Read Plautdietsch (Low German) – De Bibel Hiob 27 Bible Online

Hiob 27 - Plautdietsch (Low German) – De Bibel bible

Hiob 27

¹Dan räd Hiob wada wieda:

²Soo secha aus doa een Gott es, dee mie nich jeft waut mie jehieet, un daut dee, dee aule Macht haft, mien Läwen betta moakt,

³soo lang aus ekj noch Odem hab, un Gott sien Läwen en mie es,

⁴bliew ekj doa faust opp stonen, daut ekj kjeene Onwoarheit jerät, un kjeenen Mensch väajeloagen hab.

⁵Ekj sie noch wiet auf von met junt metstemmen; soo lang aus ekj läw, bliew ekj doaropp stonen, daut ekj oschuldich sie.

⁶Ekj woa nienich toojäwen daut ekj orrajcht jedonen hab, doa es kjeen Dach wäajen woonen mien Hoat mie beschulcht.

⁷Mucht mienen Fient un Jäajna daut soo gonen aus de gottloose un Sinda.

⁸Opp waut hopt de gottloosa aun sienen latsten Dach, wan Gott sien Läwen aufschnitt?

⁹Woat Gott no däm sien Roopen horchen, wan am ieescht aules toopbrakjt?

¹⁰Freit soona sikj aun däm, dee aule Macht haft, un bät hee emma wada to Gott?

¹¹Ekj woa junt unjarechten äwa Gott siene Krauft, un nuscht trigjhoolen von däm, dee aule Macht haft.

¹²Jie haben daut aula selfst jeseenen; woo brinj jie dan noch emma daut väa, waut nuscht es?

¹³Ekj saj junt woo däm beesen daut bie Gott woat utkomen; un waut de ruchloose kjrieen von däm, dee aule Macht haft:

¹⁴Wan hee uk wudd väl Säns haben, woaren dee vom Schwieet omkomen; un siene Nokomen woaren emma hungrich bliewen;

¹⁵dee waut dan noch äwabliewen woaren krank woaren un stoawen; un de Wätfrues woaren nich äwa an hielen.

¹⁶Wan de schlajchta uk Selwa toopropt aus Stoff, un Kjleeda toopfieet aus Leem;

¹⁷woaren de jerajchte daut brucken waut hee toopfieet, un dee, dee sikj nich veschulcht haben, woaren daut Selwa endeelen.

¹⁸De beese buen sikj Hiesa, soo stoakj aus een Flotta sient, un soo plätrich aus däm Wajchta em Goaden sient.

¹⁹Hee lajcht sikj rikj han, oba hee woat daut nich wada; wan hee oppwakjt, es doa nuscht von jebläwen.

²⁰De Forcht benemt am aus eene Äwaschwamunk; de Stormwint enne Nacht drajcht am wajch.

²¹De Oostwint häft am opp un nemt am wajch, daut hee ut siene Städ rutjefäacht es.

²²Hee moakt sikj doavon, soo sea aus hee kaun, doch de Wint schleit am onen Metlieden.

²³Aus wan em Trotz, jult de Wint vebie, un lacht am, opp siene Städ, ut. Soo jeit däm gottloosen daut aum Enj.