Read Plautdietsch (Low German) – De Bibel 2. Mose 23 Bible Online

2. Mose 23 - Plautdietsch (Low German) – De Bibel bible

2. Mose 23

¹Du saust nich eenen faulschen Berecht jäwen. Paus opp daut du die nich latst metschlapen von eenem, soo daut du met waut aundret aus de volle Woarheit em Jerecht väakjemst.

²Lot die nich met eene Grupp metrieten, wan see ojjerajchtet plonen. Wan du ver däm Rechta zeijen deist, bliew bie de Woarheit, un lot die nich von de Meaheit äwafieren, daut orrajchte to doonen.

³Unjastett däm oamen ver daut Jerecht, nich bloos wiels hee oam es.

⁴Wan du dienen Fient sienen Oss ooda Äsel loos sitst, dan brinj däm onbedinjt trigj.

⁵Wan du eenen Äsel sitst, dee aul toopjebroaken es met daut, waut hee drajcht, un de Äsel jehieet eenem, dee die nich lieden kaun, dan lot diene Oabeit, un halp däm Mensch ieescht.

⁶Lot june oame nich ver daut Jerecht too kort komen en daut, wua see een rajcht to haben.

⁷Bliew wiet auf von eene onopprechtje Beschuldjunk. De opprechtja un oschuldja saul nich omjebrocht woaren. Wan wäa aun soont schuldich es, däm woat de HAR nich frie spräakjen.

⁸Lot die nich bekjeepen, wiels doaderch veblenden de Uagen von däm, dee seenen kaun, un vedreien de Wieed vom opprechtjen.

⁹Moakt däm framden nich daut Läwen schwoa. Jie weeten, waut fa een Läwen daut es, wiels jie uk framde wieren en Ägipten.

¹⁰Sas Joa saust diene Flekja beseien un daut arnten waut dee droagen.

¹¹Oba en daut säwende Joa saust du daut broaken un nich beoabeiden, soo daut de oame von jun Volkj äten kjennen, un daut de Tieren, von daut waut äwablift, to fräten haben. Doot daut uk soo met däm Wiengoaden un de Oliewenbeem.

¹²Sas Doag saust du oabeiden, oba aum säwenden saust du aules reiwen loten, soo daut dien Oss un dien Äsel sikj veholen kjennen, un soo daut dien Sklow, dee en dien Hus jebuaren es, un de framda reiwen kjennen.

¹³Hool die aun aul dit waut ekj, de HAR, jesajcht hab, un roopt kjeene aundre Jetta aun. Doot nich emol von dee räden.

¹⁴Dree mol em Joa sell jie een Fast fa mie fieren.

¹⁵Jie sellen daut Fast met daut onjesuade Broot hoolen. Säwen Doag sell jie Broot äten waut onen Suastoff aunjereet es, emma en de selwje Moonat, de Moonat Abib, wiels en dee Moonat kjeem jie ut Ägipten rut. Kjeena doaf ver mie komen, onen waut enne Haunt to brinjen.

¹⁶Jie sellen daut Fast en de Arnttiet hoolen, wan jie de ieeschte Arnten von june Oabeit oppe jeseide Flekja nenn brinjen. Un dan sell jie daut Fast fa daut toopjeläsde fieren aum Enj Joa, wan jie daut latste opp jun Launt von de Beem un Ranken toop jeläst haben, de Frucht von june Oabeit.

¹⁷Dree mol em Joa saul jieda Maun von de Israeliten ver Gott däm HARN komen.

¹⁸Jie derwen nich Suastoff brucken en daut Broot fa daut Mol, wan jie mie daut Blootopfa brinjen. Daut Fat von daut Tia, waut jie mie en een Opfa brinjen, doaf nich bat däm näakjsten Morjen bliewen.

¹⁹Daut baste Poat von daut waut jie daut ieeschte arnten kjennen, sell jie no däm HARN junen Gott sien Hus brinjen. Eene junge Kos saul nich en äare Mutta äare Malkj jekoakt woaren.

²⁰Nu kjikjt! Ekj schekj mienen Enjel ver junt, daut dee no junt oppe Reis oppaussen woat, un junt en daut Launt nenn brinjen woat, daut ekj fa junt reed jemoakt hab.

²¹Horcht no däm, un doot waut hee sajcht. Siet am nich jäajenaun, wäajen hee vejeft de wadaspanstje nich. Hee drajcht mienen Nomen.

²²Nu wan jie oppmoakjsom no daut horchen waut hee sajcht, un aules doonen woaren, waut ekj saj, dan woa ekj een Fient sennen fa june Fiend, un jäajen dee sennen, dee junt jäajenaun sent.

²³Mien Enjel woat junt veropp gonen, un junt en de Jäajenden von de Amorita, de Hetita, de Perisita, de Kanaanita, de Hiwita un de Jebusita nenn brinjen. Un ekj woa de Velkja doabennen venichten.

²⁴Kjneet junt nich ver äare Jetta un bät dee nich aun. Nämt junt nich äare Sitten aun. Jie sellen äare Jetta un Denkjmol dolbräakjen.

²⁵Jie sellen mie, däm HARN junen Gott, deenen. Un ekj woa mienen Säajen opp jun Äten un jun Wota jäwen, un de Krankheiten von junt wajchhoolen.

²⁶Kjeene Fru woat onfruchtboa bliewen mank junt, un kjeene woat eene Stelp lieden. Du woascht de volle Mot von diene Doag kjrieen.

²⁷Soo aus jie verwoats gonen, woat eene Forcht von mie veropp gonen, un daut Volkj jäajen woont jie gonen, woa ekj en eenen Wirwoa saten. Aul june Fiend woaren äare Rigjes no junt dreien.

²⁸De Hiwita, Kanaanita, un Hetita woaren ut Schrakj soo vewilren, daut see sikj ver junt oppe Flucht jäwen woaren.

²⁹Doa woat nich daut gaunze Launt en een Joa junt woaren, sest kunn daut Launt ladich stonen un doaderch met Krut un Tieren äwarant woaren.

³⁰Nä, Beskje bie Beskje woa ekj dee rut driewen, doano aus jie junt aus een Volkj vemieren un daut besiedlen kjennen.

³¹June Jrensen woa ekj aum Schelpmäa un aum Meddel Mäa saten un uk bat enne Wiltnis, un aum grooten Riefa de Eufrat. Ekj woa junt loten de Macht haben äwa aul de Enwona dee en daut Launt wonen, soo daut jie dee ver junt rut driewen woaren.

³²Jie sellen kjeenen Bunt moaken met de Lied un uk nich met äare Jetta.

³³Lot dee nich met junt em Launt wonen, soo daut jane junt nich met eemol jäajen mie veleiden. Wan jie junt woaren hanjäwen, dee äare Jetta to deenen, dan woat daut fa junt soo sennen, aus wan junt wudd eena groota Näsrinkj enjespekjt woaren.