Read Plautdietsch (Low German) – De Bibel Hiob 18 Bible Online

Hiob 18 - Plautdietsch (Low German) – De Bibel bible

Hiob 18

¹Dan säd Bildad von Schuach:

²Woo lang well jie no Wieed sieekjen? Äwalajcht daut goot, un dan well wie räden.

³Wuarom woa wie aus Vee jeacht? Jleew jie wie sent nich kluak?

⁴Du ritst die en dienen Oaja selfst en Stekja. Woat de Welt wäajen die opphieren soo to ranen aus emma, ooda de Gruntsteen von siene Städ veschwinjen?

⁵Gaunz secha jeit de gottloose äa Licht ut, un de Flaum von äa Fia dacht nuscht opp;

⁶de Laumpen en äare Woninjen vedunklen, un daut Licht äwa an jeit ut.

⁷Äare stoakje Schräd woaren kjarta, un see faulen en äaren ieejnen Plon dol;

⁸see woaren met äare ieejne Feet em Nat jeschmäten, un gonen wua see sikj faust ranen.

⁹Eene Faul kjricht an bie de Hak to hoolen, un eene Schlenj holt sikj faust rom an;

¹⁰doa es een Strank ver an oppe Ieed vestoaken, un eene Faul opp äaren Stich.

¹¹Hee woat von jieda Sied veenjst; de Forcht es am aun de Haken.

¹²Daut Onheil sieekjt no am, un de Schoden es reed wan hee felt.

¹³De Hut aun sien Kjarpa es nich jesunt, eene schlajchte Krankheit frat aun siene Been;

¹⁴hee woat ut sien jemieteljet Tus jeräten, un enne oajchste Forcht vejoacht.

¹⁵Siene Städ es von dee bewont, waut nich siene sent, un Schwäwelblitt woat doa utjestreit.

¹⁶Dee es soo aus een Boom, däm unjen de Wartlen vedrieejen, un bowen de Asta vewalkjen;

¹⁷dee woat em Launt gaunz vejäten, un wieda rut weet kjeena waut von am.

¹⁸Dee woat utem Licht em diestren jeschowen, un gaunz vedräwen von dise Welt.

¹⁹Dee woat kjeene Kjinja haben, un kjeene Grootkjinja em Volkj; doa woat kjeena von siene Famielje sennen, toom opp siene Städ wieda oabeiden.

²⁰De Menschen vom Wasten woat daut gruslen, un dee em Oosten woaren stutzen, wan sien Jerecht opp am kjemt.

²¹See sajen: Dit es krakjt woo däm schlajchten Mensch daut jeit; soo kjemt däm daut ut, wäa Gott veacht.