Read Plautdietsch (Low German) – De Bibel Hiob 2 Bible Online

Hiob 2 - Plautdietsch (Low German) – De Bibel bible

Hiob 2

¹Nu kjeem daut wada, aus de HAR sikj met siene himlische Deena vesaumeld, daut de Vekjläaja doa uk wia.

²Un de HAR fruach am: Wua best du jewast? Un de Vekjläaja säd: Ekj sie oppe Ieed jewast, von een Enj bat daut aundre.

³Un de HAR säd to däm Vekjläaja: Hast oppjepaust waut Hiob, mien Deena, deit? Doa es nich noch eena oppe Ieed, dee soo es aus hee. Däm es met nuscht to beschuljen un deit emma waut rajcht es; dee haft Forcht fa Gott un deit nuscht schlajchtet. Hee blift truhoatich, uk wan du mie onen Grunt doatoo jekjräajen hast, daut ekj am aules vedorwen hab.

⁴Un de Vekjläaja säd toom HARN: Wäa mau met heele Hut doavon kjemt! Waut jeft de Mensch nich fa siene Jesuntheit?

⁵Oba wan du een mol siene Knoakes un Fleesch auntuksen wurscht, waut jleefst du doch, dee wudd die jlikjtoo aufsajen.

⁶Un de HAR säd to däm Vekjläaja: Well wie emol seenen. Du doascht doonen waut du west met am, oba du doascht nich sien Läwen nämen.

⁷Un doamet jinkj de Vekjläaja wajch vom HARN, un hee leet schlajchte Schwäaren opp Hiob utbräakjen, von unja siene Feet bat bowen opp däm Kopp.

⁸Un Hiob sad sikj em Ausch dol, un krauzt sikj met een Schoawel.

⁹Dan kjeem siene Fru no Hiob un säd: Woascht du nu uk noch emma soon truhoatja Mensch bliewen? Flieekj Gott emol ut, un dan stoafst!

¹⁰Un Hiob säd to ar: Du rätst krakjt soo aus eene onveninftje Fru. Wan Gott ons waut goodet schekjt, dan näm wie daut wellich aun; sull wie dan nich uk daut schwoare von am hannämen? Un bie aul dit, vesindijd Hiob sikj nich met daut, waut hee säd.

¹¹Aus Hiob siene dree Frind, Elifas von Teman, Bildad von Schuach, un Zofar von Naama, von Hiob sien Ojjlekj hieeden un woo am daut jegonen wia, worden see sikj eenich no am to gonen, soo daut see am treesten un biestonen kunnen.

¹²Aus see am von een Enjskje auf sagen, leet an Hiob nich no däm wäm see jekjant hauden, un see fungen aun lud to hielen. See reeten sikj äare Kjleeda twei un schmeeten sikj Ieed opp däm Kopp.

¹³See sauten Dach un Nacht oppe Ieed fa säwen Doag onen daut see een Wuat to am säden, wiels see sagen woo schwoa hee lieden must.