Read Plautdietsch (Low German) – De Bibel 2. Mose 6 Bible Online

2. Mose 6 - Plautdietsch (Low German) – De Bibel bible

2. Mose 6

¹Un de HAR säd to Moses: Du woascht noch seenen, waut ekj met däm Kjennich doonen woa. Wäajen miene stoakje Haunt woat hee junt gonen loten, un wäajen miene Macht woat hee junt ut sien Launt rut schekjen.

²Dan säd Gott noch to Moses: Ekj sie de HAR.

³Ekj wees mie Abraham, Isaak, un Jakob aus dän Gott, dee aule Macht haft. Oba bie däm Nomen “HAR”, haben see mie nich jekjant.

⁴Ekj hab uk met an een Bunt jemoakt, daut ekj an daut Launt Kanaan jäwen woa, wua see aus framde wonden.

⁵Un ekj hab uk kloa jehieet, woo de Israeliten stänen unja de schwoare Oabeit, dee de Ägipta an opplajen, un ekj hab nich vejäten, daut ekj een Bunt jemoakt hab.

⁶Doawäajen saj de Israeliten nu: Ekj sie de HAR. Un ekj woa junt von unja de Ägipta äare schwoare Oabeit rut brinjen un woa junt von de Kwol raden, un woa junt halpen met mienen Oarm, dee nich meed woat un met een jewaultjet Uadeel.

⁷Ekj woa junt aunnämen aus mien Volkj, un ekj woa jun Gott sennen, un jie woaren weeten, daut ekj de HAR, jun Gott, sie, dee junt von unja de ägiptische Kwol rut brocht.

⁸Un ekj woa junt no daut Launt nämen, woont ekj vesproaken hab met miene oppjehowne Haunt, daut ekj Abraham, Isaak, un Jakob daut jäwen wudd. Ekj jäw junt daut, daut et junt sennen saul. Ekj sie de HAR.

⁹Moses säd dit aula to de Israeliten, oba see horchten doa nich no, wiels see soo doljeschloagen wieren en de Kwol.

¹⁰Dan säd de HAR to Moses:

¹¹Go saj däm ägiptischen Kjennich: Lot de Israeliten ut dien Launt rut.

¹²Un Moses, ver däm HARN, säd: Horch emol, de Israeliten rechten sikj nich emol no mie. Dan woat de Kjennich aul secha nich. Mien Mul es nich rein, toom dien Wuat räden.

¹³Un de HAR säd to Moses un Aaron, daut see sullen no de Israeliten un no däm Kjennich gonen, om de Israeliten ut Ägipten rut to brinjen.

¹⁴Dit sent de Staumvodasch von de Volkjsgruppen: Ruben wia Israel sien ieeschta Sän. Ruben siene Säns wieren: Henoch, Palu, Hezron, un Karmi. Dit sent de Famieljes en däm Staum Ruben.

¹⁵Simeon siene Säns wieren: Jemuel, Jamin, Ohad, Jachin, un Zohar, un uk noch Schaul, dee von eene kanaanitische Fru wia. Dit sent de Famieljes en däm Staum Simeon.

¹⁶Levi siene Säns no de Rieej heeten Gerschon, Kehat, un Merari. Levi selfst wort 137 Joa oolt.

¹⁷Gerschon siene Nokomen vedeelden sikj no siene Säns, de Libni un Schimi Famieljes.

¹⁸Kehat siene Säns wieren: Amram, Jizhar, Hebron, un Usiel. Kehat läwd 133 Joa.

¹⁹Merari siene Säns wieren Machli un Muschi. Dit sent aul de Famieljes en däm Staum Levi en onse Bieekja.

²⁰Amram befried sikj met sien Voda siene Sesta Jochebed, un äare Säns wieren Aaron un Moses. Amram läwd 137 Joa.

²¹Jizhar siene Säns wieren: Korach, Nefeg, un Sichri.

²²Usiel siene Säns wieren: Mischael, Elizafan, un Sitri.

²³Aaron befried sikj met Elischeba, Aminadab siene Dochta, un Nachschon siene Sesta. Aaron un Elischeba hauden vea Säns: Nadab, Abihu, Eleasar, un Itamar.

²⁴Korach siene Säns wieren: Asir, Elkana, un Abiasaf. Dise dree sent de korachitische Famieljes.

²⁵Eleasar, Aaron sien Sän, befried sikj met eene von Putiel siene Dajchta. Met ar haud hee Pinhas. Dit sent dan aul de Staumvodasch von de levitische Famieljes.

²⁶Aaron un Moses, von woone hia de Räd wia, sent dee to woone de HAR säd: Brinjt de Israeliten, soo aus äare Stam un Famieljes sent, ut Ägipten rut.

²⁷Dee krakjt räden to däm ägiptischen Kjennich, daut see de Israeliten sullen ut Ägipten rut brinjen.

²⁸Dan kjeem de Dach wua de HAR no Moses en Ägipten kjeem.

²⁹Doa säd de HAR to Moses: Ekj sie de HAR. Saj dän ägiptischen Kjennich, aules waut ekj die sajen woa.

³⁰Oba Moses säd to däm HARN: Mien Mul es nich rein toom dien Wuat räden, un dan woat de Kjennich goanich no mie horchen.