Read Plautdietsch (Low German) – De Bibel Hiob 26 Bible Online

Hiob 26 - Plautdietsch (Low German) – De Bibel bible

Hiob 26

¹Dan säd Hiob:

²Woo saul dit behelplich sennen, fa eenem, dee kjeene Krauft haft? Woo saul dien Rot daut leichta moaken, wan mie daut aul soo schwoa es?

³Du rätst aus wan du eenem, dee rajcht nuscht weet, belieescht, un däm aules unjarechten west.

⁴Wua hast du aul dise Weisheit häa? Woo es die daut enjekomen?

⁵Dee, dee nu em Doodenrikj sent, zetren met dee toop, waut deep em Wota sent.

⁶Fa Gott es daut Doodenrikj openboa; fa am sent de Vestorwne nich toojedakjt.

⁷Hee sat de Stiernwelt han, wua aules ladich es; un helt de Ieed opp äaren Plauz, onen eenen Foot.

⁸Hee moakt Wolkjen met sea väl Wota, un dee hoolen daut un rieten nich twei.

⁹Hee bedakjt sienen Troon met dikje Wolkjen.

¹⁰Hee stalt eene Jrens rom daut Mäa, doa wua daut Licht bat aum diestren steit.

¹¹De huage Boaj, dee de Stiernwelt opphoolen, tekjren wan Gott dee schelt.

¹²Met siene Macht haft hee daut Mäa stell jemoakt, un hee vestunt daut Ojjeheia doltoschlonen.

¹³Hee pust dän Himmel rein un blenkjrich; met siene Macht stuak hee de Schlang, aus dee sikj wajch schlikjt.

¹⁴Un dit es mau een Beskje von daut waut hee deit; waut wie venomen haben von sien grootet Woakj, es aus een Fuschlen em vejlikj met däm Rummel. Kjeena vesteit aules waut hee kaun un deit.