Read Plautdietsch (Low German) – De Bibel Hiob 29 Bible Online

Hiob 29 - Plautdietsch (Low German) – De Bibel bible

Hiob 29

¹Dan räd Hiob wieda un säd:

²Wan daut doch wada soo kunn sennen aus daut emol wia, aus Gott mie Schutz jeef.

³Dan scheen siene Laump äwa mienen Kopp, un ekj kunn met sien Licht em diestren gonen.

⁴Daut wia de baste Tiet en mien Läwen, un Gott bewoakt mie aus een Frint.

⁵Dee, dee aule Macht haft, wia dan emma bie mie, un miene Kjinja wieren runtom mie.

⁶Dan kjwitscht de Malkj opp mienen Stich, un de Oliewenpras rand äwa bie däm Steen.

⁷Wan ekj dan mienen Plauz biem Stautspuat enneem,

⁸staupten de junge Mana tosied, un de elre stunden ver mie opp.

⁹De huach aunjeseene hieeden opp met räden, un hilden sikj de Haunt äwa daut Mul;

¹⁰soogoa de Leida vom Volkj worden stell, un drekjten äare Tung aum Bän vom Mul.

¹¹Wan see hieeden waut ekj säd, dan unjastetten see daut, un wan see sagen waut ekj deed, dan nekjten see met däm Kopp,

¹²wiels ekj de oame utholp, wan see roopten, un daut Weisenkjint, wäm kjeena biestunt.

¹³Dee waut sikj en äa lieden nich wisten, dee wenschten mie een Säajen; un de Wätfru kunn em Hoat wada sinjen, wiels ekj ar jeholpen haud.

¹⁴Soo aus Menschen miene Kjleeda kjanden, soo kjanden see mie aus eena, dee doa holp; soo pinkjlich aus ekj Rock un Koppbinj druach, holp ekj de Menschen to äa rajcht.

¹⁵Ekj deend aus Uagen fa de blinje, un aus Feet fa de lome;

¹⁶ekj wia aus een Voda fa de oame, un stunt en fa de framde, wan see Trubbel hauden.

¹⁷Ekj bruak däm ojjerajchten sien Unjamul; un reet, waut hee jebäten haud, ut sien Mul.

¹⁸Ekj docht ekj wudd lang läwen, un Tus jemietlich stoawen;

¹⁹ekj wudd aus een groota Boom waussen, met Wartlen waut wiet em Wota rieekjten, un Bläda, waut vom Deiw kjlakjaden.

²⁰Ekj docht ekj wudd emma fresch jeloft woaren, un daut mien Boagen emma reed en miene Haunt wudd sennen.

²¹See luaden, wan ekj waut säd, un horchten, un wullen weeten, waut ekj roden wudd.

²²Wan ekj jerät haud, wia daut stell, waut ekj säd, saut bie an aus de Deiw.

²³See luaden no mie aus no Räajen; see wieren hinjaraun doano aus nom loten Räajen.

²⁴Wan ekj frintlich kjikjt, brocht an daut nieen Moot; mien frooet Jesecht treest de bedrekjte.

²⁵Ekj muak de Entscheidungen un leid an, aus een Kjennich met siene Soldoten, un eena, dee bie een Trua Troost jeft.