtjebuarnen, vom Ieeschtjebuarnen vom Kjennich, dee opp een Troon saut, bat opp dän Ieeschtjebuarnen von däm, dee em Jefenkjnis saut, un uk jieda ieeschtet junget vom Vee.

³⁰Medden en de Nacht stunt de Kjennich opp, soo aus uk aul siene Rejierungs Mana, un aule Ägipta. Dee hielden un schrieejen lud. Doa wia uk nich een Hus, wua kjeena jestorwen wia.

³¹Un de Kjennich leet Moses un Aaron enne Nacht sajen: Nu opp, un brinjt junt wajch von mank mien Volkj! Ekj meen nich bloos die, oba aule Israeliten. Got un bät däm HARN aun, soo aus jie jesajcht haben.

³²Nämt Schop un Kosen un Rintvee, krakjt soo aus jie jesajcht haben. Got bloos. Bät uk fa mie om eenen Säajen.

³³De Ägipta porden daut Volkj, daut see sullen schwind daut Launt veloten. Aundasch go wie noch aula doot, meenden see.

³⁴Un see neemen dän Dieech, ea dee vesuat wia, en Bak Kommen dee see mank äare Kjleeda oppe Schulren druagen.

³⁵Un soo aus Moses an jesajcht haud, hauden de Israeliten de Ägipta no Selwa un Golt un Kjleeda jefroacht.

³⁶Un de HAR fieed daut soo daut daut Volkj goot aunjeseenen wia bie de Ägipta, soo daut de Ägipta leicht enwellijden un weinich selfst äwahilden.

³⁷De Israeliten, bie 600.000 Mana, jinjen tofoot von Ramses no Sukkot, Frues un Kjinja nich jetalt.

³⁸Un väle, dee nich Israeliten wieren, jinjen met an met, un sea väl Schop un Kosen un Rintvee.

³⁹Un dän Dieech, dän see von Ägipten brochten, vebakten see en onjesuade Brootkjes, wiels see nich Tiet hauden toom daut loten oppgonen. Soo worden see von Ägipten wajch jedräwen. See hauden kjeene Tiet Äten fa de Reis to moaken.

⁴⁰De Israeliten wieren 430 Joa en Ägipten jewast.

⁴¹Un krakjt aun dän Dach, aus dee 430 Joa to Enj wieren, veleeten aul däm HARN siene Stam Ägipten.

⁴²Jrod soo aus de HAR en dee Nacht woaken deed, soo daut hee an kunn ut Ägipten rut brinjen, soo es dise Nacht fa däm HARN, eene Tiet toom woaken fa aule Israeliten fa aule Tiet.

⁴³De HAR säd to Moses un Aaron: Dit es woo daut Passamol jehoolen saul. Kjeen framda saul von daut äten.

⁴⁴Oba een Sklow, dee betolt es un beschnäden es, dee doaf daut äten.

⁴⁵Soone waut mau eene korte Tiet bie junt wonen, ooda een aunjenomna Kjnajcht, saul daut nich äten.

⁴⁶Jie sellen daut en een Hus äten. Nämt daut Fleesch nich utem Hus rut. Jie sellen kjeen Knoaken von däm tweibräakjen.

⁴⁷De gaunze Jemeenschoft von Israeliten saul dit mol fieren.

⁴⁸Un wan doa framde mank junt sent, dee daut Passamol fa däm HARN fieren wellen, dan beschniet aule Mana un Junges, un dan derwen see metfieren, soo aus een jebuarna Israelit. Oba een jiedra, dee nich beschnäden es, saul nich doavon äten.

⁴⁹Eent un daut selwje Jesaz hoolt fa eenen jiedren, eendoont auf dee von junt es, ooda auf daut een framda es.

⁵⁰Aule Israeliten muaken daut krakjt soo aus de HAR Moses un Aaron daut väajesajcht haud.

⁵¹Daut wia aun dän selwjen Dach, daut de HAR aul de Stam von de Israeliten ut Ägipten rutbrocht.