Read Plautdietsch (Low German) – De Bibel Hiob 28 Bible Online

Hiob 28 - Plautdietsch (Low German) – De Bibel bible

Hiob 28

¹Daut jeft Selwa Mienen un Owes toom Golt schmelten.

²Iesa woat ut de Ieed jenomen, un Koppa woat ut Steen jeschmolten.

³Wua daut diesta es, woat Licht jemoakt; bat aule Enj woat em Steen jegroft, eendoont woo enjstlich schwoat daut es.

⁴Wiet wajch von doa wua Menschen sent, woat eene deepe Mien jegroft; wua kjeen Reisenda doaraun denkjt, schoklen dee opp Strenj wua kjeena eenen Foot hansaten kaun, wiet auf von aundre Menschen.

⁵De Grunt wua bowen jeakat woat, es unjen veweelt aus no een Fia.

⁶Doa finjen Menschen Safier Steen, un mank daut Stoff un Steen es Golt.

⁷Kjeen Odla sitt dän Wajch enne Ieed, nich emol de Ul sien Uag kaun daut seenen.

⁸Kjeen willet Tia kjant doa dän Wajch, un Leiws sent doa nich nenjegonen.

⁹Daut hoatste Steen woat derchjegroft; see dreien de Boaj schia äwakopp.

¹⁰See growen eenen Gank em Steen nenn, un finjen, waut doa wieetvoll es.

¹¹See damen doa daut Wota auf, un brinjen äwadäl waut vestoaken wia.

¹²Doch wua finjt eena Weisheit, un wua kjenn wie vestonen lieren?

¹³Mank Menschen finjt eena daut nich. Lied weeten nich dän Wieet doavon.

¹⁴De Aufgrunt sajcht: “Weisheit es nich hia”; un daut Mäa: “Dee es uk nich hia”.

¹⁵De Weisheit jeit fa Golt nich entotuschen; un met Selwa es dee nich to betolen.

¹⁶Daut es mea wieet aus Golt von Ofir, ooda aus daut baste Onniks un Safier.

¹⁷Vejlikj daut nich met eene goldne Wos, un nich met dieret glausnet Straums.

¹⁸De Weisheit es väl mea wieet, aus Kristal, Koral un Parlen.

¹⁹Nich Topas von Kusch, nich daut reinste Golt, es soo väl wieet aus Weisheit.

²⁰Von wua kjemt Weisheit häa? un wua kjenn wie vestonen lieren?

²¹Kjeen Mensch kaun seenen wuahäa dee kjemt, uk nich daut schneifste Voagel Uag.

²²Daut Grauf un de Doodes sajen mau: “Wie hieren, doa woat von jerät.”

²³Doch Gott es daut kloa wua Weisheit licht; hee kjant de Städ un uk dän Wajch.

²⁴Hee sitt bat daut latste oppe Ieed; vom Himmel sitt hee aules kloa.

²⁵Aus hee dän ieeschten Wint aufwuach, un de Maussen von daut Wota aufmaut,

²⁶aus hee de Räajel sad fa däm Räajen, un daut Jewitta sienen Wajch op muak,

²⁷don sach hee Weisheit, un proowd dee auf. Hee stald dee doa fa aulem kloa.

²⁸Moakj die, säd de HAR toom Mensch, wäa däm HARN ieet, dee es weis, un wäa von beeset wajchdreit, wiest Vestentnis.