Read Plautdietsch (Low German) – De Bibel 2. Mose 27 Bible Online

2. Mose 27 - Plautdietsch (Low German) – De Bibel bible

2. Mose 27

¹Jie sellen eenen Aultoa moaken von Akozjeholt. Dis Aultoa saul em veakaunt, tweeunhaulf Meeta aun jieda Sied un aundathaulw Meeta huach sennen.

²Aun jieda Akj saul dee eene Spetz nopp haben soo aus een Huarn, un daut saul aula eent sennen met däm Aultoa. De Aultoa saul met Brons belajcht.

³Moakt uk Jescher von Brons fa dän Aultoa, soo aus de Auschkjiepen, de Scheflen, de Kommen, de Fleeschgauflen un de Glootpaunen.

⁴Moakt een Mauschendrot von Brons fa däm Aultoa. Moakt doa vea bronsne Rinj aun, eenen opp jieda Akj.

⁵Moakt daut Mauschendrot soo, daut et runtom von de Kaunt rauf henjt.

⁶Moakt uk Stangen von Akozjeholt un met Brons belajcht,

⁷waut en de Rinj oppe Akjen aun twee Sieden nenn paussen, toom dän Aultoa droagen.

⁸De Aultoa saul von Bräda jemoakt, soo daut dee von bennen holl es. Moakt dän krakjt soo aus ekj die daut oppem Boajch wees.

⁹Moakt eenen Hoff fa daut Zelt, de Heilje Woninj. Aun de siedne Kaunt von däm Hoff saul eene Gardien von goodet jesponnenet Lienzeich sennen, 50 Meeta lank.

¹⁰Henjt dise Gardien met selwane Hoakes aun 20 Past, dee jieda eenen bronsnen Foot haben.

¹¹Krakjt soo aun de nuadne Sied, henjt eene 50 Meeta lange Gardien, opp 20 Past met äare Feet.

¹²Aun daut wastne Enj saul eene Gardien, dee 25 Meeta lank es opp tieen Past jehongen. Jieda Post haft eenen Foot.

¹³Un aum oostnen Enj, wua de Sonn oppjeit, moakt dän Hoff uk 25 Meeta breet.

¹⁴De Gardien aun de eene Sied vom Engank saul säwenunhaulf Meeta lank sennen, un opp dree Past stonen, jieda met eenen Foot.

¹⁵Aun de aundre Sied Engank, saul krakjt soo eene säwenunhaulf Meeta lange Gardien opp dree Past met äare Feet sennen.

¹⁶De Engank toom Hoff es tieen Meeta breet. De Gardien doatoo saul von bleiwe, bleiwroode un kloa roode Woll un goodet jesponnenet Lienzeich sennen un en Mostasch jewowen. Dise Enganks Gardien saul opp vea Past met äare Feet henjen.

¹⁷Aul de Past en dän Hoff sellen selwane Hoakes haben, dee met selwane Strämels faust jemoakt sent, un sellen bronsne Feet haben.

¹⁸De gaunza Hoff saul dan 50 Meeta lank un 25 Meeta breet sennen, un saul eene tweeunhaulf Meeta huage butaschte Gardien haben, dee von goodet jesponnenet Lienzeich jemoakt es. De Gardien saul opp tweeunhaulf meetaje Past henjen, dee jieda eenen bronsnen Foot haben.

¹⁹Aul daut Toobehia toom Zelt, krakjt eendoont wuatoo daut es, un aule Zeltstekjels un Stekjels fa dän Hoff, sellen von Brons jemoakt.

²⁰Un saj de Israeliten, daut see sellen reine Eelj von jepraste Oliewen brinjen, soo daut et emma reed es fa de Laumpen, dee vom Owent bat aum Morjen em Vesaumlungszelt brennen sellen.

²¹Ver de Gardien, dee ver de Kjist met de Jebooten es, doa ver däm HARN, sellen Aaron un siene Säns de Laump emma von Owent bat zemorjes aum brennen haben. Dit es eene Väaschreft vom HARN, dee jie Israeliten derch aul june Tieden hoolen sellen.