Read Plautdietsch (Low German) – De Bibel Hiob 22 Bible Online

Hiob 22 - Plautdietsch (Low German) – De Bibel bible

Hiob 22

¹Dan säd Elifas von Teman:

²Halpt Gott daut waut, waut de Mensch deit? Een kluaka Mensch kaun sikj bloos selfst behelplich sennen.

³Waut fa eene Freid es däm daut, dee aule Macht haft, wan du daut deist waut rajcht es? Waut halpt am daut, wan du uk gaunz onen Fäla best?

⁴Jleefst du daut Gott die trajcht wiest un die ver Jerecht nemt, wiels du soo fromm best?

⁵Es daut nich ea, wiels du orrajcht jedonen hast, un eemol no daut aundremol jesindicht hast?

⁶Hast du nich emma waut jenomen aus Birjschoft von Nobasch, wan dee die uk nuscht schuldich wieren, un äare Kjleeda jenomen, daut see nich jenuach hauden?

⁷Hast du dee waut darscht nich onen Wota jeloten, un dee, dee hungrich wieren, onen Broot?

⁸De rikja Maun nemt Launt en met siene Macht, un lat siene Frind doa wonen.

⁹Hast du nich Wätfrues wajchjeschekjt, onen dee waut to jäwen, un Weisenkjinja daut Läwen ommäajlich jemoakt?

¹⁰Daut es wuarom de Schlenjen rom die ligjen, un du met eemol von Angst benomen best.

¹¹Daut es wuarom die daut dunkel utsitt un du nich seenen kaust, un du von Wota äwaschwommen best.

¹²Es Gott nich wiet auf em hechsten Himmel? Besee die de Stierns, woo huach dee sent,

¹³un dan frajchst du noch: “Waut weet Gott? Kaun hee derch aul daut diestre rajcht rechten?

¹⁴Hee haft aul de Wolkjen rom sikj, daut hee nich seenen kaun, un wiet auf, wua Himmel un Ieed toopkomen, jeit hee rom.”

¹⁵Helst du die aun dän oolen Wajch, soo aus de schlajchte Menschen daut deeden,

¹⁶waut plazlich wajch wieren, ea see oolt worden, un dee äare Grunt vom Wota wajch wosch?

¹⁷Dee säden to Gott: “Lot ons toch”, un to däm dee aule Macht haft: “Waut kaust du ons aundoonen?”

¹⁸wan aules, waut see hauden, doch von am jekomen wia. Ekj vesto nich woo de gottloose soo denkjen kjennen.

¹⁹Dee waut opp däm rajchten Wajch gonen, seenen däm gottloosen siene Strof, un freien sikj; dee waut sikj aun nuscht veschulcht haft, lacht däm ut,

²⁰un sajcht: “Dee waut jäajen ons sent, sent gaunz enne Grunt jekomen; un waut doa jebläwen wia, es em Fia vebrent.”

²¹Jeff die han un moak Fräd met Gott, dan woascht du jlekjlich sennen.

²²Nemm daut aun, waut hee die unjarecht, behool daut un räakjen daut väl.

²³Drei die no däm, dee aule Macht haft; sie deemootich un laj aul daut schlajchte von dien Hus tosied.

²⁴Schmiet dien Golt wajch, un vestrei dien Golt von Ofir mank de Steena em Riefa,

²⁵un lot däm, dee aule Macht haft, fa die Golt sennen, un mea wieet sennen aus een Klompen Selwa.

²⁶Dan woascht du die freien, to däm dee aule Macht haft, un enne Hecht kjikjen no Gott.

²⁷Wan du am aunbätst, woat hee no die horchen, un du woascht am jäwen, waut du am vesproaken hast.

²⁸Daut, fa waut du die eenich woascht, woascht du utfieren; un doa woat Licht opp diene Wäaj sennen.

²⁹Gott sat de huachmootje rauf, un häft de deemootje opp.

³⁰Hee woat dee, dee schuldich sent, raden, wan dee äare Henj rein moaken.