Read Plautdietsch (Low German) – De Bibel Hiob 24 Bible Online

Hiob 24 - Plautdietsch (Low German) – De Bibel bible

Hiob 24

¹Wuarom stalt dee, dee aule Macht haft, nich Doag aun, toom daut rajcht enfieren; un wuarom seenen dee, dee am kjanen, nich Tieden, wua hee sikj wiest?

²De gottloose saten de Jrens Tieekjens wieda; dee stälen sikj Vee un weiden daut.

³See leiden daut Weisenkjint sien Äsel wajch, un hoolen de Wätfru äaren Oss aus Birj;

⁴see steeten de oame vom Wajch, un dee, dee schlajcht auf sent, motten sikj vekrupen.

⁵De oame bemieejen sikj daut see Äten finjen, krakjt soo aus wille Äsels enne Wiltnis; see sieekjen sikj waut, wua nuscht waust, daut äare Kjinja to äten kjrieen.

⁶De oame sieekjen Fooda toop, opp aundre äare Flekja; see läsen Wiendruwen no, en de gottloose äare Goades.

⁷Dee haben nich toom sikj enne Nacht bedakjen, un kjeene Dakjen wan daut kolt es;

⁸see woaren gaunz naut vom Räajen enne Boaj, un länen sikj aun de Steena un haben kjeen Dak.

⁹De beese rieten de Wätfrues äare Kjinja vom Liew, un velangen däm oamen sien Kjint aus Birjschoft;

¹⁰see loten de oame haulf noaktich romgonen, wiels see nich Kjleeda haben. De oame bliewen hungrich, wan see uk Goawen droagen;

¹¹see drekjen Oliewen un klunjen Wiendruwen ut, oba kjrieen nuscht, wan an darscht.

¹²En de Staut hieet eena dee oppem Stoaw Bad stänen; de vewunde roopen von Hoaten no Help, doch deit Gott doa nuscht met.

¹³Doa sent soone waut jäajen daut Licht sträwen; dee kjanen nich dän Wajch nom Licht, un gonen nich doa wua dee hanfieet.

¹⁴Ea de Dach aunfangt steit de Merda opp, un brinjt de oame un dee waut schlajcht auf sent om; hee schowanakt enne Nacht aus een Reiba.

¹⁵De Ehebräakja luat bat daut diesta woat, un denkjt dan woat am kjeena seenen; hee bedakjt sikj sien Jesecht.

¹⁶Bie diesta bräakjen see en Hiesa nenn, un bie Dach vestäakjen see sikj, wiels see vom Licht nuscht weeten wellen.

¹⁷Wan daut diesta woat fangt äa Dach aun, wiels see met de Angst em diestren bekaunt sent.

¹⁸Muchten de beese Menschen veschwinjen aus daut Stroo oppem Riefa, un mucht Gott äa Launt von goot droagen hoolen, daut kjeena no sienen Goaden kjikjen gonen mucht.

¹⁹Mucht de Doot dee wajchnämen waut sindjen, soo aus de Hett un de drieeje Tiet daut Schneewota veschwinjen loten.

²⁰Mucht äare ieejne Mutta von an vejäten, un de Warm sikj to an freien; mucht kjeena an em Denkj hoolen, un beeset doljebroaken woaren aus Beem.

²¹See nutzen de Frues ut, waut nich kjennen Kjinja haben, un sent nich jenstich to de Wätfrues.

²²Gott nemt de stoakje wajch en siene Macht, wan dee oppstonen, vetwiewlen see aum Läwen.

²³Hee jeft de gottloose daut, opp waut see sikj veloten un secha sent, un hee paust no aules opp waut dee doonen.

²⁴Dee sent een kortet stootje huach aunjeseenen, un dan sent see wajch; dee vewalkjen un vedrieejen aus irjent eene Plaunt, un woaren aufjeschnäden aus eene riepe Oa.

²⁵Es doa wäa, dee dit nich jleeft? Kaun wäa bewiesen daut dit nich soo es?