Read Plautdietsch (Low German) – De Bibel 2. Mose 4 Bible Online

2. Mose 4 - Plautdietsch (Low German) – De Bibel bible

2. Mose 4

¹Moses säd: Ei wan see mie nich jleewen, un nich no mie horchen? Ei wan see sajen: Du hast goanich däm HARN jeseenen.

²Un de HAR säd: Waut hast du en diene Haunt? Un Moses säd: Eenen Stock.

³Un de HAR säd: Schmiet däm oppe Ieed. Moses schmeet däm oppe Ieed, un doa wia de Stock eene Schlang. Un Moses rand von de Schlang wajch.

⁴De HAR säd to Moses: Strakj diene Haunt ut un jriep dee biem Zoagel. Un hee strakjt dee ut un foot dee faust aun. Doamet haud hee sienen Stock enne Haunt.

⁵Un de HAR säd: Dit es, daut see uk secha weeten woaren, daut de Gott aun dän äare Vodasch jleewden, Abraham, Isaak, un Jakob äa Gott, sikj die jewäsen haft.

⁶Un de HAR säd to am: Stakj diene Haunt hinja dien Mauntel. Un Moses deed daut, un aus hee dee trigj rutneem, wia siene Haunt schneeich voll Lepra Krankheit.

⁷Un hee säd: Stopp dee noch eemol doa nenn. Un hee stopt dee wada en sien Mauntel. Aus hee dee rut neem, wia de Haunt soo jesunt aus siene äwaje Hut.

⁸Un Gott säd: Wan see daut ieeschte Tieekjen nich jleewen un nich no die horchen, dan woaren see veleicht no daut tweede.

⁹Un wan see dee beid nich jleewen, un nich no die horchen, dan nemm waut Wota vom Niel, un jeet daut oppe Ieed. Un daut Wota von en däm Riefa woat oppe Ieed Bloot sennen.

¹⁰Un Moses säd to däm HARN: Oba mien Har! Ekj sie nich eena dee goot räden kaun, un sie uk noch nienich jewast. Un uk nu, daut du to dienen Deena rätst, es daut nich bäta jeworden. Ekj kaun bloos nich goot räden, ooda mie kloa utspräakjen.

¹¹Un de HAR säd to am: Wäa haft däm Mensch daut räden jejäft? Un wäa moakt een Mensch stomm ooda doof, ooda daut hee seenen kaun ooda nich? Ekj, de HAR, doo daut doch.

¹²Nu go! Ekj selfst woa die räden halpen, un die unjarechten waut du sajen saust.

¹³Moses säd: Mien Har, hool dit nich jäajen mie, oba schekj eenen aundren, krakjt soonen aus du west.

¹⁴Dan wort de HAR kort met Moses un säd: Hast du nich een Brooda Aaron, eena von däm Staum Levi? Ekj weet, dee kaun goot räden. Un weetst uk waut, dee kjemt die besieekjen, un wan dee die sitt, woat hee sikj sea freien.

¹⁵Du woascht to am räden un am de Wieed jäwen, dee hee räden saul, un ekj woa junt beid räden halpen, un junt wiesen waut jie doonen sellen.

¹⁶Hee woat fa die to daut Volkj räden, un daut woat soo sennen, aus wan hee daut Mul fa die es, un du aus een Gott fa am.

¹⁷Oba nemm disen Stock met, daut du met däm kaust de Wunda doonen, dee ekj die jeef.

¹⁸Dan jinkj Moses wada no sienen Schwieevoda, Jitro, un säd däm: Lot mie trigj no miene Lied en Ägipten gonen, un seenen auf dee noch aum Läwen sent. Jitro säd to Moses: Go, ekj wensch die eene goode Reis.

¹⁹Un de HAR säd to Moses en Midian: Go trigj no Ägipten. Dee, dee die no daut Läwen stunden, sent aula jestorwen.

²⁰Dan neem Moses siene Fru un Junges un leet dee opp eenen Äsel rieden, un see jinjen aula auf trigj no Ägipten. En siene Haunt haud hee dän Stock von Gott.

²¹De HAR säd to Moses: Wan du ieescht trigj no Ägipten kjemst, dan wies däm Kjennich aul de Wunda, woone ekj fa die mäajlich jemoakt hab. Oba ekj woa am soo hoat jäajen junt enstalen, daut hee daut Volkj nich woat gonen loten.

²²Du woascht däm Kjennich sajen: Soo haft de HAR jesajcht: Israel es mien ieeschtjebuarna Sän,

²³un ekj saj die: Lot mienen Sän gonen, daut hee mie deenen kaun. Wan du daut nich loten woascht, dan paus opp, dan woa ekj dienen ieeschtjebuarnen daut Läwen nämen.

²⁴Aus Moses un siene Famielje hinjawäajes wieren, neem sikj daut soo rom, aus see äwa Nacht bleewen, daut de HAR no Moses kjeem, un wull am daut Läwen nämen.

²⁵Dan neem Zippora eenen schoapen Steen un beschneet äaren Sän, un schieed met de aufjeschnädne Hut, Moses siene Feet aun. Un see säd: Du best doch een Blootbriegaum to mie.

²⁶Doamet schoond de HAR Moses. See säd Blootbriegaum, wiels aus Moses siene Fru, deed see dän Sän en Moses siene Städ beschnieden.

²⁷Nu säd de HAR to Aaron: Go emol no de Wiltnis, daut du Moses trafen kaust. Un hee jinkj un troff am bie däm Gottesboajch, un hee kust am.

²⁸Moses vetald Aaron, aules waut de HAR am oppjelajcht haud, un uk aul de Tieekjens, dee hee doonen sull.

²⁹Moses un Aaron jinjen no Ägipten, un doa vesaumelden see aule Leida von Israel.

³⁰Un Aaron säd an aules, waut de HAR Moses jesajcht haud, un Moses wees an de Tieekjens.

³¹Un daut Volkj jleewd. Aus see hieeden, daut de HAR om Israel besorcht wia, un daut hee jeseenen haud, woo see jekjwält worden, kjneeden see sikj aula un bäden aun.