Read Plautdietsch (Low German) – De Bibel 2. Mose 30 Bible Online

2. Mose 30 - Plautdietsch (Low German) – De Bibel bible

2. Mose 30

¹Jie sellen eenen Aultoa toom Weiruak brennen moaken. Dee saul von Akozjeholt jemoakt woaren.

²But däm em veakaunt, een haulwet Meeta aun jieda Sied, un een Meeta huach. De Aultoa un de Spetzen oppe Akjen sellen en eent jebut.

³Belajcht däm met Golt von bowen, von de Sieden un äwa de Spetzen oppe Akjen. Runtom saul dee eenen goldnen Raunt haben.

⁴Unja dän Raunt aun eene Sied, lot twee goldne Rinj aunmoaken. Jäajenäwa von dee, aun dee aundre Sied moak uk wada twee goldne Rinj aun. Dee sent doa fa de Stangen, toom däm Aultoa droagen.

⁵Moakt uk de Droagstangen von Akozjeholt un belajcht dee met Golt.

⁶Sat dän Aultoa ver de Gardien, dee de Kjist met de Jebooten un daut Veseenungsdakjsel bedakjt. Daut Dakjsel es, wua ekj die trafen woa.

⁷Aaron saul jieda Morjen, wan hee jeit de Laumpen besorjen, opp disen Aultoa Weiruak brennen,

⁸krakjt soo aus jieda Owent, wan hee de Laumpen aunstekjt. Jie sellen bestendich tweemol dän Dach, en aul june Tieden, emma wada ver däm HARN Weiruak brennen.

⁹Opp disen Aultoa saul bloos de väajeschräwna Weiruak jebrent woaren, un nienich een Brauntopfa ooda een Ätesopfa ooda Drinkjopfa.

¹⁰Een mol em Joa saul Aaron aun de Spetzen vom Aultoa de Veseenunk derchfieren. Jieda Joa saul hee de Spetzen met daut Bloot vom Veseenungs Sindopfa bestrikjen. Doot dit derch aul june Tieden. Dit es däm HARN hechst heilich.

¹¹De HAR säd to Moses:

¹²Wan du de Israeliten auftalen deist, saul een jiedra däm HARN waut Leesjelt jäwen fa sien Läwen, wan hee jetalt woat. Dan woat kjeene Ploag opp an komen, wan see jetalt woaren.

¹³De Tolinj saul een haulwet Selwastekj sennen, doano aus enne Heilje Stow Selwastekja jewoagen woaren. Doa es een Selwastekj twalf Graum. Een haulwet Selwastekj es een Opfa fa däm HARN.

¹⁴Een jiedra, dee 20 Joa ooda mea es, saul dise Gow, aus sien Opfa fa däm HARN, jäwen.

¹⁵Een rikja saul nich mea jäwen, un de oama saul nich weinja aus een haulwet Selwastekj jäwen. Dit woat jun Läwen met däm HARN veseenen.

¹⁶Daut Leesjelt waut soo toopkjemt, saust du fa Onkosten bie daut Vesaumlungszelt brucken. Dit woat fa däm HARN een Aundenkjen aun de Israeliten sennen un woat junt met am veseenen.

¹⁷Dan säd de HAR to Moses:

¹⁸Moakt uk eene Wauschkomm un een Foot doatoo von Brons, un sat dee tweschen daut Vesaumlungszelt un däm Brauntopfa Aultoa. Jeet doa Wota nenn,

¹⁹daut Aaron un siene Säns sikj kjennen de Henj un de Feet wauschen.

²⁰Wan see em Vesaumlungszelt gonen, ooda wan see dicht biem Aultoa komen, om to deenen met een Opfafia fa däm HARN, sellen see sikj doa wauschen. Dit es doatoo, daut de Doot an nich doabie trafen woat.

²¹See sellen sikj Henj un Feet wauschen, soo daut de Doot an nich doabie trafen woat. Dit sellen Aaron un siene Nokomen fa aule Tieden soo biehoolen.

²²Wieda säd de HAR to Moses:

²³Besorj die wieetvolle Jewerzen. Nemm sas Kilo flissendje Mirren, dree Kilo Kerneel, dree Kilo Rua

²⁴un dree Kilo Kassia, aula soo jewoagen aus enne Heilje Stow, un dan uk noch fief Lieta Olieweneelj.

²⁵Lot eenen erfoarnen Parfummoaka eene Saulweelj doavon moaken, dee mie jeheilicht es.

²⁶Saulw daut Vesaumlungszelt un uk de Kjist met de Jebooten doamet en.

²⁷Saulw uk dän Desch un daut Toobehia doatoo, dän Laumpenhoola un daut Toobehia fa dän, dän Ruakopfa Aultoa,

²⁸dän Brauntopfa Aultoa met daut Toobehia fa dän, un de Wauschkomm un sienen Foot.

²⁹Soo saust du dee enweien. Dee woaren gaunz heilich sennen. Wan irjent wäa däm woat aunschieren, woat dee uk heilich sennen.

³⁰Saulw Aaron un siene Säns en, wan du dee toom Priesta Deenst ensäajnen deist.

³¹Saj de Israeliten, daut mie dise Eelj heilich es, un emma sennen woat.

³²Lot dise Saulweelj nich jrod soo opp irjent eenem komen. Kjeena doaf krakjt soone Eelj tooprieren fa jeweeneljen Jebruck. Dee doaf bloos fa heilje Zeremonieen jebrukt. Dee saul junt heilich sennen.

³³Sull wäa soone Saulweelj tooprieren, ooda dise Saulweelj fa waut jemeenet brucken, deejanja saul utem Volkj rut jesat woaren.

³⁴Wieda säd de HAR to Moses: Saumel scheenrikjende Kjriedarie: Kjeen, Muschelschal, Galbanem, un de reine Kjeeneelj, jlikje väl von jiedret,

³⁵un lot een erfoarna Parfummoaka dit tooprieren un solten. Dis scheenrikjenda Weiruak es rein un heilich.

³⁶Riew waut doavon to Pulwa un sat daut ver de Bundeskjist em Vesaumlungszelt, wua ekj met die toopkomen woa. Dis Weiruak saul junt heilich sennen.

³⁷Jie derwen daut nich fa junt selfst moaken. Daut es fa däm HARN heilich.

³⁸Sull emol eena soon scheenrikjenden Weiruak fa sikj moaken, deejanja saul utem Volkj rut jesat woaren.