Read Plautdietsch (Low German) – De Bibel Hiob 11 Bible Online

Hiob 11 - Plautdietsch (Low German) – De Bibel bible

Hiob 11

¹Dan säd Zofar von Naama:

²Sull eena nich waut sajen to soo väl Wieed, un es dee, dee väl rät, emma rajcht?

³Sull wie stell sennen, wiels du väl sajchst, un sull kjeena die beschämen wan du spotten deist?

⁴Du sajchst, daut es aula soo aus du daut sajchst, un daut du ver Gott oschuldich best.

⁵Mucht Gott emol sien Mul opmoaken un die waut sajen,

⁶un die weeten loten, woo deep Weisheit es. Doa es mea aus eene Sied to de Weisheit. Jleew daut, daut hee die nich aul diene Sinden väahelt.

⁷Kaust du vestonen, waut Gott weet? Kaust du bat aule Jrensen däm vestonen, dee aule Macht haft?

⁸Siene Weisheit jeit wieda aus bat däm Himmel, waut kaust du doamet doonen? Dee rieekjt wieda aus bat Scheol, waut kaust du doavon weeten?

⁹Dee rieekjt wieda aus de Ieed deit, un es breeda aus daut Mäa.

¹⁰Wan hee wua han jeit un wäm faustnemt, un däm ver Jerecht stalt, wäa kaun am opphoolen?

¹¹Hee weet wäa hinjarigjsch es. Wan doa waut schlajchtet ver am es, woat hee daut nich enwoaren?

¹²De Oschult woat ieescht dan kluak woaren, wan de willa Äsel een Mensch to Welt brinjt.

¹³Oba wan du die met dien Hoat no am dreien woascht, un met diene Henj no am langen woascht,

¹⁴wan du daut schlajchte en diene Haunt oppriemst, un doa kjeene Sind en dien Hus blift,

¹⁵dan kaust du dien Kopp onen eene Sinden Plak huach hoolen, un brow un onen Forcht sennen.

¹⁶Dan woascht du dien Älent vejäten kjennen, soo aus de Äwaschwamunk, dee aufjerant es.

¹⁷Dan wudd die dien Läwen dacha aus opp Meddach sennen, un waut diesta es, wudd oppdachen aus de Morjen.

¹⁸Du wurscht kjennen mootich un voll Hopninj sennen; du wurscht die romkjikjen un ruich schlopen gonen.

¹⁹Du wurscht die utreiwen onen daut die wäa enjst, un väle wudden die aunschmeichlen.

²⁰Oba de gottloose woat daut Uagenlicht vegonen, an woat kjeen Utwajch op bliewen, de latsta Odem es äare eensje Hopninj.