Read Plautdietsch (Low German) – De Bibel 2. Mose 37 Bible Online

2. Mose 37 - Plautdietsch (Low German) – De Bibel bible

2. Mose 37

¹Bezalel muak de Bundeskjist von Akozjeholt. De Kjist wia een un een vieedel Meeta lank, dreevieedel Meeta breet un dreevieedel Meeta huach.

²Hee un siene Oabeida beläden dee von bennen un von buten met reinet Golt, un see muaken aun de bowakaunt eene goldne Leest.

³Opp jieda Akj wort een goldna Rinkj aunjemoakt, twee aun eene Sied un twee aun de aundre.

⁴Dan muaken see Droagstangen von Akozjeholt un beläden dee met Golt.

⁵Eene Droagstang wort aun jieda Sied enne Rinj nenn jepaust, soo daut see de Kjist doamet droagen kunnen.

⁶See muaken daut Veseenungsdakjsel, uk von reinet Golt, een un een vieedel Meeta lank, un dreevieedel Meeta breet.

⁷Dan muaken see de twee Cheruben, von jekloptet Golt, eenen opp jieda Enj vom Dakjsel.

⁸De Cheruben opp de twee Enja wieren en eent met daut Dakjsel jemoakt,

⁹un äare Flichten wieren oppjehowen un bedakjten daut Dakjsel. De Cheruben stunden eena nom aundren opptoo jerecht, un see kjikjten no daut Dakjsel.

¹⁰See muaken dan dän Desch von Akozjeholt. Dee wia een Meeta lank, een haulwet Meeta breet un dreevieedel Meeta huach.

¹¹Dee wort gaunz met reinet Golt belajcht. De Desch haud eene straume goldne Leest runtom,

¹²un dan noch eenen Raunt, aus Hauntbreet huach, met eene straume goldne Leest doaraun.

¹³Aun beid Kaunten vom Desch wort een goldna Rinkj opp de Akjen aun de Feet naun jemoakt.

¹⁴Dee worden ernoa huach, dicht biem Raunt, aunjemoakt un wieren toom dän Desch droagen.

¹⁵De Droagstangen toom dän Desch droagen worden von Akozjeholt jemoakt un met Golt belajcht.

¹⁶See muaken uk de Kommen un Schiewen un de Kaunen un Läpels fa daut Drinkjopfa, aula von Golt.

¹⁷See muaken dän Laumpenhoola von reinet jekloptet Golt. Daut Meddelstekj un de Foot, toop met de bloomje Kuffels un äare Knoppes un Blieechsels, wieren aula een Stekj.

¹⁸Doa wieren sas Oarms aum Laumpenhoola, dree aun jieda Sied.

¹⁹Doa wieren dree bloomje Kuffels, een jiedat met Knoppes un Blieechsels, aun jieda Oarm,

²⁰un vea von dise bloomje Kuffels aum Meddelstekj,

²¹emma eent jrod unja de Städ wua twee Oarms aum Meddelstekj naun kjeemen.

²²De gaunza Laumpenhoola met Meddelstekj, Foot, Oarms, un de bloomje Kuffels wia aula een Stekj jekloptet Golt.

²³See muaken uk de säwen Laumpen von Golt, un uk de Scheeren toom de Dochten bekjnipsen, un de Schiewen toom de Scheeren hoolen.

²⁴Bezalel brukt 35 Kilo reinet Golt om däm Laumpenhoola un aul daut Toobehia doatoo to moaken.

²⁵See muaken uk dän Ruakopfa Aultoa. Dee wort von Akozjeholt jemoakt met de Mot von een haulwet Meeta bie een haulwet Meeta, un een Meeta huach. De Aultoa wort en eent met de Spetzen opp de Akjen jemoakt.

²⁶Dee wort dan uk met Golt belajcht von bowen, von de Sieden un äwa de Spetzen, un runtom kjrieech dee eene goldne Leest.

²⁷Jrod unja de Leest worden, aun twee Sieden, dee eena jäajenäwa vom aundren wieren, twee goldne Rinj aunjebrocht, wua de Droagstangen nenn pausten toom dän Aultoa droagen.

²⁸De Droagstangen wieren von Akozjeholt jemoakt un met Golt belajcht.

²⁹See muaken uk de heilje Saulweelj un dän reinen scheenrikjenden Weiruak. Dit wort von soone jemoakt dee ea doamet jeoabeit hauden.