Read Plautdietsch (Low German) – De Bibel 2. Mose 31 Bible Online

2. Mose 31 - Plautdietsch (Low German) – De Bibel bible

2. Mose 31

¹De HAR säd to Moses:

²Horch emol! Ekj hab Bezalel, dee Uri sien Sän un Hur sien Grootsän es, von em Staum Juda, beroopen.

³Ekj hab am met Gott sienen Jeist jefelt, daut hee fäich un weis es de Oabeit jeschekjt wiedatostalen.

⁴Hee woat straume Oabeit met Golt, Selwa, un Brons häastalen,

⁵un uk wieetvolle Steena schnitzen un krakjte Holtoabeit doonen, un veschiednet aundret soont.

⁶Un dan hab ekj uk noch Oholiab beroopen. Dee es Ahisamach, vom Staum Dan, sien Sän. Bezalel un Oholiab un äare Oabeida hab ekj fäich jemoakt, daut see aul dit moaken kjennen, waut ekj väajeschräwen hab

⁷fa daut Vesaumlungszelt, de Kjist met de Jebooten un daut Veseenungsdakjsel, un waut sest noch to daut Zelt jehieet.

⁸See woaren uk dän Desch met sien Toobehia, dän goldnen Laumpenhoola met sien Toobehia, dän Ruakopfa Aultoa,

⁹dän Brauntopfa Aultoa met sien Toobehia un uk de Wauschkomm un dän Foot moaken.

¹⁰See sellen de jewowne Kjleeda moaken, de enjeweide Kjleeda fa däm Priesta Aaron un de Priesta Kjleeda fa siene Säns.

¹¹Un see sellen de Saulweelj un dän scheenrikjenden Weiruak fa de Heilje Stow moaken. See sellen dee krakjt soo moaken aus daut väajeschräwen es.

¹²Un de HAR säd to Moses:

¹³Saj de Israeliten, daut see sellen miene Sabaten hoolen. Dit es een Tieekjen tweschen mie un junt fa aule Tieden, daut ekj de HAR sie, dee, dee junt heilich moakt.

¹⁴Hoolt dän Sabat. Daut es een heilja Dach. Wäa dän jemeen helt saul stoawen. Un wäa aum Sabat Oabeit deit, saul utem Volkj rut jesat woaren.

¹⁵Sas Doag derw jie oabeiden, oba de Sabat, de säwenda Dach, es heilich, un aun däm sell jie von de Oabeit reiwen. Jieda eena, dee aum Sabat oabeit, saul stoawen.

¹⁶Jie Israeliten sellen dän Sabat hoolen derch aul june Tieden, aus een Bunt, dee opp emma helt.

¹⁷Sabat hoolen es een Tieekjen tweschen mie un de Israeliten opp aule Tieden. De HAR haft en sas Doag, Himmel un Ieed jemoakt, un aum säwenden schauft hee nich. Dan reiwd hee.

¹⁸Aus de HAR opp dän Sinai Boajch met Moses foadich jerät haud, jeef hee am twee Steentoflen, dee doa beweesen waut sien Wuat wia. Gott haud met sienen Finja opp de Toflen jeschräwen.