Read Plautdietsch (Low German) – De Bibel Hiob 23 Bible Online

Hiob 23 - Plautdietsch (Low German) – De Bibel bible

Hiob 23

¹Dan säd Hiob:

²Ekj kaun noch nich metstemmen un mott kloagen, ekj kaun mie nich hoolen von stänen;

³wan ekj bloos wist woo hee to finjen wia, un wua ekj no am komen kunn.

⁴Ekj wudd am dan mien rajcht väalajen, un am een Mulvoll Biespels jäwen;

⁵un dan kunn ekj weeten, waut hee säd, un vestonen, waut hee mie sajen well.

⁶Wudd hee met aul siene Krauft opp mie komen? Nä, hee wudd leewa selfst no mie horchen?

⁷Dan wudd ekj, eena däm nuscht väatoschmieten es, mie met am unjahoolen, un wudd opp emma friejesproaken woaren.

⁸Wan ekj oosten go, es hee nich doa; go ekj wasten, dan es doa kjeene Spua von am;

⁹wan hee em Nuaden schauft, kjrie ekj am nich to seenen, un wan hee em Sieden es, venäm ekj am nich.

¹⁰Oba hee weet aules waut ekj doo; wan hee mie derchsitt, woa ekj jlenzen aus Golt;

¹¹miene Feet staupen nich biesied sienen Stich; ekj hab mie aun sienen Wajch jehoolen, un hab nich tosied jestaupt.

¹²Waut hee mie väaschreef, hab ekj jehoolen, waut hee jesajcht haft, oppbewoa ekj en mien Hoat.

¹³Gott deit krakjt waut hee well, wäa kaun am opphoolen? waut hee sikj väanemt, fieet hee derch.

¹⁴Hee woat doonen, waut hee fa mie jeplont haft, un dan noch mea, soo aus hee well.

¹⁵Doawäajen fercht ekj mie ver am; wan ekj noch mau aun am denkj, schudat mie daut.

¹⁶Gott haft mie dieslich jemoakt; dee, dee aule Macht haft, enjst mie,

¹⁷doch mien diestra Toostaunt, un daut ekj nu nuscht seenen kaun, haft mie nich stell jemoakt.