Read Plautdietsch (Low German) – De Bibel Hiob 12 Bible Online

Hiob 12 - Plautdietsch (Low German) – De Bibel bible

Hiob 12

¹Dan säd Hiob:

²Jo, soo sajen de Menschen, un wan jie stoawen woaren, stoaft de Weisheit uk.

³Oba ekj weet uk waut, krakjt soo aus jie, un weet nich weinja aus jie. Wäa wist dit nich aul emma?

⁴Mien ieejna Frint lacht mie ut. Ekj, dee ekj mie opp Gott beroop, un hee mie auntwuaten deit, dee ekj nuscht orrajcht jedonen hab un oschuldich sie, dee woat utjelacht.

⁵Wäa daut leicht haft, spott äwa dän aundren sien Schoden; un jleeft, dee haft dän, wiels dee sikj vestaupt haft.

⁶Oba de Reiba es sikj en siene Bood secha, un dee, dee Gott reizen, haben daut jemietlich; äare ieejne Krauft es äa Gott.

⁷Froag de Tieren, dee woaren die waut lieren; de Väajel enne Loft woaren die sajen;

⁸froag de Plaunten oppe Ieed, dee woaren die belieren, un de Fesch em Mäa woaren die vetalen.

⁹Wäa von dee weet nich daut de HAR met siene Haunt aules jemoakt haft;

¹⁰un daut hee aulet Läwen en siene Haunt helt, un dän Odem von jieda Mensch.

¹¹Krakjt soo aus de Tung daut Äten schmakjt, soo mott daut Ua dän Wieet von Wieed aufschazen.

¹²Es de Weisheit bloos bie de oole to finjen, un kjemt Vestentnis bloos derch een langet Läwen?

¹³Gott haft Weisheit un Jewault, hee haft Rot un een Vestaunt.

¹⁴Wua hee waut dolritt, kaun kjeena wada oppbuen; wäm hee jefangen nemt, kaun kjeen Mensch frie moaken.

¹⁵Wan hee dän Räajen trigjhelt, dan drieecht aules ut; wan hee dän looslat, kaun dee aules omdreien.

¹⁶Hee haft Macht un weet sikj met dee waut sikj vegonen haben, un dee waut aundre to schlajchtet veleiden.

¹⁷Hee lat däm Rotjäwa daumlich woaren, un däm Rechta schoslich woaren.

¹⁸Hee nemt däm Kjennich sien Straums wajch, un jeft am Oabeitskjleeda, soo aus een Deena.

¹⁹Hee lat de Priestasch beschämt woaren, un de Leidasch äare Macht veschwinjen.

²⁰Dee opp woone de Lied sikj veleeten, nemt hee daut räden wajch; un von dee waut Leidasch sent, nemt hee de Weisheit wajch.

²¹Hee lat de Volkjsleida veacht woaren, un de stoakje äare Krauft velieren.

²²Hee openboat waut em diestren vestoaken wia, un brinjt daut waut diesta wia em Licht nenn.

²³Hee lat Velkja to groote Macht komen, un nemt an dee wada wajch; hee lat de Lenda groot woaren, un dan leit dee von daut äaje wajch.

²⁴Hee lat de Leidasch em Launt schoslich woaren, un äaren Wajch velieren wua kjeen Stich es.

²⁵Dee langen hia un doa em diestren rom wua kjeen Licht es; hee lat dee sikj vestaupen aus de bedrunkne.