Read Plautdietsch (Low German) – De Bibel 2. Mose 15 Bible Online

2. Mose 15 - Plautdietsch (Low German) – De Bibel bible

2. Mose 15

¹Aus dit aula wort, sungen Moses un de Israeliten dit Leet fa däm HARN: Ekj woa vom HARN sinjen; hee haft waut groosoatjet jedonen; hee haft Pieed un Ritta em Mäa jeschmäten.

²Met däm HARN sie ekj stoakj, wäajen däm HARN sinj ekj, de HAR haft mie jerat. Hee es mien Gott, un am well ekj preisen. Hee es mien Voda sien Gott; ekj woa am huach achten.

³De HAR es een Kjrieja, sien Nomen es HAR.

⁴Däm Kjennich siene Kjrichswoages un Armee haft hee em Mäa jeschmäten, siene huach aunjestalde vesoopen em Schelpmäa.

⁵Deepet Wota rand äwa an äwa, un see vesunken aus Steena.

⁶Diene rajchte Haunt, HAR, es groosoatich stoakj; met diene rajchte Haunt, HAR, drekjst du dän Fient dol.

⁷En diene groosoatje Majestät schmeetst du dee, waut jäajen die wieren, dol; aus du dienen Oaja loos leetst, veweschst du dän Fient, soo aus Fia daut Stoppel vewescht.

⁸Met eenen Puff ut diene Näs, klompst du daut Wota opp, un dan stunt daut aus eene Waunt; daut deepe Mäa wia jeronnen.

⁹De Fient pucht noch: Ekj woa de Israeliten hinjaraun joagen un enholen, ekj woa mie äare wieetvolle Sachen toodeelen; ekj woa mie aun an volfräten; ekj woa an met mien Schwieet venichten.

¹⁰Du deetst met dien Odem blosen, un dan bedakjt an daut Mäa; dee vesunken aus Blie en een deepet Wota.

¹¹Woona von de Jetta es soo aus du, HAR? Wäm siene heilje Städ es soo groosoatich; wäa es soo harlich un soo to bewundren? Wäa deit soone Wunda?

¹²Du strakjst diene Haunt ut, un doamet veschlukt de Ieed an.

¹³Met truhoatje Leew leitst du daut Volkj, woont du friejemoakt hast; met diene Krauft wiests du an no dien heiljet Tus.

¹⁴De Lenda haben jehieet, un de Filista fercht daut;

¹⁵De Volkjsleida en Edom schudat daut; de Leidasch en Moab sent met Forcht benomen; de Kanaanita vejinkj de Moot.

¹⁶Groote Forcht woat opp an komen. See woaren onverieet aus een Steen sennen, wäajen diene groote Krauft, HAR, bat daut Volkj woont du jerat hast, gaunz vebie gonen kaun.

¹⁷Du brinjst an gaunz bat opp däm Boajch, dee dien Oafgoot es, un plaunst an. Daut es de Städ, HAR, wua du wonen woascht, daut Heilichtum, HAR, daut du met diene Henj jebut hast.

¹⁸De HAR woat von emma bat opp emma rejieren!

¹⁹Aus däm Kjennich siene Pieed un Woages un Ritta em Mäa nenn jinjen, dan brocht de HAR daut gaunze Mäa trigj äwa an. Oba de Israeliten jinjen derch daut Mäa, opp drieejen Boddem.

²⁰Dan neem Mirjam, de Profeetin, dee Aaron siene Sesta wia, eene Drommel enne Haunt. Un aule Frulied jinjen ar hinjaraun met äare Drommeln un äaren Daunz.

²¹Un Mirjam funk aun to sinjen: Well wie vom HARN sinjen; Hee haft waut groosoatjet jedonen; Hee haft Pieed un Ritta em Mäa jeschmäten.

²²Moses leid de Israeliten vom Schelpmäa no de Schur Wiltnis. See reisden dree Doag enne Wiltnis onen daut see wua Wota fungen.

²³Aus see dan no eene Städ kjeemen, kunnen see daut Wota, waut doa wia, nich drinkjen, wiels daut soo betta wia. See nanden de Städ Mara, wiels daut Wota soo betta wia.

²⁴Daut Volkj grumsaujd to Moses: Waut sell wie drinkjen?

²⁵Un Moses roopt däm HARN aun un de HAR wees am een Stekj Holt, woont Moses dan em Wota nenn schmeet. Un daut Wota wort scheenet Wota. De HAR jeef an doa eene Ordnunk un een Jesaz un hee proowd an auf.

²⁶Hee säd: Wan jie no däm HARN junen Gott krakjt horchen woaren, un daut doonen woaren, waut hee von junt velangt, un jie junt bemieejen woaren, daut to hoolen, waut hee junt väasajcht, dan woaren de Krankheiten, dee ekj äwa de Ägipta brocht, nich opp junt komen. Ekj sie de HAR. Ekj sie dee, dee junt jesunt moakt.

²⁷Dan kjeemen see no Elim. Doa wieren twalw Kjwalen un 70 Paulmbeem. Un see loagaden sikj doa wua daut Wota wia.