Read Plautdietsch (Low German) – De Bibel Hiob 17 Bible Online

Hiob 17 - Plautdietsch (Low German) – De Bibel bible

Hiob 17

¹Mie vejeit mien Odem, miene Tiet hia rant auf. De Graufhoff es reed fa mie.

²Ekj weet ekj woa von runtom vespott, ekj kjikj daut too, woo see grumsaujen.

³Du motst fa mie birjen, Gott, wäa woat mie sest noch halpen?

⁴Du hast an nich loten weis woaren, un woascht an nich loten dän Siech haben.

⁵Dee wäa siene Frind oppjeft fa een Stekj Launt, mott seenen woo siene Kjinja lieden.

⁶Hee haft mie loten vespott woaren, see komen un spieen mie em Jesecht.

⁷Miene Uagen sent en mienen Trua meist toojeschwollen, ekj sie soo denn jeworden aus een Schauten.

⁸Wäa sikj jerajcht talt woat mie nich vestonen, dee waut kjeene Schult haben, räajen sikj opp äwa dän gottloosen.

⁹Dee waut daut rajchte deit, woat bestonen bliewen, un wäa oschuldich es, woat emma stoakja.

¹⁰Dreit junt wada häa un komt; ekj woa mank junt nich eenen Weisen finjen.

¹¹Miene Doag sent aufjerant; waut ekj wull, haft nich jeschauft, un ekj wensch mie nuscht mea.

¹²Mie woat jesajcht daut de Nacht de Dach es, un daut daut Licht noda es aus daut dunkle.

¹³Wan ekj daut Grauf saul mien Tus moaken, un mien Bad em diestren saul sennen,

¹⁴wan ekj to daut Grauf saul sajen: Du best mien Voda, un to de Warm: Miene Mutta, ooda: Miene Sesta,

¹⁵waut es daut fa Hopninj fa mie, un wäa jent mie noch irjent waut?

¹⁶Woat mien Troost gaunz stoawen? Woat dee met mie toop en de Ieed vegonen?