Read Plautdietsch (Low German) – De Bibel Hiob 10 Bible Online

Hiob 10 - Plautdietsch (Low German) – De Bibel bible

Hiob 10

¹Mie es mien Läwen jäajenaun; ekj woa frie doavon räden, woo schwoa daut es, un miene Vetwiewlunk rutkomen loten.

²Ekj woa to Gott sajen: Doo mie nich vedaumen, saj mie wuarom ekj aufjeprooft woa.

³Waut es die daut, daut du mie daut schwoa moakst, daut du daut, waut du jemoakt hast, veachst, un de gottloose äa Väahaben jelinjen latst?

⁴Sent diene Uagen soo aus onse, daut du soo aus Menschen venemst?

⁵Es diene Tiet soo aus onse, läfst du mau soo lang aus Menschen?

⁶Ooda wuarom kjikjst du no miene Schult, un sieekjst no miene Sinden,

⁷wan du weetst daut ekj nich schuldich sie, un daut mie kjeena von diene Macht raden kaun?

⁸Du hast mie met diene Henj jemoakt un hast mie mien Jeschekj jejäft, woascht du die nu von mie wajchdreien un mie vedoawen?

⁹Denkj doaraun, daut du mie von Ieed jemoakt hast. Woascht du mie nu wada loten Ieed woaren?

¹⁰Hast du mie nich utjegoten, soo aus Malkj, un loten saten, soo aus Kjees?

¹¹Du hast daut Fleesch un de Hut äwa mie jetrocken, un mie met Knoakes un Sänen toopjestekjt.

¹²Du jefst mie daut Läwen un diene truhoatje Leew, un derch diene Oppsecht es mien Odem behoolen jebläwen.

¹³Oba en die, wists du waut du deetst; ekj weet, daut du daut em Senn hautst.

¹⁴Wan ekj mie vesindjen wudd, wurscht du oppaussen, un mie nich aus oschuldich aunseenen, wan ekj orrajcht deed.

¹⁵Wan ekj mie veschuljd, wia daut schlemm fa mie; un wan ekj em rajchten wia, kunn ekj mien Kopp nich huach hoolen, wiels ekj beschämt, un met Älent äwaschwommen sie.

¹⁶Un wan ekj mien Kopp huach häw, dan vefolchst du mie aus een Leiw; un wiests diene groosoatje Macht jäajen mie.

¹⁷Du hast emma mea Zeijen jäajen mie, un brinjst eenen jratren Oaja opp mie; du stalst emma wada mea fresche Jäajna jäajen mie.

¹⁸Wuarom hast du mie loten to Welt komen? Wan ekj doch jestorwen wia, daut mie kjeena jeseenen haud,

¹⁹un daut soo met mie jegonen wia, aus met dee, waut verem Tiet stoawen un veschoaft woaren.

²⁰Mien Läwen es aul mau kort, lot mie emol toch, daut ekj mie een bät veholen kaun,

²¹ea ekj wajch mott un nich mea trigj kom. Ekj go no eene Städ wua aules dunkel un diesta es,

²²wua daut stockdiesta es un aules ut Raunt un Baunt es, wua daut Licht gaunz diesta es.